Sada e Thal News

09/03/2026

چیف ٹریفک آفیسر کیپٹن (ر) حمزہ ہمایوں نے فیلڈ میں شہریوں کی خدمت، حفاظت اور سہولت کے فرائض انجام دینے والے ٹریفک افسران کے ہمراہ روزہ افطار کیا۔ تمام آفیسرز کی لگن، ذمہ دارانہ رویے اور خدمات کو سراہتے ہوئے ان کے حوصلے کو بڑھایا۔

09/03/2026

*اسرائیل کا ایران سے جنگ ختم کرنے کے طریقے پر غور، واشنگٹن پوسٹ کا دعویٰ*

ایران سرنڈر نہیں کرے گا۔،اسرائیلی حکام نے لامتناہی حملوں پر تشویش کا اظہار کردیا

عالمی معیشت کو مزید نقصان سے بچانے کیلئے ایگزٹ سٹریٹجی پر غور جاری ہے، رپورٹ

09/03/2026

گومل ایلومنائی گیدرنگ اور عید ملن پارٹی کے انعقاد کی تیاریاں

اسلام آباد (نمائندہ خصوصی) — گومل یونیورسٹی کے سابقہ اور موجودہ طلبہ کے درمیان باہمی روابط کو فروغ دینے اور پرانی یادوں کو تازہ کرنے کے لیے عید کے موقع پر ایک گرینڈ گومل ایلومنائی گیدرنگ اور عید ملن پارٹی کے انعقاد کی تیاریاں جاری ہیں۔

اس سلسلے میں گومل ایلومنائی کے ایک وفد نے صدر خٹک ویلفیئر آرگنائزیشن اسلام آباد اور سی ای او سعید انٹرنیشنل ہسپتال جی-11 اسلام آباد، سینئر موسٹ گوملین ڈاکٹر محمد نعمان سعید خٹک سے ملاقات کی۔ وفد میں عاقب حیات خٹک (فارماسسٹ) اور عمیر خٹک (فارماسسٹ) شامل تھے، جنہوں نے گومل ایلومنائی گیدرنگ کے انتظامات اور پروگرام کے حوالے سے تفصیلی تبادلۂ خیال کیا۔

ملاقات کے دوران ڈاکٹر محمد نعمان سعید خٹک نے گومل یونیورسٹی کے سینئر اور جونیئر طلبہ کی اس کاوش کو سراہتے ہوئے اسے ایک مثبت اور قابلِ تحسین اقدام قرار دیا۔ انہوں نے کہا کہ گومل یونیورسٹی کے تمام سابقہ اور موجودہ طلبہ ایک خاندان کی مانند ہیں اور ان کی خدمت و رہنمائی کے لیے وہ ہر وقت حاضر ہیں۔

ڈاکٹر نعمان سعید خٹک نے پروگرام کے انعقاد کے حوالے سے مفید تجاویز بھی پیش کیں اور اس میگا ایونٹ کے لیے خصوصی مالی تعاون (ڈونیشن) کا اعلان بھی کیا۔ اس موقع پر گوملین وفد نے ڈاکٹر صاحب کی مہمان نوازی اور تعاون پر ان کا شکریہ ادا کیا۔

گومل ایلومنائی گیدرنگ کے انتظامات میں عاقب حیات خٹک اور عمیر خٹک بطور آرگنائزر اہم کردار ادا کر رہے ہیں اور اس میگا ایونٹ کو کامیاب بنانے کے لیے سرگرم عمل ہیں۔

گومل ایلومنائی کی جانب سے تمام سینئرز اور جونیئرز کو کھلے دل سے دعوت دی گئی ہے کہ وہ اس پروگرام میں شرکت کریں اور اس کو کامیاب بنانے میں اپنا کردار ادا کریں۔ انتظامیہ کے مطابق جلد ہی پروگرام کی تاریخ اور دیگر تفصیلات کا باضابطہ اعلان کیا جائے گا۔

09/03/2026

اسلام آباد پولیس کے عید خریداری کے لیے مارکیٹس اور تجارتی مراکز میں فول پروف سکیورٹی انتظامات۔

تجارتی مراکز اور مارکیٹس میں شہریوں کی سہولت کے لیے 1000 سے زائد افسران و جوان تعینات کئے گئے ہیں جبکہ عید شاپنگ کے پیشِ نظر بازاروں اور شاپنگ سنٹرز میں پولیس کی اضافی نفری بھی تعینات ہے۔

شہریوں کے تحفظ کو یقینی بنانے کے لیے مارکیٹس میں پیدل گشت اور ڈولفن فورس کی پٹرولنگ میں اضافہ کیا گیا ہے جبکہ خواتین کو محفوظ ماحول فراہم کرنے کے لیے لیڈیز پولیس افسران بھی فیلڈ میں تعینات ہیں، ڈی آئی جی اسلام آباد۔

ٹریفک کی روانی برقرار رکھنے کے لیے ٹریفک پولیس کے افسران اہم شاہراہوں اور مارکیٹس میں موجود رہیں گے جبکہ سیف سٹی کیمروں کے ذریعے مارکیٹس اور تجارتی مراکز کی مسلسل نگرانی بھی جاری رہے گی۔

تمام سینئر پولیس افسران مارکیٹس میں سکیورٹی انتظامات کی بذاتِ خود نگرانی کریں گے، اسلام آباد پولیس عید خریداری کے دوران شہریوں کو محفوظ ماحول فراہم کرنے کے لیے پُرعزم ہے۔

