19/07/2026
اسلام آباد ( نیوز لائن )
الخدمت رازی ہسپتال CBR ٹاؤن اسلام آباد میں جدید بلڈ بینک کا افتتاح مرکزی تنظیم تاجران پاکستان کے صدر محمد کاشف چوہدری نے کیا۔ ہسپتال کے میڈیکل ڈائریکٹر ڈاکٹر طاہر فاروق نے کہا کہ الخدمت رازی ہسپتال دکھی انسانیت کی خدمت کے جذبے سے جدید طبی سہولیات فراہم کر رہا ہے۔ انہوں نے ہسپتال میں دستیاب علاج معالجہ، تشخیص، ایمرجنسی، لیبارٹری اور دیگر طبی سہولیات پر روشنی ڈالتے ہوئے کہا کہ مستحق اور نادار مریضوں کو معیاری اور بہترین طبی خدمات کی فراہمی ادارے کی اولین ترجیح ہے۔
انہوں نے کہا کہ نئے بلڈ بینک کے قیام سے مریضوں کو بروقت اور محفوظ خون کی فراہمی میں نمایاں بہتری آئے گی۔ مہمانِ خصوصی محمد کاشف چوہدری نے اپنے خطاب میں الخدمت رازی ہسپتال کی خدمات کو سراہتے ہوئے کہا کہ یہ ادارہ عوامی خدمت کے ذریعے درحقیقت ریاستِ پاکستان کی ایک اہم ذمہ داری ادا کر رہا ہے۔ انہوں نے کہا کہ حکومت کو چاہیے کہ ایسے فلاحی اداروں کی ہر ممکن سرپرستی اور معاونت کرے جو بلا امتیاز انسانیت کی خدمت میں مصروف ہیں، تاکہ زیادہ سے زیادہ مستحق افراد معیاری طبی سہولیات سے مستفید ہو سکیں۔
چیف فنانس منیجر عنایت اللہ نے ہسپتال کی سالانہ کارکردگی رپورٹ پیش کی، جس میں طبی خدمات، فلاحی منصوبوں اور مستقبل کے ترقیاتی پروگراموں پر تفصیلی روشنی ڈالی گئی۔
افتتاحی تقریب میں اسلام آباد کے نائب امیر جماعت اسلامی ملک عبدالعزیز، جماعت اسلامی کے رہنما مرزا خالد اور منیجر ایڈمن عثمان سعید سمیت مختلف شعبہ ہائے زندگی سے تعلق رکھنے والی ممتاز شخصیات نے شرکت کی۔ تقریب کے اختتام پر پیشنٹ ویلفیئر آفیسر سید اسماعیل شاہ نے تمام معززین کا شکریہ ادا کیا۔
