Media News Agency

28/05/2026

28/05/2026

وزیراعلیٰ پنجاب مریم نواز شریف کے ویژن “ستھرا پنجاب” کے تحت کہوٹہ میں مثالی صفائی مہم
کہوٹہ (ندیم آزاد) وزیراعلیٰ پنجاب مریم نواز شریف کے ویژن “ستھرا پنجاب” کے تحت عیدالاضحیٰ کے موقع پر پہلے دن تحصیل کہوٹہ میں صفائی ستھرائی کی مثالی مہم کامیابی سے مکمل کر لی گئی۔
اسسٹنٹ کمشنر کہوٹہ شریں گل اور چیف آفیسر میونسپل کمیٹی کہوٹہ عمیر سلطان کی خصوصی ہدایات پر جنرل منیجر CTDS JV شعیب رانا اور آپریشن منیجر CTDS JV وقار کیانی نے صفائی آپریشن کی بھرپور نگرانی کی۔ تحصیل بھر میں 453 ورکرز اور 83 مختلف گاڑیوں پر مشتمل عملے نے عیدالاضحیٰ کے دوران صفائی کے بہترین انتظامات یقینی بنائے۔
قربانی کے بعد شہر کہوٹہ میں قائم مرکزی کیمپ پر آلائشیں جمع کی گئیں جہاں سینئر سینیٹری سپروائزر طالب حسین بھٹی کی زیر نگرانی ہیوی مشینری کے ذریعے آلائشوں کو ڈمپنگ پوائنٹس تک منتقل کیا گیا۔ بعد ازاں عارضی طور پر قائم مرکزی کیمپ اور اطراف کے علاقوں کو صاف پانی سے دھو کر جراثیم کش ادویات کا اسپرے بھی کیا گیا تاکہ ماحول کو صاف اور صحت مند رکھا جا سکے۔
اہلِ علاقہ نے عیدالاضحیٰ کے موقع پر بہترین صفائی انتظامات پر وزیراعلیٰ پنجاب مریم نواز شریف کے ویژن “ستھرا پنجاب” کو سراہتے ہوئے راولپنڈی ویسٹ مینجمنٹ کمپنی کے افسران اور ملازمین کو خراجِ تحسین پیش کیا۔

27/05/2026

کہوٹہ (ندیم آزاد) عیدالاضحیٰ کے پہلے روز اسسٹنٹ کمشنر کہوٹہ شریں گل نے تحصیل ہیڈ کوارٹر ہسپتال کہوٹہ کا تفصیلی دورہ کیا اور زیرِ علاج مریضوں کی عیادت کرتے ہوئے ان میں تحائف تقسیم کیے۔ اس موقع پر مریضوں اور ان کے لواحقین نے ضلعی انتظامیہ کے اس ہمدردانہ اقدام کو سراہتے ہوئے خوشی کا اظہار کیا۔
تفصیلات کے مطابق اسسٹنٹ کمشنر شریں گل نے ہسپتال کے مختلف وارڈز کا معائنہ کیا، مریضوں کی خیریت دریافت کی اور ان کی جلد صحت یابی کے لیے نیک تمناؤں کا اظہار کیا۔ انہوں نے مریضوں سے فرداً فرداً ملاقات کی اور انہیں عید کی خوشیوں میں شریک کرنے کے لیے تحائف بھی پیش کیے۔
دورے کے دوران اسسٹنٹ کمشنر نے ہسپتال میں فراہم کی جانے والی طبی سہولیات، ادویات کی دستیابی اور صفائی ستھرائی کے انتظامات کا بھی جائزہ لیا۔ انہوں نے ہسپتال انتظامیہ، ڈاکٹرز اور پیرامیڈیکل اسٹاف کی کارکردگی کو اطمینان بخش قرار دیتے ہوئے کہا کہ دکھی انسانیت کی خدمت ضلعی انتظامیہ کی اولین ترجیح ہے۔
اسسٹنٹ کمشنر شریں گل کا کہنا تھا کہ عوام کو تحصیل ہیڈ کوارٹر ہسپتال میں بہترین اور معیاری طبی سہولیات کی فراہمی کے لیے تمام دستیاب وسائل بروئے کار لائے جا رہے ہیں جبکہ ہسپتال کے معیار کو مزید بہتر بنانے کے لیے عملی اقدامات جاری رہیں گے۔

26/05/2026

کہوٹہ کی مشہور و معروف سیاسی و سماجی شخصیت ڈاکٹر محمد عارف قریشی کا اہلیان اسلام کا عیدالاضحیٰ کے پرمسرت موقع پر اہم پیغام

