16/10/2025
سٹی فارما لمیٹڈ، جو پاکستان کی نمایاں فارماسوٹیکل کمپنیوں میں سے ایک ہے، نے جمعرات کو عراق میں نئی دوا سازی کی فیکٹری قائم کرنے کے حوالے سے گردش کرنے والی خبروں کی سختی سے تردید کی۔
کمپنی نے پاکستان اسٹاک ایکسچینج (پی ایس ایکس) کو ارسال کردہ نوٹس میں کہا کہ سوشل میڈیا پر اس حوالے سے پھیلائی جانے والی رپورٹس غلط اور گمراہ کن ہیں۔
نوٹس میں مزید وضاحت کی گئی کہ حال ہی میں عراق ایکسپو میں شرکت کے بعد مختلف اسٹیک ہولڈرز کے ساتھ ابتدائی سطح پر بات چیت کی گئی تھی، تاہم اس سے کوئی باضابطہ فیصلہ یا معاہدہ وجود میں نہیں آیا۔
کمپنی نے واضح کیا کہ عراقی مارکیٹ میں آپریشن شروع کرنے یا کوئی کاروبار قائم کرنے کے حوالے سے کوئی باضابطہ فیصلہ، معاہدہ یا وعدہ نہیں کیا گیا ہے۔
سٹی فارما نے متعلقہ پلیٹ فارمز سے درخواست کی ہے کہ وہ ان پوسٹس کو فوری طور پر ہٹائیں تاکہ غلط معلومات کے پھیلاؤ کو روکا جا سکے۔
کمپنی نے اس بات پر زور دیا کہ وہ شفافیت برقرار رکھنے اور شیئر ہولڈرز و عوام کو بروقت درست معلومات فراہم کرنے کے لیے پوری طرح پابند ہے، جیسا کہ متعلقہ قوانین کے تحت ضروری ہے۔
