Quest News

22/07/2025

(روزنامہ کویسٹ نیوز اسلام آباد) پاکستان کو پہلی باربنگلادیش سے 3 میچوں کی سیریز میں شکست ہوگئی، دوسرے ٹی 20 میں بھی بنگلادیش نے گرین شرٹس کو دلچسپ مقابلے کے بعد 8 رنز سے ہراکر سیریز 0-2 سے اپنے نام کرلی۔

پاکستان اور بنگلہ دیش کے درمیان ٹی 20 سیریز کا دوسرا مقابلہ شیرِ بنگلہ نیشنل اسٹیڈیم ڈھاکا میں کھیلا گیا، میچ کا ٹاس پاکستان نے جیت کر بنگلہ دیش کو پہلے بیٹنگ کی دعوت دی۔

بنگلہ دیشی ٹیم پہلے بیٹنگ کرتے ہوئے مقررہ 20 اوورز میں 133 رنز پر آؤٹ ہوگئی تاہم 134 رنز کے ہدف کے تعاقب میں پاکستان کی ٹیم 125 رنز بنا کر ہمت ہار گئی۔

پاکستان کی بیٹنگ
پاکستان کی جانب سے آل راؤنڈر فہیم اشرف نے بھرپور مزاحمت کرتے ہوئے شاندار 51 رنز اسکور کیے تاہم وہ ٹیم کو میچ جتوانے اور سیریز بچانے میں ناکام رہے۔ عباس آفریدی 19 احمد دانیال 17 اور خوشدشاہ نے 13 رنز بنا کر آؤٹ ہوئے۔

پاکستانی بیٹرز نے 134 رنز کے ہدف کے تعاقب میدان میں اتری تو اس کو پہلا نقصان محض 4 رنز پر اٹھانا پڑا، جب صائم ایوب ایک رن بنا کا رن آؤٹ ہو گئے۔

پاکستان کی طرف سے دیگر بیٹرز بھی ناکام رہے، فخر زمان 8، محمد حارث، حسن نواز اور محمد نواز کوئی رنز بنائے بغیر پویلین لوٹ گئے، کپتان سلمان علی آغا بھی 9 رنز بنا کر آؤٹ ہو گئے۔

بنگلا دیش کی جانب سے شریف الاسلام نے تین جبکہ تنظیم حسن ثاقب اور مہدی حسن نے دو، دو کھلاڑیوں کو آؤٹ کیا۔مستفیض الرحمان اور رشاد حسین ایک، ایک وکٹ لے سکے۔بنگلہ دیش کی اننگز
بنگلہ دیش نے پہلے بیٹنگ کرتے ہوئے پاکستان کو جیت کے لیے 134 رنز کا ہدف دے دیا، 24 کے مجموعے پر 4 بیٹرز کے پویلین واپس لوٹ جانے کے بعد بنگلہ دیشی بیٹرز پاکستانی بولرز پر پلٹ کر وار کیا اور مقررہ 20 اوورز میں مجموعہ کو 133 رنز تک پہنچانے میں کامیاب رہے۔

بنگلہ دیش کی جانب سے جاکر علی 55 رنز کی اننگز کھیل کر نمایاں رہے جبکہ مہدی حسن 33، پرویز حسین ایمان 13، رشاد حسین 8، کپتان لٹن داس 8، تنظیم حسین ثاقب 7، محمد نعیم 3، شریف الاسلام 1، شمیم حسین 1 اور توحید ہردوئے صفر پر آؤٹ ہوئے۔

پاکستان کی جانب ڈیبیو کرنے والے احمد دانیال، عباس آفریدی اور سلمان مرزا نے 2، 2 وکٹیں حاصل کیں، فہیم اشرف اور محمد نواز ایک، ایک وکٹیں لینے میں کامیاب رہے۔

میچ کا ٹاس
اس سے قبل، پاکستان کے کپتان سلمان علی آغا نے بنگلہ دیش کے خلاف ٹاس جیت کر پہلے بولنگ کرنے کا فیصلہ کیا، پاکستان کی پلیئنگ الیون میں ایک تبدیلی کی گئی ہے، اسپنر ابرار احمد کی جگہ احمد دانیال کو قومی اسکواڈ کا حصہ بنایا گیا۔

