02/08/2026
ایس ایچ او بلدیہ ندیم تنولی کے خلاف منفی مہم جوئی، اہلیانِ علاقہ کا شدّید ردِعمل، "کردار کشی کسی صورت قبول نہیں"
کراچی : تھانہ بلدیہ میں تعیّنات ایس ایچ او ندیم تنولی کی جانب سے جرائم پیشہ عناصر، گٹکا و ماوا مافیا اور جوا سٹہ کے اڈوں کے خلاف بلاامتیاز اور موثر کارروائیوں کے بعد مفاد پرست عناصر اور مافیا کے گرد گھیرا تنگ ہو چکا ہے۔ تاہم، اس سخت کریک ڈاؤن کے ردِعمل میں سوشل میڈیا اور غیر مصدقہ واٹس ایپ گروپس کے ذریعے فرض شناس افسر کی کردار کشی کی کوششوں پر اہلیانِ بلدیہ ٹاؤن میں شدید غصہ اور تشویش پائی جاتی ہے۔ علاقہ مکینوں اور معزز شہریوں کا کہنا ہے کہ ایس ایچ او ندیم تنولی کی تعیّناتی کے بعد علاقے میں جرائم کی شرح میں واضح کمی دیکھنے میں آئی ہے۔ پولیس نے متعدد مقدمات کے تحت کارروائیاں کرتے ہوئے گٹکا، ماوا اور جوے کی لعنت میں ملوث درجنو ں ملزمان کو سلاخوں کے پیچھے دھکیلا، جس کے باعث ان ناجائز کاروباروں پر سخت ضرب پڑی ہے۔
شہریوں کا کہنا ہے کہ پولیس ایکشن سے بوکھلاہٹ کا شکار ہو کر مفاد پرست اور بلیک میلر عناصر نے فرض شناس افسران کو دباؤ میں لانے اور ان کی ساکھ کو نقصان پہنچانے کے لیے منفی تبلیغات کا سہارا لیا ہے۔
اہلیانِ بلدیہ ٹاؤن نے یک زبان ہو کر واضح کیا ہے کہ "ایماندار اور متحرک افسران کی کردار کشی کسی صورت قبول نہیں کی جائے گی۔" عوام قانون نافذ کرنے والے اداروں اور پولیس انتظامیہ کے ساتھ شانہ بشانہ کھڑی ہے۔ شہریوں نے اعلیٰ حکام سے زوردار مطالبہ کیا ہے کہ جرائم کے خلاف اس بے خوف کارروائی کو مسلسل جاری رکھا جائے اور جھوٹی مہم جوئی کرنے والے عناصر کا بھی سختی سے محاسبہ کیا جائے۔
