13/07/2026
کمالیہ: اسسٹنٹ کمشنر کمالیہ ارم شہزادی کی زیرِ صدارت اے سی آفس کمالیہ میں تحصیل ہیلتھ کونسل کا اجلاس منعقد ہوا۔ اجلاس میں میڈیکل سپرنٹنڈنٹ تحصیل ہیڈکوارٹر ہسپتال ڈاکٹر غلام عباس سمیر سمیت محکمہ صحت کے دیگر متعلقہ افسران نے شرکت کی۔
اجلاس کے دوران تحصیل بھر میں صحت کی سہولیات، ادویات کی دستیابی، ڈاکٹرز و عملے کی حاضری، بنیادی مراکز صحت کی کارکردگی، صفائی ستھرائی اور مریضوں کو فراہم کی جانے والی طبی سہولیات کا تفصیلی جائزہ لیا گیا۔
اسسٹنٹ کمشنر ارم شہزادی نے ہدایت کی کہ شہریوں کو معیاری اور بروقت طبی سہولیات کی فراہمی ہر صورت یقینی بنائی جائے، ہسپتالوں اور مراکز صحت میں صفائی کے اعلیٰ معیار کو برقرار رکھا جائے اور مریضوں کے ساتھ خوش اخلاقی اور ذمہ داری سے پیش آیا جائے۔ انہوں نے کہا کہ حکومت پنجاب کی ہدایات کے مطابق شعبہ صحت کی بہتری اولین ترجیح ہے اور اس سلسلے میں کسی قسم کی غفلت برداشت نہیں کی جائے گی۔