مارکیٹس میں موجود پیشہ ور بھکاریوں کی حوصلہ شکنی کریں، عید شاپنگ کے دوران سکیورٹی اور سہولت کی فراہمی کے لیے اسلام آباد پولیس ہر لمحہ فیلڈ میں متحرک ہے، شہریوں کے جان و مال کی حفاظت اسلام آباد پولیس کی اولین ترجیح ہے، ڈی آئی جی اسلام آباد محمد جواد طارق۔

02/03/2026

امریکا نے ایران پر خطرناک ٹوما ہاک میزائل برسانے شروع کر دیے

̇ran

01/03/2026

25/02/2026

رمضان پیکج اور اصل مستحقین کا سوال — کرک کے ایک مزدور کی فریاد

رمضان المبارک رحمتوں، برکتوں اور ایثار کا مہینہ ہے۔ یہی وہ وقت ہوتا ہے جب حکومتیں، سیاسی جماعتیں اور مخیر حضرات غریب اور نادار خاندانوں کی مدد کے لیے خصوصی پیکجز اور راشن اسکیمیں شروع کرتے ہیں تاکہ کسی غریب کے گھر کا چولہا بجھنے نہ پائے۔ لیکن اگر یہی امداد مستحق لوگوں تک نہ پہنچے اور سفارشی نظام یا ذاتی تعلقات کی نذر ہو جائے تو پھر یہ فلاحی اقدام اپنے اصل مقصد سے محروم ہو جاتا ہے۔

ضلع کرک کے علاقے شنوا گڈی خیل کا رہائشی رحمت اللہ جان اسی تلخ حقیقت کی ایک مثال ہے۔ پیشے کے لحاظ سے وہ ایک مزدور ہے اور دن بھر کی محنت کے بعد بھی اس کے گھر میں بنیادی ضروریات پوری کرنا مشکل ہو چکا ہے۔ اس کی ایک بیٹی معذور ہے، ایک بھائی بھی معذوری کا شکار ہے، جبکہ اس کی والدہ بیوہ ہیں۔ ایسے حالات میں یہ خاندان یقیناً ہر فلاحی پیکج کا سب سے پہلا حق دار ہونا چاہیے۔ مگر افسوس کہ رمضان پیکج کے لیے نہ تو اس سے فارم جمع کیا گیا اور نہ ہی کسی نے اسے اطلاع دی کہ وہ اپنی درخواست جمع کروائے۔

رحمت اللہ جان کا سوال سادہ مگر تکلیف دہ ہے: کیا فلاحی پیکج صرف مخصوص لوگوں تک محدود رہیں گے؟ کیا مستحقین کے دروازوں تک پہنچنے کی ذمہ داری صرف کاغذوں میں ہے؟ اس نے اپنے حلقے کے منتخب نمائندوں، ایم پی اے اور ایم این اے سے اپیل کی ہے کہ اس معاملے کا نوٹس لیا جائے اور اس ناانصافی کا ازالہ کیا جائے۔ اس کا کہنا ہے کہ اگر فارم واقعی غریبوں کے لیے ہیں تو انہیں غریبوں کے گھروں تک پہنچایا جانا چاہیے، نہ کہ صرف جان پہچان والوں تک۔

یہ معاملہ صرف ایک شخص کا نہیں بلکہ ایک نظام کا سوال ہے۔ اگر کسی علاقے میں ورکرز کو ذمہ داری دی گئی ہے کہ وہ مستحق خاندانوں تک جا کر فارم جمع کریں، تو پھر یہ ذمہ داری پوری دیانت داری سے ادا ہونی چاہیے۔ اگر کسی مستحق کے دروازے تک کوئی نہ پہنچے اور اس کا نام فہرستوں میں شامل نہ ہو تو یہ انتظامی کمزوری نہیں بلکہ اخلاقی ناکامی بھی ہے۔

کرک میں پاکستان تحریک انصاف کی مقامی قیادت اور ورکرز کے لیے بھی یہ لمحۂ فکریہ ہے۔ اگر واقعی مقصد عوامی خدمت ہے تو رمضان پیکج صرف حقیقی غریبوں کو ملنا چاہیے، نہ کہ رشتہ داروں، دوستوں یا “اپنوں” کو۔ فلاحی سکیموں کو “ماما، چچا” کی بنیاد پر تقسیم کرنا انصاف کے اصولوں کے خلاف ہے اور اس سے عوام کا اعتماد مجروح ہوتا ہے۔ سیاست کا اصل امتحان اقتدار میں نہیں بلکہ کمزور کے ساتھ کھڑے ہونے میں ہوتا ہے۔

حکام بالا کو چاہیے کہ:
– مستحقین کی شفاف اور باقاعدہ فہرست مرتب کی جائے۔
– مقامی سطح پر نگرانی کا مؤثر نظام بنایا جائے۔
– شکایات درج کروانے کے لیے واضح طریقہ کار متعارف کرایا جائے۔
– اور اگر کسی سطح پر جانبداری یا ناانصافی ثابت ہو تو فوری کارروائی کی جائے۔

رمضان کا اصل پیغام انصاف، مساوات اور انسانیت ہے۔ اگر فلاحی پیکج حقیقی مستحقین تک نہیں پہنچتے تو یہ نہ صرف انتظامی ناکامی ہے بلکہ روحِ رمضان کے بھی خلاف ہے۔ رحمت اللہ جان جیسے خاندانوں تک پہنچنا صرف حکومتی ذمہ داری نہیں بلکہ اجتماعی اخلاقی فرض بھی ہے۔

اگر میرٹ پر کام ہوگا تو نہ صرف عوام کا اعتماد بحال ہوگا بلکہ واقعی یہ محسوس ہوگا کہ ریاست اور اس کے نمائندے کمزور کے ساتھ کھڑے ہیں۔ اور یہی کسی بھی جمہوری اور فلاحی نظام کی اصل کامیابی ہے۔