قبل ازیں، پاکستان اور بنگلادیش کے کھلاڑیوں نےگزشتہ روز ڈھاکہ میں ایئرفورس کے طیارے کے مقامی اسکول میں گر کر تباہ ہونے کے واقعے میں جاں بحق افراد سے اظہار یکجتی کی اور میچ کے آغاز سے قبل ایک منٹ کی خاموشی اختیار کی۔

پاکستان کی پلیئنگ الیون
پاکستان ٹی20 ٹیم میں اوپنر بلے باز فخرزمان، صائم ایوب، محمد حارث اور کپتان سلمان آغا شامل ہیں، حسن نواز، محمد نواز ، خوشدل شاہ، فہیم اشرف، احمد دانیال، سلمان مرزا اور عباس آفریدی پلیئنگ الیون کا حصہ ہیں۔

بنگہ دیش کی پلیئنگ الیون
بنگلہ دیش کی ٹیم میں پرویز حسین ایمن، نعیم شیخ، لٹن داس (کپتان و وکٹ کیپر)، توہید ہرید وئے، شمیم حسین، جاکر علی، مہدی حسن، رشاد حسین، تنزیم حسن، شریف الاسلام اور مستفیض الرحمان شامل ہیں۔

خیال رہے کہ بنگلہ دیش نے پہلے ٹی 20 میچ میں پاکستان کو 7 وکٹوں سے شکست دے کر سیریز میں ایک، صفر کی برتری حاصل کر لی تھی۔

پاکستان یہ میچ جیت کر سیریز برابر کرنا چاہتا ہے کیونکہ پہلے میچ میں اسے شکست ہوئی تھی جبکہ بنگلہ دیش کی کوشش ہے کہ ایک اور کامیابی حاصل کر کے مسلسل دوسری ٹی ٹوئنٹی سیریز اپنے نام کرے۔

ٹی20 انٹرنیشنل میں پاکستان اور بنگلہ دیش اب تک 23 بار آمنے سامنے آ چکے ہیں، جن میں سے 19 میچ پاکستان نے جیتے ہیں اور 4 میں فتح بنگلہ دیش کے حصے میں آئی ہے۔

22/07/2025

(روزنامہ کویسٹ نیوز اسلام آباد) پاکستان تحریک انصاف (پی ٹی آئی) نے 5 اگست کو مینار پاکستان پر جلسے کا اعلان کر دیا۔
پی ٹی آئی لاہور کے صدر شیخ امتیاز محمود نے ڈپٹی کمشنر کو جلسے کی اجازت کے حوالے سے درخواست دے دی۔

پی ٹی آئی کی جانب سے جمع کرائی گئی درخواست میں موقف اختیار کیا گیا کہ پاکستان تحریک انصاف پیٹرن انچیف پی ٹی آئی عمران خان کی رہائی کیلئے جلسے کا انعقاد کرنا چاہتی ہے۔

درخواست میں کہا گیا کہ 5 اگست کو شام 4 سے لے کر رات 10 بجے تک پارٹی قیادت کے ساتھ صوبائی اسمبلی کے ممبران مینار پاکستان میں جلسہ کرنے کے خواہاں ہیں۔

ڈپٹی کمشنر لاہور کو جمع کرائی گئی درخواست میں مزید کہا گیا کہ 5 اگست کو مینار پاکستان یا کسی اور متبادل جگہ پر جلسہ کی اجازت دی جائے۔یاد رہے کہ اس سے قبل چیئرمین پی ٹی آئی بیرسٹر گوہر نے اپنے ایک بیان میں کہا تھا کہ حکومت سے مذاکرات کا وقت ختم ہو گیا، اب وہ ہوگا جو بانی پی ٹی آئی عمران خان ہدایات دیں گے، عمران خان اس احتجاج کو جیل سے خود لیڈ کریں گے۔

ان کاکہنا تھا کہ دو سال ہو گئے ہیں، اب سختیاں ختم ہونی چاہئیں، بانی پی ٹی آئی سے پارٹی قیادت کی ملاقات ہونی چاہیے، عمران خان سے ملاقات کے حوالے سے عدالتی فیصلے موجود ہیں تاہم ان کی خلاف ورزی کی جا رہی ہے۔

بیرسٹر گوہر نے مزید کہا کہ بانی پی ٹی آئی سے آخری ملاقات بیرسٹر سیف کی ہوئی پھر ان کی بہنوں کی ملاقات ہوئی، پی ٹی آئی کے لوگوں کو نکالنا نہیں پڑتا لوگ خود نکلتے ہیں۔

