20/12/2025
ملاگوری قوم کے نمائندہ جرگہ کی ڈی پی او خیبر سے ملاقات،علاقہ سے پرانی دشمنیوں کے خاتمے پر اتفاق،سماجی برائیوں کے سدباب کے لیے مشترکہ حکمت عملی،خیبر پولیس مشران کے ساتھ مل کر اپس کی دشمنیاں پرامن طریقے سے ختم کرنے کے لیے ہر ممکن تعاون کے لیے تیار
تفصیلات کے مطابق ملاگوری قوم کے نمائندہ جرگہ نے ڈسٹرکٹ پولیس آفیسر خیبر وقار احمد سے ان کے دفتر میں ملاقات کی۔ ملاقات میں علاقہ کی مجموعی امن و امان کی صورتحال، پرانی دشمنیوں کے خاتمے اور سماجی برائیوں کے سدباب کے حوالے سے تفصیلی تبادلہ خیال کیا گیا۔
جرگہ کے مشران نے ڈی پی او خیبر کو یقین دہانی کرائی کہ ملاگوری قوم علاقے میں امن قائم رکھنے، بھائی چارے کو فروغ دینے اور سماجی برائیوں کے خاتمے میں پولیس کے ساتھ پہلے کی طرح تعاون جاری رکھیں گی۔ انہوں نے کہا کہ اپس کی دشمنیوں اور پرانی رنجشوں کو ختم کرنے کے لیے مثبت اقدامات کیے جائیں گے اور کمیونٹی کے تمام افراد قانون کی بالادستی اور امن و امان کی حفاظت میں فعال کردار ادا کریں گے۔
ڈی پی او نے کہا کہ ملاگوری قوم ایک پرامن اور ذمہ دار قوم ہے، اور دیگر علاقوں کے مقابلے میں یہاں جرائم کی شرح کم ہے۔ یہی وجہ ہے کہ قومی مشران پولیس کے ساتھ بھرپور تعاون کر رہے ہیں اور علاقے میں امن و امان قائم رکھنے میں اہم کردار ادا کر رہے ہیں۔
انہوں نے مزید کہا کہ ملاگوری قوم میں امن قائم رکھنے کی اصل وجہ اس کی پرامن روایات، قومی مشران کا تعاون ہے۔ خیبر پولیس مشران کے ساتھ مل کر علاقے میں پائیدار امن اور قانون کی بالادستی کے لیے ہر ممکن اقدامات کرتی رہے گی۔
