08/05/2026
پریس ریلیز
حب: ضلعی انتظامیہ حب نے غیر قانونی اسپیکٹرم سرگرمیوں اور چھالیہ (اریقہ نٹ) کی غیر قانونی ترسیل و ذخیرہ اندوزی کے خلاف 05 مئی 2026 کی شب سب ڈویژن دریجی میں ایک مؤثر اور مربوط کارروائی انجام دی۔ یہ آپریشن اسسٹنٹ کمشنر دریجی جناب رضوان قادر (PAS) کی نگرانی میں پولیس کے تعاون سے کامیابی کے ساتھ مکمل کیا گیا۔
کارروائی کے دوران دو ٹرک (نمبر TAC-997 اور TTD-274) کو روک کر بڑی مقدار میں چھالیہ برآمد کی گئی، جو گٹکا/ماوا کی تیاری میں استعمال ہوتی ہے۔ دشوار گزار حالات کے باعث ایک ٹرک (TTD-274) الٹ گیا، تاہم ٹیم نے پیشہ ورانہ مہارت، بروقت حکمت عملی اور جرات کا مظاہرہ کرتے ہوئے تمام ضبط شدہ مال کو محفوظ بنایا اور تین مزدا گاڑیوں کے ذریعے منتقل کیا۔
یہ آپریشن تقریباً 36 گھنٹے جاری رہا، جس کے دوران 150 کلومیٹر سے زائد علاقہ کور کیا گیا۔ برآمد شدہ 48,570 کلوگرام چھالیہ اور ایک گاڑی (TAC-997) کو قانونی کارروائی کے لیے کسٹمز انفورسمنٹ گڈانی کے حوالے کر دیا گیا، جبکہ الٹی گاڑی پولیس کی تحویل میں ہے۔ کارروائی کے دوران ایک پولیس اہلکار معمولی زخمی ہوا جبکہ دیگر تمام اہلکار محفوظ رہے۔
ضلعی انتظامیہ نے واضح کیا ہے کہ ایسے غیر قانونی نیٹ ورکس کے خلاف بلا امتیاز کارروائیاں جاری رہیں گی۔ یہ اقدامات حکومت کی “ہارڈن دی اسٹیٹ”، انسداد دہشت گردی اور غیر قانونی سرگرمیوں کے خاتمے کی جامع پالیسی کا حصہ ہیں۔
ڈپٹی کمشنر حب نے اس کامیاب کارروائی میں کسٹمز انفورسمنٹ گڈانی اور پولیس کے بھرپور تعاون کو سراہتے ہوئے اسسٹنٹ کمشنر دریجی کی پیشہ ورانہ صلاحیتوں، جرات اور قیادت کو قابلِ تحسین قرار دیا ہے اور ان کے لیے سرکاری سطح پر تعریفی اقدام کی سفارش کی ہے۔