22/07/2025

22/07/2025

جماعت اسلامی پاکستان یو سی جہانگیری کے ارکان وکارکنان کا اجلاس ۔ قیم ضلع اعجاز قمر کی خصوصی شرکت

22/07/2025

(روزنامہ کویسٹ نیوز اسلام آباد) سرگودھا کی انسداد دہشت گردی عدالت نے 9 مئی کیس میں اپوزیشن لیڈر پنجاب اسمبلی ملک احمد خان بچھڑ سمیت 32 ملزمان کو 10، 10 سال قید کی سزا سنادی۔

تفصیلات کے مطابق انسداد دہشت گردی عدالت سرگودھا نے میانوالی میں 9 مئی کو ہنگامہ آرائی کے خلاف کیس کا فیصلہ سنادیا۔

عدالت نے اپوزیشن لیڈر ملک احمد خان بچھر اور رکن قومی اسمبلی احمد چٹھہ سمیت پی ٹی آئی کے 32 ملزمان کو 10،10 سال قید کی سزا سنادی۔

سزا پانے والوں میں سابق ایم این اے بلال اعجاز بھی شامل ہیں، ملزمان پر پُرتشدد احتجاج، جلاؤ گھیراؤ اور دیگر سنگین الزامات عائد کیے گئے تھے۔

ملک احمد بچھڑ کا سزا کا فیصلہ لاہور ہائیکورٹ میں چیلنج کرنے کا اعلان
دوسری جانب اپوزیشن لیڈر پنجاب اسمبلی ملک احمد بچھڑ نے انسداد دہشت گردی عدالت سرگودھا سے سزا کا فیصلہ لاہور ہائیکورٹ میں چیلنج کرنے کا اعلان کردیا۔

اپوزیشن لیڈر نے کہا کہ عدالت نے سیاسی بنیادوں پر قائم مقدمے میں آئین سے ہٹ کر فیصلہ دیا، میرے خلاف قانونی ضابطے پورے کیے بغیر سزا کا فیصلہ سنایا گیا۔

ملک احمد خان بچھر کا کہنا تھا کہ 26 ویں آئینی ترامیم کے بعد حکومت نے عدالتوں کو اپنے تابع کر لیا ہے، 9 مئی کے سیاسی مقدمات میں ہمیں اس طرح کے فیصلوں کی امید ہے۔

انہوں نے مزید کہا کہ تحریری فیصلہ موصول ہونے کے بعد ہائیکورٹ سے رجوع کروں گا، میری نااہلی کے حوالے سے ابھی کچھ کہنا قبل از وقت ہے۔

قانون ہاتھ میں لینے پر سزا کے لیے بھی تیار رہنا چاہیئے، بیرسٹر عقیل ملک
دوسری جانب وزیر مملکت بیرسٹر عقیل ملک کا کہنا ہے کہ سرگودھا کی انسداد دہشت گردی عدالت کا فیصلہ آئین اور قانون کے مطابق ہے، فیصلے کا خیرمقدم کرتے ہیں، ملک احمد بچھر سمیت تمام 32 افراد کو قانونی عمل پورا ہونے پر سزا سنائی گئی۔

بیرسٹر عقیل ملک نے مزید کہا کہ قانون سب کے لیے برابر ہے، قانون ہاتھ میں لینے پر سزا بھگتنے کے لیے بھی تیار رہنا چاہیئے، دنیا نے آج انصاف ہوتے ہوئے بھی دیکھ لیا، 9 مئی پر جلاؤ گھیراؤ کے کیس پانی کی طرح شفاف ہیں۔ملک احمد خان بھچر کو 10 سال کی سزا جمہوریت کا قتل ہے، رانا شہباز
پی ٹی آئی کے چیف وہپ رانا شہباز نے گفتگو کرتے ہوئے کہا کہ اپوزیشن لیڈر پنجاب اسمبلی ملک احمد خان بھچر کو 10 سال کی سزا جمہوریت کا قتل ہے، احمد چٹھہ، رانا بلال اعجاز کی سزا افسوسناک ہے، بلاجواز سزائیں دی گئیں۔

رانا شہباز کا مزید کہنا تھا کہ احمد خان بھچر جہاں سزا ہوئی ان علاقہ سے کوئی تعلق نہیں، آج کا دن جمہوریت کےلیے سیاہ دن ہے، کبھی لاہور تو کبھی فیصل آباد سے فیصلہ آئیں گے۔