26/05/2026

کہوٹہ (ندیم آزاد) عیدالاضحیٰ کے موقع پر وزیراعلیٰ پنجاب مریم نواز شریف کی خصوصی ہدایات پر تحصیل کہوٹہ میں تمام قبرستانوں کی صفائی ستھرائی کے لیے خصوصی ٹیمیں تشکیل دے دی گئیں۔ شہریوں کو صاف ستھرا ماحول فراہم کرنے اور قبرستانوں میں بہترین انتظامات یقینی بنانے کے لیے راولپنڈی ویسٹ منیجمنٹ کمپنی اور میونسپل کمیٹی کہوٹہ کی جانب سے بھرپور اقدامات جاری ہیں۔
اسی سلسلے میں کہوٹہ کے قدیمی قبرستان حضرت سخی سبزاوری بادشاہ میں صفائی ستھرائی کے مثالی انتظامات کیے گئے جہاں قبرستان کی صفائی، گھاس کی کٹائی اور جڑی بوٹیوں کی بروقت تلفی کے خصوصی اقدامات کیے گئے۔ قبرستان انتظامیہ نے راولپنڈی ویسٹ منیجمنٹ کمپنی اور سینئر سینیٹری سپروائزر میونسپل کمیٹی کہوٹہ طالب حسین بھٹی کی خدمات کو سراہتے ہوئے انہیں خراجِ تحسین پیش کیا۔
اس موقع پر قبرستان انتظامیہ کی جانب سے طالب حسین بھٹی کو بہترین کارکردگی پر ٹرافی بھی پیش کی گئی۔ شہریوں نے صفائی کے مؤثر انتظامات پر اطمینان کا اظہار کرتے ہوئے کہا کہ عیدالاضحیٰ کے موقع پر قبرستانوں میں صفائی کے بہترین انتظامات قابلِ ستائش ہیں۔

26/05/2026

جنگلات کو آگ اور ٹمبر مافیا سے بچانے کیلئے آگاہی پروگرام، اہم شخصیات کی شرکت
کہوٹہ: زولفقار علی ستی اور ندیم آزاد کی رپورٹ کے مطابق تحصیل کہوٹہ کی یونین کونسل پنجاڑ کے نواحی علاقہ ککوئ نا گلہ میں جنگلات کو فائر سیزن کے دوران آتشزدگی اور ٹمبر مافیا سے محفوظ رکھنے سمیت شجرکاری مہم کے سلسلہ میں ایک اہم آگاہی پروگرام منعقد کیا گیا۔ پروگرام میں تحصیل کہوٹہ کی سیاسی، سماجی اور صحافتی شخصیات نے بھرپور شرکت کی۔
تقریب میں پاکستان مسلم لیگ ن کے سٹی صدر ڈاکٹر محمد عارف قریشی، رہنما پاکستان پیپلز پارٹی و چیئرمین ربانی قریشی ویلفیئر فاؤنڈیشن آصف ربانی قریشی، ریٹائرڈ بریگیڈیئر جاوید احمد ستی، سابق کونسلر میونسپل کمیٹی کہوٹہ راجہ فیصل عزیز اور سینئر ممبر پریس کلب کہوٹہ ذوالفقار ستی سمیت دیگر معززین شریک ہوئے۔
اس موقع پر مقررین نے کہا کہ فائر سیزن میں جنگلات کو آگ سے بچانے کیلئے خصوصی حکمت عملی اپنانا وقت کی اہم ضرورت ہے۔ انہوں نے زور دیا کہ ٹمبر مافیا کی جانب سے جنگلات کی بے دریغ کٹائی اور قیمتی درختوں کی اسمگلنگ کے خلاف فوری اور سخت کارروائی عمل میں لائی جائے تاکہ قدرتی وسائل کا تحفظ یقینی بنایا جا سکے۔
شرکاء نے اس امر پر بھی مشاورت کی کہ جنگلات سے بازیاب ہونے والی لکڑی کو محفوظ بنانے کیلئے اسے مین روڈ تک منتقل کرنے اور مناسب حفاظتی اقدامات کرنے کی ضرورت ہے تاکہ آتشزدگی کے دوران نقصان سے بچا جا سکے۔
مقررین نے محکمہ جنگلات اور گزارا حکام پر زور دیا کہ وہ اپنی ذمہ داریاں احسن انداز میں سرانجام دیں اور جنگلات کے تحفظ کیلئے موثر اقدامات کریں تاکہ پاکستان کے خوبصورت اور قیمتی قدرتی اثاثے کو محفوظ بنایا جا سکے۔

26/05/2026

گرمی کی شدت میں اضافہ ہوتے ہی کہوٹہ کے شہریوں نے گنے کے رس کی دکانوں کا رخ کر لیا، جہاں ادرک، پودینہ اور لیموں سے تیار کردہ ٹھنڈا اور تازہ گنے کا رس نہ صرف ذائقے میں منفرد ہے بلکہ شدید گرمی میں پیاس بجھانے کا بہترین ذریعہ بھی بن گیا ہے۔ شہری بڑی تعداد میں گنے کے رس کے اسٹالز پر پہنچ رہے ہیں اور موسم کی تپش سے بچنے کیلئے قدرتی مشروبات کو ترجیح دے رہے ہیں۔ مزید تفصیلات جانیے کہوٹہ سے ندیم آزاد کی اس رپورٹ میں

