09/07/2025
رہنماء پاکستان تحریک انصاف آزاد کشمیر و اپوزیشن لیڈر آزاد کشمیر قانون ساز اسمبلی خواجہ فاروق احمد نے آمدہ انتخابات میں مسلم لیگ ن کی جانب سے مہاجرین کی پنجاب میں موجود 10 نشستوں پر ن لیگ کے ٹکٹ ہولڈرز کے نام فائنل کرنے کی وفاقی مشیر رانا ثناء اللہ کی مسلم لیگ ن آزاد کشمیر کے صدر شاہ غلام قادر اور سابق وزیر مشتاق منہاس کو دی گئی ہدایت کی شدید مذمت کرتے ہوئے کہا کہ اگر رانا ثناء اللہ یہ سمجھتے ہیں کہ وہ وفاقی حکومت کی مدد سے آمدہ انتخابات میں مہاجرین کی پنجاب میں 10 نشستیں مسلم لیگ ن آزاد کشمیر کو تحفہ میں دیں گے تو انہیں اپنی پی ڈی ایم کی حکومت جس کے وزیراعظم شہباز شریف تھے، وزیر داخلہ محسن نقوی تھے کی موجودگی میں 8 فروری کے انتخابات کو یاد رکھ لینا چاہیے۔
خواجہ فاروق احمد نے کہا کہ اگر اس وقت پورے پنجاب سے مسلم لیگ ن کو نیشنل اسمبلی کی صرف 17 نشستیں ملی ہیں تو اب وہ کس طرح آزاد کشمیر کی مہاجرین کی نشستوں پر سیاسی ڈاکہ ماریں گے؟ یہ پری الیکشن دھاندلی ہے۔ مسلم لیگ ن کے صدر شاہ غلام قادر کو فوری طورپر رانا ثناء اللہ کی اس پریس کانفرنس میں کئے گئے دعویٰ سے لاتعلقی کر لینی چاہئیے ورنہ یہ سمجھنے میں آزاد کشمیر کے عوام حق بجانب ہوں گے کہ آزاد کشمیر میں مسلم لیگ ن نے بھی دھاندلی کی بنیاد رکھوا دی ہے جسے کسی قیمت پر بھی کامیاب نہیں ہونے دیا جائے گا۔
خواجہ فاروق احمد نے کہا کہ آزاد کشمیر میں اس وقت ہزاروں کی تعداد میں یہ حلقہ انتخاب میں ایسا نوجوان ووٹر موجود ہے جو صرف اور صرف عمران خان کا ووٹر ہے اور یہی خاموش ووٹر آزاد کشمیر کے انتخابات میں مسلم لیگ ن اور پی پی پی دونوں کو تگنی کا ناچ نچائے گا اور آزاد کشمیر میں پھر ایک بار عمران خان کا ووٹر پی ٹی آئی کو کامیاب کرائے گا۔ رانا ثناء اللہ نے جو بڑھک آج ماری ہے اسے بھی بھرپور جواب مل جائے گا۔ فارم 47 کی طرح آزادکشمیر میں حکومت نہیں بننے دی جائے گی۔
Khawaja Farooq Ahmed