پی ٹی آئی کے چیف وہپ نے کہا کہ 26 ویں آئینی ترمیم سے عدلیہ سے فیصلہ آئیں گے، پوری قوم جانتی ہے ان فیصلوں کا کیا مطلب ہے، لاہور سمیت ملک بھر میں پی ٹی آئی فیصلوں پر احتجاج کرے گی

22/07/2025

(روزنامہ کویسٹ نیوز اسلام آباد) ملک بھر میں سیاحت کے شوقئن افراد کیلئے وارننگ آگئی، محکمہ موسمیات نے ملک بھر میں مون سون کے دوران شدید بارشوں کی پیش گوئی کر دی۔
محکمہ موسمیات نے شدید بارشوں کے پیش نظر عوام کو غیر ضروری سفر سے گریز کرنے کی ہدایت کر دی۔ ممکنہ موسمی صورتحال کے پیش نظر ٹریفک حادثات، لینڈ سلائیڈنگ، درختوں کا گرنا اور ندی نالوں میں طغیانی کا خطرہ ہے۔ سیاح بارشوں کے دوران غیر ضروری سفر اور سیاحتی مقامات پر جانے سے گریز کریں۔بارشوں کے دوران دریاؤں اورندی نالوں کے قریب نہ جائیں۔ موسلادھار بارش نقل و حمل کے نیٹ ورکس میں خلل کا باعث بن سکتی ہے۔ سیاح ضروری احتیاطی تدابیر اختیار کریں اور موسمی حالات سے باخبر رہیں۔ کسی بھی ممکنہ صورتحال پر انتظامیہ کی ہدایات پر عمل کریں۔ ملک بھر میں عوام کے تحفظ کو یقینی بنانے کیلئے تمام ریسکیو اداروں کو ہائی الرٹ کر دیا گیا ہے۔دوسری جانب حکومت نے حالیہ شدید سیلابی صورتحال کے پیش نظر بابوسر روڈ پر ایمرجنسی نافذ کرتے ہوئے باقاعدہ نوٹیفکیشن جاری کر دیا۔ سیلاب کے باعث بابوسر روڈ شدید متاثر ہوا ہے، متعدد گاڑیاں سیلاب میں بہہ گئیں جبکہ کئی سیاح لاپتہ ہیں۔

ڈپٹی کمشنر کے مطابق سیلاب کے بعد مختلف مقامات پر فیملیز پھنس گئی ہیں جنہیں نکالنے کے لیے ریسکیو آپریشن جاری ہے۔ اس ہنگامی صورتحال کے پیش نظر ایمرجنسی کنٹرول روم قائم کر دیا گیا ہے جبکہ تمام ہیڈ آف ڈیپارٹمنٹس کو متحرک رہنے کی ہدایات بھی جاری کی گئی ہیں۔واضح رہے کہ محکمہ صحت، محکمہ پولیس، ریسکیو 1122، این ڈی ایم اے، سی اینڈ ڈبلیو اور دیگر متعلقہ ادارے ایمرجنسی کے دوران ریسپانس کے لیے فیلڈ میں موجود ہیں۔ ڈپٹی کمشنر نے ہدایت کی ہے کہ تمام مشینری بابوسر روڈ کی طرف روانہ کی جائے اور دیامر بھاشا ڈیم پر کام کرنے والی نجی کمپنیوں سے بھی ایکسویٹرز بھیجنے کی اپیل کی گئی ہے۔

22/07/2025

(روزنامہ کویسٹ نیوز اسلام آباد) میٹا کمپنی نے واٹس ایپ میں ایک نئی اپ ڈیٹ کا آغاز کر دیا ہے جو کہ اشتہارات کی پروموشن ہیں۔
اس کے تحت اسٹیٹس ،اپ ڈیٹس اور چینلز میں اسپانسر شدہ مواد دکھایا جائے گا۔ شروع میں یہ فیچر محدود علاقوں میں متعارف کرایا گیا ہے لیکن جلد ہی دنیا بھر میں میسر ہو سکتا ہے۔

