21/05/2026
ضلع بدين جي ڳوٺ خيرپور ڪنبوھ جي رهواسڻ زهرش لغاري پنهنجي مڙس نياز احمد لغاري ۽ والده ريحانه سان گڏ ايوان صحافت ميرپورخاص ۾ پريس ڪانفرنس ڪندي الزام هنيو آهي ته سندس والد زاهد لغاري 2012ع ۾ سندس ماءُ کي طلاق ڏني، جنهن بعد کيس ڪزن فاطمه جي گهر ڇڏي ڏنو ويو، جتي هوءَ پرورش پائيندي رهي۔ زهرش لغاري ٻڌايو ته سندس والد 2021ع ۾ ٻي شادي ڪري کيس بي يار و مددگار ڇڏي ڏنو۔ هن الزام هنيو ته رمضان المبارڪ کان پوءِ سندس زبردستي 70 ورهين جي قائم لغاري نالي شخص سان شادي ڪرائڻ جي ڪوشش ڪئي پئي وئي، جڏهن ته بعد ۾ سندس والد پاڻ ٽين شادي ڪرڻ وارو هو۔ هن چيو ته اهڙين حالتن کان تنگ اچي هن پنهنجي برادري جي 26 ورهين جي نوجوان نياز احمد لغاري سان پسند جي شادي ڪئي۔ جوڙي موجب پسند جي شادي ڪرڻ تي سندن خلاف ٻه ڪيس داخل ڪرايا ويا۔ هڪ ڪيس پنگريو پوليس اسٽيشن تي اغوا جي الزام هيٺ داخل ڪيو ويو، پر عدالت ۾ قلم 164 تحت بيان رڪارڊ ٿيڻ بعد ڪيس ختم ٿي ويو، جڏهن ته بعد ۾ عمرڪوٽ پوليس اسٽيشن تي سنڌ چائلڊ ميريج ايڪٽ تحت ٻيو ڪيس داخل ڪيو ويو۔ پريس ڪانفرنس دوران زهرش جي والده ريحانه ٻڌايو ته جڏهن سندس ڌيءَ صرف ٻن سالن جي هئي ته اڳوڻي مڙس کيس ڌيءَ کان الڳ ڪري ڇڏيو هو۔ هن چيو ته مڙس جي ظلم ۽ زيادتين کان تنگ اچي 17 سالن بعد سندس ڌيءَ ٻيهر وٽس آئي آهي ۽ هاڻي هن پنهنجي مرضي سان شادي ڪئي آهي۔ متاثر جوڙي الزام هنيو ته زاهد لغاري، غلام محمد لغاري، مجد لغاري، غلام حسين لغاري، حبيب الله لغاري، عيسيٰ لغاري ۽ فياض لغاري سندن جاني دشمن بڻجي چڪا آهن۔ هنن اعليٰ اختيارين کان تحفظ فراهم ڪرڻ جي اپيل ڪئي آهي۔
