11/11/2025
عرفان صدیقی مرحوم کا ایک یادگار کالم
۔۔۔۔۔۔
مجھے آج ایک بار پھر طالبان کا ایک بھولا بسرا کردار یاد آ رہا ہے اور جب کبھی اس کی یاد آتی ہے، بے طرح آتی ہے۔ یہ 1995ء کا ذکر ہے۔ طالبان کی نئی نئی نمو ہو رہی تھی۔ لوگ جاننے کی کوشش کر رہے تھے کہ یہ کون لوگ ہیں۔ اگست کے ایسے ہی حبس زدہ دن تھے جب صحافیوں کا ایک مختصر سا قافلہ مولانا سمیع الحق کے ہمراہ قندھار پہنچا۔ ایک اجڑے پجڑے سے ریسٹ ہاؤس میں ہمارا قیام تھا جس کے لان میں افغان صدر نجیب اللہ کی سیاہ رنگ مرسڈیز، ایک ڈھانچے کی طرح پڑی تھی۔ رات کو طالبان کے امیر المومنین ملا محمد عمر نے ہمیں ملنے آنا تھا اور ہم سب کو بڑی شدت سے اس مرد پراسرار کا انتظار تھا جس نے دیکھتے ہی دیکھتے ساری دنیا کی توجہ حاصل کر لی تھی۔ طالبان خستہ حال اور بے سروسامان تھے لیکن ہماری راہوں میں بچھے جا رہے تھے۔ ان میں بیساکھی کے ساتھ چلنے والا ایک ادھیڑ عمر شخص سب سے زیادہ سرگرم تھا۔ ہم اٹھنے لگتے تو وہ لپک کر جوتے سیدھے کرتا، ہاتھ دھونے لگتے تو وہ پانی کا لوٹا لے کر کھڑا ہو جاتا، لپک کر تولیہ اٹھا لاتا، کھانے کے لئے دسترخوان بچھا تو وہ پلیٹیں لگانے اور کھانا چننے والوں میں سب سے نمایاں تھا۔ کھانے کے بعد ایک بڑے سے ہال میں ہم پرانے عمر رسیدہ صوفوں پر بیٹھے تو میں نے جاننے کی کوشش کی کہ معذور ہونے کے باوجود یہ اس قدر مستعد اور خدمت کے جذبے سے سرشار شخص کون ہے؟ میزبانوں میں سے کسی نے بتایا کہ یہ قندھار کے گورنر ملا رحمانی ہیں۔ ہم سب کے منہ حیرت سے کھلے کے کھلے رہ گئے۔ ایسے ہوتے ہیں گورنر؟ میرے ذہن میں اپنے ہاں کے گورنروں کے چہرے گھوم گئے۔ ان کے شاہانہ جاہ و جلال اور بے پناہ کروفر کے مناظر یاد آنے لگے۔ ایکڑوں میں پھیلے ہوئے ان کے شاندار محلات کا تصّور ابھرا۔ مجھے یقین نہ آیا کہ ملا رحمانی گورنر ہیں۔
اگلے دن ہمارے میزبان ہمیں گاڑی میں بٹھا کر احمد شاہ ابدالی کا مقبرہ دکھانے لے گئے۔ واپسی پر گاڑی ایک بھرے پُرے بازار سے گزر رہی تھی کہ میں نے فٹ پاتھ کی بھیڑ بھاڑ میں ایک شخص کو بیساکھی ٹیکتے، چلتے دیکھا۔ مجھے لگا جیسے وہ ملا رحمانی ہیں۔ میں نے گاڑی کے افغان ڈرائیور کو متوجہ کیا۔ ” دیکھو تو، یہ شخص تمہارے گورنر سے کتنا ملتا جلتا ہے “۔ ڈرائیور سپاٹ لہجے میں بولا۔ ” جی یہ تو خود گورنر رحمانی ہیں “۔ بجلی کا ایک اور کوندا میرے جسم کے آرپار ہو گیا۔ میں نے حیرت سے پوچھا ” کیا گورنر صاحب کے پاس گاڑی نہیں؟ “ ” جی ہے “ ڈرائیور بولا ” یہی ہے جس میں آپ بیٹھے ہیں۔ چونکہ آپ مہمان ہیں، اس لئے انہوں نے گاڑی آپ کو دے رکھی ہے، خود پیدل جا رہے ہیں۔ ان کے لئے یہ کوئی نئی بات نہیں “۔ ان کے لئے یقیناً یہ کوئی نئی بات نہیں ہو گی لیکن میں دیر تک بپھری لہروں والے دریائے حیرت میں غرق رہا۔ اس شام میں نے گورنر قندھار کا دفتر بھی دیکھا تو جو میرے گاؤں کے مڈل اسکول کے ہیڈ ماسٹر صاحب کے دفتر سے ملتا جلتا تھا اور اسی رات میں نے ملا رحمانی سے ڈھیر ساری باتیں کی تھیں۔ انہوں نے اپنی تنخواہ اور مراعات کے بارے میں بتایا تھا کہ ” چار چھ مہینے بعد امیر المومنین کچھ وظیفہ دے دیتے ہیں۔ اللہ کا کرم ہے “۔ میرا دوسرا سوال تھا۔ ” آپ کے گھر کے روزمرہ اخراجات کس طرح پورے ہوتے ہیں؟ “ اور اس مرد درویش کا سادہ و معصوم سا جواب آج بھی میرے کانوں میں رس گھول رہا ہے۔ ” میرے دو جوان بیٹے ہیں۔ وہ صبح صبح محنت مزدوری کے لئے نکل جاتے ہیں۔ شام کو اتنی کمائی ہو جاتی ہے کہ دال روٹی کا خرچہ نکل آتا ہے “۔
معلوم نہیں ملا رحمانی آج کہاں ہوں گے؟ زندہ بھی ہیں یا نہیں؟ لیکن یہ بھولا بسرا کردار مجھے بے طرح یاد آ رہا ہے اور اس لئے یاد آ رہا ہے کہ ہمارے حکمران، جو روشن خیال ہیں، جو زمانے کے تقاضے بہت اچھی طرح سمجھتے ہیں اور جو بنیادی انسانی حقوق اور جمہوری اقدار پر پختہ ایمان رکھتے ہیں، کس طرح کروڑوں روپے خرچ کر کے رسوائیاں کماتے اور جگ ہنسائیاں مول لیتے ہیں
عرفان صدیقی کے کالم سے اقتباس
