28/12/2025
اٹلی پاکستانیوں کیلئے نوکریوں میں کوٹہ الاٹ کرنے والا پہلا یورپی ملک بن گیا
اٹلی نے پاکستان کو آئندہ تین سال کے لیے 10 ہزار 500 ملازمتوں کا کوٹہ الاٹ کر دیا ہے۔ ترجمان وزارتِ اوورسیز پاکستانیز کے مطابق پاکستان اٹلی سے یہ اہم کوٹہ حاصل کرنے میں کامیاب ہو گیا ہے، جس کے بعد اٹلی یورپ کا پہلا ملک بن گیا ہے جس نے پاکستان کے لیے باقاعدہ نوکریوں کا کوٹہ مقرر کیا۔
ترجمان نے بتایا کہ اس معاہدے کے تحت ہر سال 3 ہزار 500 پاکستانی اٹلی جا کر روزگار حاصل کریں گے۔ ان میں 1500 افراد سیزنل جبکہ 2000 افراد نان سیزنل کوٹے کے تحت اٹلی جائیں گے۔ یہ مواقع مختلف شعبوں میں فراہم کیے گئے ہیں جن میں شپ بریکنگ، ہیلتھ کیئر اور زراعت شامل ہیں۔
وزارتِ اوورسیز کے مطابق پاکستانی ہنرمند اور نیم ہنرمند ورکرز کے لیے بھی اٹلی میں وسیع مواقع موجود ہیں۔ ان میں ویلڈرز، ٹیکنیشنز، شیف، ویٹرز اور ہاؤس کیپنگ کے شعبے شامل ہیں، جبکہ نرسنگ، میڈیکل ٹیکنیشن، فارمنگ اور کاشتکاری کے میدانوں میں بھی روزگار کے مواقع دستیاب ہوں گے۔
ترجمان کا کہنا ہے کہ پاکستان اور اٹلی کے درمیان جوائنٹ ورکنگ گروپ کا دوسرا اجلاس فروری میں اسلام آباد میں منعقد ہوگا، جس میں مزید پیش رفت متوقع ہے۔
وفاقی وزیر برائے اوورسیز پاکستانیز چوہدری سالک حسین نے اس پیش رفت کو پاکستان کے لیے ایک اہم سنگِ میل قرار دیتے ہوئے کہا کہ اس فیصلے سے اٹلی میں پاکستانی ورک فورس کے لیے روزگار کے نئے دروازے کھلیں گے اور مستقبل میں یورپ کے مزید ممالک بھی پاکستانی محنت کشوں کے لیے مواقع فراہم کریں گے۔
انہوں نے مزید کہا کہ حکومتِ پاکستان اپنے شہریوں کو بین الاقوامی سطح پر باعزت روزگار فراہم کرنے کے لیے مسلسل کوششیں کر رہی ہے، جبکہ اوورسیز پاکستانی دنیا بھر میں پاکستان کے سفیر اور ملکی معیشت کی ریڑھ کی ہڈی ہیں۔
