07/10/2025
نوائےجوہرنیوز نیٹ ورک
جوہرآباد ۔۔۔۔۔۔ وزیراعلی پنجاب مریم نواز شریف کی خصوصی ہدایت پر صوبے کے چھوٹے شہروں میں جدید اور ماحول دوست پبلک ٹرانسپورٹ سسٹم متعارف کرانے کے منصوبے کے تحت خوشاب کے عوام کے لیے 24 الیکٹرک بسوں کا منصوبہ مکمل کر لیا گیا ہے۔ وزیراعلی پنجاب رواں ماہ کے آخر میں خوشاب میں اس منصوبے کا باقاعدہ افتتاح خود کریں گی۔اس منصوبے کے تحت شہر کے اہم مقامات، تعلیمی اداروں، سرکاری دفاتر، اسپتالوں اور رہائشی علاقوں کو آپس میں منسلک کرنے کے لیے متعدد روٹس تجویز کیے گئے ہیں تاکہ شہریوں کو سستی، آرام دہ اور محفوظ سفری سہولت فراہم کی جا سکے۔ ڈپٹی کمشنر خوشاب فروا عامر نے آج سیکرٹری ریجنل ٹرانسپورٹ اتھارٹی (آر ٹی اے) ملک محمد طاہر کے ہمراہ مجوزہ سائٹ کا دورہ کیا، جہاں سے الیکٹرک بس سروس کا آغاز کیا جائے گا۔ اس موقع پر بسوں کے پارکنگ یارڈ، چارجنگ اسٹیشنز اور سہولتی مراکز کے قیام کے لیے مختلف مقامات کا تفصیلی جائزہ لیا گیا۔سیکرٹری آر ٹی اے نے ڈپٹی کمشنر کو منصوبے کی تکنیکی تفصیلات پر بریفنگ دی۔ انہوں نے بتایا کہ بسوں کے لیے جدید چارجنگ انفراسٹرکچر، کنٹرول روم اور مانیٹرنگ سسٹم قائم کیا جائے گا تاکہ سروس کا معیار اور کارکردگی برقرار رکھی جا سکے۔ ڈپٹی کمشنر خوشاب نے موقع پر متعلقہ محکموں کے افسران کو ہدایت کی کہ تمام ترقیاتی کام اور ضروری تنصیبات جلد از جلد مکمل کی جائیں۔ انہوں نے کہا کہ وزیراعلی پنجاب کا وژن ہے کہ صوبے کے تمام اضلاع میں شہریوں کو جدید سہولیات فراہم کی جائیں اور پبلک ٹرانسپورٹ کو ماحول دوست نظام میں تبدیل کیا جائے۔ انہوں نے مزید کہا کہ الیکٹرک بس سروس کے آغاز سے خوشاب میں ماحولیاتی آلودگی میں نمایاں کمی آئے گی، ایندھن کی بچت ہوگی اور عام شہریوں کو آرام دہ اور معیاری سفری سہولت حاصل ہوگی۔ یہ منصوبہ خوشاب کی ترقی میں ایک نیا باب ثابت ہوگا۔
