04/06/2026
کوہاٹ : کوہاٹ ڈگری کالج میں ناخوشگوار واقعہ اصل حقائق کیا ہیں
کوہاٹ (میڈیا ٹاکس سپیشل رپورٹ) آج ڈگری کالج رونما ہونے والے ناخوشگوار واقعہ کے بعد چیئرمین کوہاٹ بورڈ امتیاز ایوب کی نازیبا الفاظ کے استعمال کی ویڈیو سوشل میڈیا پر وائرل ہونے کے بعد بہت سارے سوالات اٹھنے لگے جس جواب میں کوہاٹ بورڈ کا موقف کچھ یوں ہے کہ چیئرمین کوہاٹ
بورڈ آف انٹرمیڈیٹ اینڈ سیکنڈری ایجوکیشن (BISE) کوہاٹ میں پریکٹیکل امتحانات کے معائنہ کی غرض سے ڈگری کالج کوہاٹ کے دورہ پر گئے جہاں دوران جائزہ کالج کے دو اساتذہ کی جانب سے مبینہ طور پر شدید بدنظمی، گالم گلوچ اور چیئرمین بورڈ سمیت اعلیٰ حکام کے ساتھ بدتمیزی کا ناخوشگوار واقعہ سامنے آیا ہے بورڈ ذرائع کے مطابق اس پورے واقعے کے سو فیصد ذمہ دار دونوں کالج ٹیچرز ہیں۔ چیئرمین BISE کوہاٹ امتیاز ایوب پریکٹیکل امتحان کا جائزہ لینے کیلئے پریکٹیکل لیب جانے لگے، تو دونوں اساتذہ نے انہیں وہاں جانے سے روکا، چیئرمین کے ساتھ انتہائی بدتمیزی کی اور بورڈ اور حکومت کو گالیاں دیتے رہے۔ چیئرمین بورڈ مسلسل انہیں تمیز سکھاتے رہے اور گالم گلوچ سے باز رہنے کی تلقین کرتے رہے، لیکن اساتذہ نے انہیں بورڈ سے نکلنے کا کہا بورڈ ذرائع نے
واقعہ کی تفصیلات اور پس منظر کچھ یوں بیان کیں کہ دونوں کالج اساتذہ کو امتحانی ڈیوٹی نہ ملنے کا ملال تھا انہوں نے دیگر اساتذہ کو بھی امتحانی ڈیوٹیوں کے بائیکاٹ پر اکسانے کی کوشش کی۔ تاہم، دیگر اساتذہ نے بائیکاٹ کا حصہ بننے سے انکار کر دیا اور امتحانات بہترین انداز میں منعقد ہوئے۔ بائیکاٹ مہم ناکام ہونے پر مذکورہ اساتذہ اپنے جذبات پر قابو نہ رکھ سکے اور بورڈ کے معاملات میں مداخلت شروع کر دی۔ ذرائع کے مطابق یہ اساتذہ پہلے بھی بورڈ امور میں مداخلت کے باعث چیئرمین کے ناپسندیدہ رہے ہیں۔ آج کے واقعہ میں نا صرف چیئرمین بورڈ بلکہ کمشنر کوہاٹ جو اس وقت کالج میں جاری ایک تقریب میں مہمان خصوصی کی حیثیت سے شرکت کر رہے تھے ان کی گاڑی کا راستہ روکنے کی کوشش بھی کی گئی جس پر کمشنر کوہاٹ نے بھی سخت برہمی کا اظہار کیا
۔
