01/09/2026
عالمی مارکیٹ میں سونے کی قیمت میں معمولی کمی، سرمایہ کاروں کی نظریں امریکی معاشی اعداد و شمار پر
اسلام آباد (عرفات نیوز ویب ڈیسک) عالمی سطح پر سونے کی قیمتیں منگل کو محدود دائرے میں رہیں، جبکہ سرمایہ کار امریکی لیبر مارکیٹ کے اہم اعداد و شمار اور مشرقِ وسطیٰ میں بڑھتی ہوئی کشیدگی پر نظر رکھے ہوئے ہیں۔
رائٹرز کے مطابق اسپاٹ گولڈ کی قیمت میں 0.3 فیصد کمی ہوئی، جس کے بعد سونا 4,437.10 ڈالر فی اونس پر آگیا۔ گزشتہ سیشن کے دوران سونے کی قیمت 19 اگست کے بعد کی کم ترین سطح پر پہنچ گئی تھی۔
دوسری جانب امریکی گولڈ فیوچرز میں 0.1 فیصد اضافہ ریکارڈ کیا گیا اور قیمت 4,485.30 ڈالر فی اونس رہی۔
رواں ہفتے امریکا میں روزگار سے متعلق اہم اعداد و شمار جاری کیے جائیں گے، جن میں جاب اوپننگز، اے ڈی پی ایمپلائمنٹ رپورٹ اور نان فارم پے رولز شامل ہیں۔ سرمایہ کار ان اعداد و شمار کے ذریعے امریکی لیبر مارکیٹ کی صورتحال اور مستقبل میں شرحِ سود سے متعلق فیڈرل ریزرو کی پالیسی کے امکانات کا جائزہ لیں گے۔
ماہرین کے مطابق امریکی شرحِ سود سے متعلق توقعات حالیہ دنوں میں سونے کی قیمتوں پر دباؤ کا باعث بنی ہوئی ہیں۔ گزشتہ ہفتے سونا تین ماہ سے زائد عرصے کی بلند ترین سطح پر پہنچ گیا تھا، تاہم جمعہ کو فیڈرل ریزرو کے چیئر کی جانب سے مہنگائی کو 2 فیصد کے ہدف تک لانے کے حوالے سے مزید یقین دہانی کی ضرورت کے اشاروں کے بعد سونے کی قیمت میں 3 فیصد سے زائد کمی ریکارڈ کی گئی۔
عالمی منڈی میں سرمایہ کار اب امریکی معاشی اعداد و شمار اور مشرقِ وسطیٰ کی صورتحال کو مدنظر رکھتے ہوئے سونے کی قیمتوں کی آئندہ سمت کا تعین کرنے کی کوشش کر رہے ہیں۔