ٹیکنالوجی کمپنی میٹا کی ایپ واٹس ایپ نے بیٹا ورژن میں ایک نیا فیچر متعارف کرایا ہے جس کے تحت صارفین کو اسٹیٹس میں اشتہارات نظر آ سکتے ہیں۔ یہ اشتہارات (Sponsored) لیبل کے ساتھ آئیں گے تاکہ یوزرز ذاتی اور بزنس اشتہارات و نجی سٹیٹس میں واضح فرق کر سکیں۔

اس کے علاوہ چینلز کو اپ کرنے کے لیے (Paid Promotion) کا فیچر بھی شامل کیا گیا ہے جس سے چینل بنانے والے اپنا مواد دیگر صارفین تک زیادہ موثر طریقے سے پہنچا سکیں گے۔واضح رہے کہ کمپنی کے مطابق ذاتی چیٹس، گروپس اور کالز اشتہاری نظام سے محفوظ رہیں گے۔ صارفین کو ناپسندیدہ اشتہارات روکنے یا ہائیڈ کے اختیارات بھی فراہم کیے گئے ہیں۔

تجزیہ کاروں کا کہنا ہے کہ یہ تبدیلی کاروباری لوگوں و اداروں کے لیے نفع بخش ثابت ہو سکتی ہے۔ تاہم عام یوزرز کی طرف سے نئے فیچر پر ملی جلے تبصرے سامنے آ رہیں ہے۔

22/07/2025

(روزنامہ کویسٹ نیوز اسلام آباد) ملک بھر میں عوام کے تحفظ کو یقینی بنانے کیلئے تمام ریسکیو اداروں کو ہائی الرٹ کر دیا گیا ہے،ملک بھر میں شدید بارشوں کے پیش نظر عوام کو غیر ضروری سفر سے گریز کی ہدایات جاری کر دی گئیں۔ عوام کو الرٹ جاری کرتے ہوئے کہا گیا ہےکہ محکمہ موسمیات نے ملک بھر میں مون سون کے دوران شدید بارشوں کی پیشگوئی کی ہے جس وجہ سے ٹریفک حادثات، لینڈ سلائیڈنگ، درختوں کا گرنا اور ندی نالوں میں طغیانی کا خطرہ ہے،الرٹ میں سیاحوں کو بارشوں کے دوران غیر ضروری سفر،سیاحتی مقامات پر جانے سے گریز کرنے اور بارشوں کے دوران دریاؤں ندی نالوں کے قریب نہ جانے کی ہدایت کی گئی ہے الرٹ میں مزید کہا گیا ہےکہ سیاح ضروری احتیاطی تدابیر اختیار کریں اور موسمی حالات سے باخبر رہیں۔

22/07/2025

(روزنامہ کویسٹ نیوز اسلام آباد) معروف اداکارہ علیزے شاہ نے کہا ہے کہ انہوں نے انڈسٹری میں کام کا معاوضہ وقت پر نہ ملنے اور عزت نہ کیے جانے کی وجہ سے کام کرنا بند کردیا ہے اور کچھ پروڈیوسرز چاہتے ہیں کہ میں انڈسٹری کو خیرباد کہہ دوں, پروڈیوسرز صاحبان ایکٹرز کا پیسہ کھا کھا کر اتنے بڑے بڑے محل بنا رہے ہیں، کبھی نہ کبھی تو گریں گے۔ انسٹاگرام سٹوریز میں اپنی کئی ویڈیوز شیئر کر کے اداکارہ نے اپنے دل کا حال مداحوں کے سامنے بیان کر ڈالا۔

