06/10/2025
کرک شہدائے پولیس اور کرک پولیس کیلئے خوشخبری
ڈی پی او شہباز الٰہی کا کرک پولیس شہداء کے فیملیز اور حاضر سروس پولیس اہلکاروں کے خاندانوں کے لیے تاریخی اقدامات
تفصیلات کے مطابق ڈسٹرکٹ پولیس آفیسر کرک شہباز الٰہی نے کرک پولیس کے شہداء کے فیملیز اور حاضر سروس پولیس اہلکاروں کے فیملیز کے لیے ایک تاریخ ساز اقدام کا آغاز کر دیا ہے۔
ڈسٹرکٹ پولیس آفیسر کرک شہباز الٰہی، شہداء اور پولیس ویلفیئر کلرک آیاز خٹک، لواغر انسٹیٹیوٹ کے CEO وزیر نواب، اور کرک میڈیکل کمپلیکس کے چیف عہدیدار اسحاق خٹک کے مابین مفاہمتی یادداشتوں پر دستخط ہوئے۔
ضلع کرک کے نامور میڈیکل تعلیمی ادارے لواغر انسٹیٹیوٹ آف میڈیکل سائنسز (چوکارہ) کے CEO وزیر نواب خٹک کے ساتھ ایک معاہدے کے تحت ادارے کی جانب سے ہر سال منعقدہ دو سالہ ڈپلومہ پروگرامز:
1. پیھتالوجی
2. ڈینٹل
3. اینیستھیزیا
4. سرجیکل
5. کارڈیالوجی
6. فارمیسی
7. ہیلتھ
8. ریڈیالوجی
میں کرک پولیس شہداء کے بچوں کے لیے ہر پروگرام میں ایک ایک نشست (سیٹ) بالکل مفت فراہم کی جائے گی، جس کے تحت ادارہ ڈپلومہ کے کسی قسم کی کوئی فیس یا چارجز نہیں لے گا۔
جبکہ کرک پولیس کے حاضر سروس اہلکاروں کے بچوں کے لیے انہی پروگرامز میں 50 فیصد رعایت کے ساتھ داخلہ دیا جائے گا۔
ادارے کے تحت ہر سال منعقدہ چار سالہ ڈگری پروگرامز:
1. بی ایس ایمرجنسی کیئر
2. بی ایس میڈیکل لیبارٹری ٹیکنالوجی
3. بی ایس سرجیکل
4. بی ایس ڈینٹل
5. بی ایس ریڈیالوجی
کے تحت کرک پولیس کے شہداء کے بچوں کو ہر سال بغیر کسی قسم کے اخراجات کے بالکل مفت پانچ نشستیں دی جائیں گی، جبکہ حاضر سروس پولیس اہلکاروں کے بچوں کے لیے 50 فیصد رعایت کے ساتھ داخلہ دیا جائے گا۔
اس کے علاوہ ڈی پی او کرک شہباز الٰہی نے ضلع کرک کے ایک اعلیٰ پرائیویٹ طبی مرکز کرک میڈیکل کمپلیکس کے چیف سرجن ڈاکٹر رضوان احمد کے نمائندے کے ساتھ بھی ایک مفاہمتی یادداشت پر دستخط کیے ہیں۔
اس معاہدے کے تحت کرک پولیس شہداء کے فیملیز (بچوں، بیوی، والدین) کو کرک میڈیکل کمپلیکس میں علاج معالجہ سمیت تمام میڈیکل ٹیسٹس، ایکسرے وغیرہ بالکل مفت فراہم کیے جائیں گے، جبکہ حاضر سروس پولیس اہلکاروں کے لیے 50 فیصد رعایتی نرخوں پر علاج معالجہ، میڈیکل ٹیسٹس اور ایکسرے وغیرہ کی سہولیات فراہم کی جائیں گی۔
ڈی پی او کرک شہباز الٰہی کی جانب سے اٹھائے گئے یہ اقدامات پولیس شہداء اور حاضر سروس اہلکاروں کے لیے کسی نعمت سے کم نہیں ہیں۔
ڈی پی او شہباز الٰہی نے اپنے پیغام میں کہا کہ انسپکٹر جنرل آف پولیس خیبرپختونخوا ذوالفقار حمید کے وژن کے مطابق شہداء اور سپاہ کی فلاح و بہبود اولین ترجیح ہے، جس کے لیے تمام مثبت اقدامات اٹھائے جائیں گے۔
