20/08/2026
“آپ پوری دنیا پر قابو پاسکتے ہیں، مگر غزہ پر نہیں کیونکہ غزہ خود ایک دنیا ہے”، فلسطینی بچی ماریا حنون کا ڈونلڈ ٹرمپ کو پیغام
غزہ سے تعلق رکھنے والی فلسطینی بچی ماریا حنون نے امریکی صدر ڈونلڈ ٹرمپ کو مخاطب کرتے ہوئے ایک پُراثر پیغام دیا تھا جو ایک بار پھر توجہ حاصل کر رہا ہے۔ فروری 2025 میں تباہ شدہ عمارتوں کے ملبے کے درمیان ریکارڈ کی گئی ویڈیو میں ماریا نے ٹرمپ سے سوال کیا کہ اگر کسی شخص سے اپنا گھر اور وطن چھوڑ کر دوسرے ملک منتقل ہونے کو کہا جائے تو کیا وہ ایسا کرنا قبول کرے گا؟ اسی گفتگو کے دوران اس نے کہا: “آپ پوری دنیا پر قابو پاسکتے ہیں، مگر غزہ پر نہیں کیونکہ غزہ خود ایک دنیا ہے۔”
یہ پیغام ٹرمپ کی اُس وقت سامنے آنے والی تجویز کے بعد دیا گیا تھا جس میں غزہ کے فلسطینی باشندوں کو مصر یا اردن منتقل کرنے کی بات کی گئی تھی، جسے فلسطینیوں سمیت مصر اور اردن نے مسترد کردیا تھا۔ ماریا نے اپنی ویڈیو میں واضح کیا کہ وہ اپنا گھر چھوڑنا نہیں چاہتی اور مستقبل میں ڈاکٹر اور شاعرہ بننے کا خواب رکھتی ہے۔ اہم بات یہ ہے کہ بعض حالیہ پوسٹس میں بچی کا نام “مریم” لکھا جا رہا ہے، جبکہ اصل رپورٹ میں اس کی شناخت ماریا حنون کے نام سے کی گئی ہے۔