علیزے شاہ نے کہا کہ میں تھک چکی ہوں اب میں ہر اس شخص کو بے نقاب کروں گی جس نے میرے ساتھ غلط کیا، میں پیچھے نہیں ہٹوں گی۔ انہوں نے کہا کہ لوگ میرا مذاق اڑاتے ہیں، ٹرولنگ کرتے ہیں، مجھ پر میمز بناتے ہیں میں تنگ آچکی ہوں۔ ان کا لوگوں کو مخاطب کرتے ہوئے کہنا تھا کہ آپ کو اندازہ نہیں کہ ایک اداکار کی زندگی کتنی مشکل ہوتی ہے۔ ہمیں ڈراموں کے چیکس 3،3 ماہ بعد ملتے ہیں اور اپنی کمائی کے لیے ہمیں لوگوں سے بھیک مانگنی پڑتی ہے اور جب ملتا ہے تو لگتا ہے کہ ہم پر احسان کیا جارہا ہے۔ اداکارہ نے کہا کہ یہ سب سے بڑی وجہ ہے جس کی وجہ سے میں نے کام کرنا بند کردیا ہے۔انہوں نے کہا کہ جب میں لوگوں کو کہتی ہوں کہ مجھے اپنے گھریلو اخراجات پورے کرنے ہیں تو آگے سے جواب ملتا ہے کہ ہم آپ کے لیے اتنا کر تو رہے ہیں کہ آپ کا گزارا ہوجائے، ان کا نقطہ نظر یہ ہوتا ہے کہ ہم آپ کو اتنی بڑی پروڈکشن میں ڈرامہ دے کر آپ پر احسان کررہے ہیں۔ علیزے کا کہنا تھا کہ 'تو آپ اپنا احسان اپنے پاس رکھیں مجھے نہیں کرنا، جہاں کام میں عزت نہیں ہے وہاں آپ کیا ہی کام کرو گے، جب میں نے اپنی پیمنٹس کے سوال کیے تو سوشل میڈیا پیجز کو پیسے دے کر مجھ پر میمز بنوائی گئیں، مجھے اتنا ٹرول کیا گیا کہ جب میں کسی میٹنگ میں جاتی تھی تو ڈائریکٹر مجھے یہ کہتے تھے کہ آپ کے ہم نے بہت قصے سن رکھے ہیں۔ اداکارہ نے کہا کہ 'وہ ڈائریکٹر مجھے کہتے تھے کہ آپ کی امیج اتنی خراب ہے ہم آپ کو کیوں کاسٹ کریں گے، لیکن آپ کو مجھے کاسٹ کرنا ہے یا نہیں پر یہ سوال پوچھنے والے آپ کون ہوتے ہو کہ میری امیج خراب ہے، اور ایسا ہی ہے تو مجھے میٹنگ میں کیوں بلارہے ہو، ایسے بے عزت کرنا کہ اگلا بندہ اندر سے ٹوٹ جائے۔ پھر اس کے بعد یہ کہنا کہ ہم آپ کے لیے بہت بڑا قدم اٹھا رہے ہیں جیسے میں نے کوئی گناہ کیا ہے، اس انڈسٹری میں آدھی لڑکیاں سلیو لیس، آف شولڈرز پہنتی ہیں۔ آج کل تو پاکستانی فلموں میں ٹینک ٹاپس پہنے جارہے ہیں،اداکارہ کے مطابق 'میرا کہنا یہ ہے کہ مجھے کام دے کر میری ذات پر احسان مت کرو۔مجھے صرف عزت اور ٹائم پر میری پیمنٹ چاہیے، اگر آپ یہ نہیں کرسکتے تو آپ سے بڑا کوئی بھکاری نہیں ہے انڈسٹری میں۔ علیزے نے پروڈیوسرز کو مخاطب کرتے ہوئے کہا کہ یہ جو آپ ایکٹرز کا پیسہ کھا کھا کر اتنے بڑے بڑے محل بنا رہے ہیں، کبھی نہ کبھی تو گریں گے۔ یہ سب آپ لوگوں کو مبارک ہو، میں کام صرف اس وقت کروں گی جب میری عزت ہوگی۔

22/07/2025

(روزنامہ کویسٹ نیوز اسلام آباد) پنجاب سیف سٹیز اتھارٹی کا نیا ای میل پر مبنی شکایتی نظام متعارف، شہری غلط ای چالان کو ٹریفک دفاتر جائے بغیر چیلنج کر سکتے ہیں۔
تفصیلات کے مطابق اس نئے نظام کے تحت اگر کسی شہری کو لگتا ہے کہ اسے غلطی سے ای چالان موصول ہوا ہے تو وہ اپنی شکایت ای میل کے ذریعے [email protected] پر بھیج سکتے ہیں۔ اس ای میل میں ای چالان کی تصویر، گاڑی کا رجسٹریشن نمبر، اور مسئلے کی مختصر وضاحت شامل ہونی چاہیے۔

واضح رہے کہ شکایت موصول ہونے کے بعد PSCA کی ٹیم معاملے کا جائزہ لے گی۔ اگر شکایت درست پائی گئی تو ای چالان کو منسوخ ہو جائے گا۔اتھارٹی کے مطابق اس اقدام کا مقصد عوام کی سہولت میں اضافہ اور غیر ضروری پریشانی سے بچاؤ ہے۔ شہری مزید معلومات حاصل کرنے کے لیے [email protected] پر ای میل کر سکتے ہیں یا پھر فون نمبر (+92)-42-9905-1605(08) پر رابطہ کر سکتے ہیں۔