25/05/2026

حکومت پنجاب کی خصوصی ہدایات پر کہوٹہ میں عیدالاضحیٰ کے لئے غیر معمولی صفائی انتظامات مکمل

کہوٹہ (ندیم آزاد ) وزیراعلیٰ پنجاب محترمہ مریم نواز شریف کے ویژن "ستھرا پنجاب" کے تحت عیدالاضحیٰ 2026 کے موقع پر حکومت پنجاب کی خصوصی ہدایات پر صفائی و ستھرائی کے انتظامات کو حتمی شکل دے دی گئی ہے۔
اسسٹنٹ کمشنر کہوٹہ شریں گل اور چیف آفیسر میونسپل کمیٹی کہوٹہ عمیر سلطان کی نگرانی میں ایک جامع پلان مرتب کیا گیا ہے، جس کے تحت تحصیل کہوٹہ میں 453 ورکرز پر مشتمل ٹیم جدید ترین 83 مختلف ہیوی مشینری سے لیس ہو کر اپنی خدمات انجام دے گی۔
سالڈ ویسٹ مینجمنٹ کمپنی CTDS JV پرائیویٹ لمیٹڈ کی جانب سے تحصیل کہوٹہ کے تمام علاقوں میں قربانی کے جانوروں کی آلائشوں کو مخصوص ویسٹ بیگز میں ڈال کر بروقت اور محفوظ طریقے سے ٹھکانے لگانے کے لیے تین شفٹوں (صبح، دوپہر، شام) میں صفائی کا مکمل پلان تیار کر لیا گیا ہے۔
ذمہ داران کی تفصیل درج ذیل ہے:
جنرل منیجر CTDS JV شعیب رانا، اپریشن منیجر CTDS JV تحصیل کہوٹہ: وقار کیانی
سپروائزر CTDS JV حافظ منور، اویس، کامران، زکریا، حارث، ثاقب، حبیب اللہ، وقاص، زوہیب،اکرام،کامران صدیق،عقیل عباس اور معین یونین کونسلز (مٹور، بیور، نارہ، لہڑی، پنجاڑ، نڑھ،ہوتھلہ ،کھڈیوٹ ،دکھالی،دوبیرن خورد، مواڑہ)
جبکہ کہوٹہ سٹی میں سپروائزر ندیم، تصدق،عبید، ساغر اور عدنان شامل ہیں جنرل سپروائزر میونسپل کمیٹی یونین کونسل کہوٹہ: طالب حسین بھٹی
یہ تمام ذمہ داران تین روزہ خصوصی صفائی پلان کے تحت سنتِ ابراہیمی کی ادائیگی کے بعد پیدا ہونے والے فضلے کو مناسب انداز میں ٹھکانے لگانے کے لئے کوشاں ہوں گے، تاکہ تحصیل کہوٹہ کے شہریوں کو ایک صاف، محفوظ اور خوشگوار ماحول فراہم کیا جا سکے۔

25/05/2026

کہوٹہ (ندیم آزاد) حکومت پنجاب کے “ستھرا پنجاب” پروگرام کے تحت عیدالاضحیٰ کے موقع پر صفائی ستھرائی کے خصوصی انتظامات کو حتمی شکل دے دی گئی۔ آلائشوں کو بروقت اور محفوظ طریقے سے ٹھکانے لگانے کے لیے راولپنڈی ویسٹ مینجمنٹ کمپنی کی جانب سے کہوٹہ شہر میں ویسٹ بیگز تقسیم کیے گئے۔
تفصیلات کے مطابق جنرل منیجر شعیب رانا اور آپریشن منیجر وقار کیانی کی ہدایات پر جنرل سینیٹری سپروائزر میونسپل کمیٹی کہوٹہ طالب حسین بھٹی نے مختلف علاقوں میں شہریوں میں ویسٹ بیگز تقسیم کیے۔ اس موقع پر شہریوں کو ہدایت کی گئی کہ قربانی کی آلائشیں ویسٹ بیگز میں ڈال کر مقررہ مقامات پر رکھیں تاکہ صفائی عملہ بروقت انہیں تلف کر سکے۔
انتظامیہ کا کہنا ہے کہ عیدالاضحیٰ کے دوران صفائی کے نظام کو مؤثر بنانے اور ماحول کو آلودگی سے پاک رکھنے کے لیے خصوصی ٹیمیں تشکیل دے دی گئی ہیں، جبکہ عوام سے بھی تعاون کی اپیل کی گئی ہے تاکہ “ستھرا پنجاب” مہم کو کامیاب بنایا جا سکے۔