26/11/2025
ہنزہ کے عوام کے نام سابق سینیئر وزیر کرنل (ر) عبیداللہ بیگ کا الوداعی پیغام
گلگت بلتستان اسمبلی کی آئینی مدت مکمل ہونے پر سابق سینیئر وزیر برائے سوشل ویلفیئر و انڈسٹریز اور رکن گلگت بلتستان اسمبلی حلقہ 6 ہنزہ، کرنل (ر) عبیداللہ بیگ نے اپنے حلقے کے عوام کے نام الوداعی پیغام جاری کیا ہے۔ انہوں نے 15 نومبر 2019 کے عام انتخابات میں ملنے والے اعتماد، محبت اور بھرپور حمایت پر عوامِ ہنزہ کا خصوصی شکریہ ادا کیا۔
اپنے پیغام میں کرنل (ر) عبیداللہ بیگ نے پاکستان تحریک انصاف اور عمران خان کا بھی شکریہ ادا کیا کہ انہوں نے انہیں پارٹی ٹکٹ اور اہم وزارت سونپ کر اعتماد کا اظہار کیا۔ ان کا کہنا تھا کہ انہوں نے پوری دیانتداری کے ساتھ اپنی ذمہ داریاں نبھانے کی کوشش کی اور ہنزہ کی ترقی کو ہمیشہ ترجیح دی۔
سابق وزیر نے پانچ سالہ دورِ حکومت میں منظور شدہ اہم ترقیاتی منصوبوں کا بھی ذکر کیا جن میں شامل ہیں:
54 میگاواٹ عطاآباد ہائیڈرو پاور پراجیکٹ
- گریٹر واٹر سپلائی پراجیکٹ
- 35 بیڈ ڈی ایچ کیو ہسپتال علی آباد
- چپورسن روڈ اور پل جرک شمشال
انہوں نے کہا کہ یہ منصوبے نہ صرف توانائی، پانی اور صحت کے دیرینہ مسائل حل کریں گے بلکہ ہنزہ کی معاشی و سماجی ترقی میں بھی بڑا کردار ادا کریں گے۔
کرنل (ر) عبیداللہ بیگ نے بتایا کہ ان کے دور میں **تقریباً 200 مقامی افراد کو سرکاری ملازمتیں فراہم کی گئیں جبکہ 285 غیر مقامی اہلکاروں کو ہنزہ سے باہر منتقل کرایا گیا۔
علاقائی تنازعات کے حوالے سے انہوں نے کہا کہ ناصرآباد ماربل لیز اور دوئنگ داس کے معاملات پر وہ ہمیشہ عوام کے ساتھ کھڑے رہے اور کبھی اصولی مؤقف سے پیچھے نہیں ہٹے۔
انہوں نے گلگت بلتستان کی گرین ٹورازم پالیسی اور لینڈ ریفارمز بل کے خلاف بھی عوامی مفاد میں آواز اٹھائی۔
جولائی 2023 کے "رجیم چینج" کے دوران پیش آنے والے سیاسی دباؤ کا ذکر کرتے ہوئے انہوں نے کہا کہ انہوں نے نہ جماعت چھوڑی، نہ مؤقف بدلا بلکہ عمران خان اور پاکستان تحریک انصاف کے ساتھ وفاداری نبھائی اور عوام کی نمائندگی کو مقدم رکھا۔ دوسری نشست کے لیے متعدد قراردادیں منظور کروا کر معاملہ جی بی کونسل اور وزیراعظم تک بھی پہنچایا۔
الوداعی پیغام کے اختتام پر کرنل (ر) عبیداللہ بیگ نے عوام سے کسی بھی دانستہ یا نادانستہ کوتاہی پر معذرت کرتے ہوئے کہا کہ عوام کا اعتماد اور دعائیں ان کا سب سے قیمتی سرمایہ ہیں