22/07/2025

(روزنامہ کویسٹ نیوز اسلام آباد) اسلام آباد کی ہاؤسنگ سوسائٹی کے فیز 5 میں کارسوارباپ بیٹی برساتی ریلے میں بہہ گئے۔ پنجاب میں مون سون کی شدید بارشیں جاری ہیں جہاں ندی نالوں میں شدید طغیانی ہے جس کی ویڈیوز بھی سامنے آرہی ہیں۔ اسلام آباد میں شدید بارش کے دوران نجی ہاؤسنگ سوسائٹی کے فیز 5 میں کار میں سوار 2 افراد نالے میں بہہ گئے، گاڑی سمیت نالے میں بہہ جانے والے دونوں افراد مدد کے لیے پکارتے رہے۔ کار سوار افراد نے برساتی نالے کے قریب سے گاڑی گزارنے کی کوشش کی لیکن پانی کابہاؤ تیز ہونے کی وجہ سے دونوں افراد کار سمیت پانی میں بہہ گئے۔ ریسکیو حکام کے مطابق پانی میں بہہ جانے والے افراد کی تلاش کے لیے آپریشن شروع کردیا گیا ہے

22/07/2025

(روزنامہ کویسٹ نیوز اسلام آباد) چیئرمین پی ٹی آئی بیرسٹر گوہر نے کہا ہے کہ مذاکرات کا وقت ختم، اب وہ ہی ہوگا جو عمران خان ہدایات دیں گے۔ چیئرمین پی ٹی آئی بیرسٹر گوہر نے جوڈیشل کمپلیکس میں میڈیا سے گفتگو کرتے ہوئے کہا کہ کے پی کے میں سینٹ الیکشن خوش اسلوبی کے ساتھ ہوئے ہیں، پی ٹی آئی نے سارے نام پہلے ہی فائنل کر لیے تھے، اس میں ایک نام بھی ایسا نہیں جو بانی پی ٹی آئی کی مشاورت کے بغیر ڈالا گیا ہو، مارچ 2024 میں یہ سارا کچھ فائنل ہو گیا تھا، پھر مخصوص نشستوں کی وجہ سے اس میں بریک اگیا تھا، جب مخصوص نشستوں کا فیصلہ ہوا تو ہم سمجھے کہ ہمیں اتنی سیٹیں اب نہیں ملیں گی جتنی ہماری بنتی ہیں، ہم اتنے کی ہی توقع کر رہے تھے یہ بہتر ہوا ہے۔ بیرسٹر گوہر نے کہا کہ ہمیں چھ سیٹیں ملی ہیں یہ بہترین ہو گیا ہے، نو مئی کے بعد پریس کانفرنس کرنے والے لوگوں کو ٹکٹ دینے کی بات درست نہیں ہے، لوگ مرزا آفریدی کا نام لیتے ہیں جبکہ خود خان صاحب نے ان کا نام فائنل کیا تھا۔ چیئرمین پی ٹی آئی نے کہا کہ مرزا آفریدی نے پارٹی کے خلاف کوئی بیان نہیں دیا، مرزا آفریدی پارٹی بیانیے اور پارٹی مفادات میں ہمیشہ ہمارے ساتھ رہے ہیں، دو سال ہو گئے ہیں اب سختیاں ختم ہونی چاہیے اور پانی پی ٹی آئی سے سب کی ملاقات ہونی چاہیے، بانی پی ٹی آئی سے ملاقات کے حوالے سے عدالتی فیصلے موجود ہیں تاہم ان کی خلاف ورزی کی جا رہی ہے، بانی پی ٹی آئی سے آخری ملاقات بیرسٹر سیف کی ہوئی پھر ان کی بہنوں کی ملاقات ہوئی، اس پر لوگ شکوک و شبہت کرتے ہیں۔ انہوں نے مزید کہا کہ پی ٹی آئی کے لوگوں کو نکالنا نہیں پڑتا، لوگ خود نکلتے ہیں، بانی پی ٹی آئی اس احتجاج کو جیل سے خود لیڈ کریں گے، اب مذاکرات کا وقت ختم ہو گیا ہے، اب جو بھی ہوگا خان صاحب ہدایات دیں گے۔