Zama Kohat

09/09/2025

سہرا گڑھی پریمیئر لیگ کا سنسنی خیز فائنل، کوہاٹ کینٹ الیون نے فتح کا تاج پہن لیا
ہنگو کے علاقے سہرا گڑھی میں کھیلے جانے والے "سہرا گڑھی پریمیئر لیگ سیزن ٹورنامنٹ" کا فائنل میچ جوش و خروش، سنسنی اور کرکٹ کے دلکش لمحات سے بھرپور ثابت ہوا۔فائنل میچ کوہاٹ کینٹ الیون اور پاڑاچنار ٹائیگر الیون کے درمیان کھیلا گیا، جسے دیکھنے کے لیے علاقہ بھر سے شائقین کی بڑی تعداد نے شرکت کی، اور میدان میں خوب جوش و خروش دیکھنے کو ملا۔ فائنل میچ کا آغاز انتہائی سنجیدہ اور شاندار انداز میں ہوا، دونوں ٹیموں نے بھرپور محنت اور مہارت کا مظاہرہ کیا۔ تاہم، ایک سنسنی خیز مقابلے کے بعد کوہاٹ کینٹ الیون نے فتح حاصل کرتے ہوئے ٹورنامنٹ کی چمچماتی ٹرافی اپنے نام کر لی۔اس پُروقار تقریب کے مہمانِ خصوصی پاکستان پیپلز پارٹی اقلیتی ونگ کے سابق صوبائی صدر پیر نصیب چند تھے،جنہوں نے جیتنے والی ٹیم کے کھلاڑیوں کو مبارکباد دی اور شاندار کھیل پیش کرنے پر انعامات سے نوازا۔ انہوں نے رنر اپ ٹیم پاڑاچنار ٹائیگر الیون کے کھلاڑیوں کی بھی حوصلہ افزائی کی اور نوجوانوں کو صحت مند سرگرمیوں کی جانب راغب کرنے پر منتظمین کو خراج تحسین پیش کیا.علاقہ مکینوں کا کہنا تھا کہ ایسے ٹورنامنٹس نہ صرف نوجوانوں کو مثبت سرگرمیوں کی طرف راغب کرتے ہیں بلکہ علاقائی سطح پر ہم آہنگی، محبت اور امن کے فروغ کا ذریعہ بھی بنتے ہیں۔آخر میں منتظمین نے مہمان خصوصی اور تمام شائقین کا شکریہ ادا کیا اور آئندہ بھی ایسے ایونٹس کے انعقاد کا عندیہ دیا۔

09/09/2025

عالمی یومِ خواندگی 8 ستمبر کے موقع پر نیشنل کمیشن فار ہیومن ڈویلپمنٹ (NCHD) کوہاٹ کے زیرِ اہتمام گورنمنٹ پرائمری سکول تحصیل گیٹ کوہاٹ سٹی میں ایک بامقصد اور پرجوش تقریب کا انعقاد کیا گیا، جس میں تعلیمی ترقی، شرح خواندگی میں اضافے اور اسکول سے باہر بچوں کو تعلیمی دھارے میں شامل کرنے پر زور دیا گیا۔ تقریب کے مہمانِ خصوصی این سی ایچ ڈی کے ضلعی رضا کار اور سماجی کارکن ایثار علی بنگش تھے۔ اس موقع پر اسسٹنٹ ڈائریکٹر وقار احمد جان، ہیڈ ماسٹر حافظ شاہد حکیم، فیلڈ آفیسر شفیع الرحمان، مدثر شاہ، مختلف تعلیمی اداروں کے اساتذہ اور مقامی کمیونٹی کے افراد نے بھرپور شرکت کی۔ تقریب سے خطاب کرتے ہوئے مقررین نے کہا کہ موجودہ وفاقی اور صوبائی حکومتیں تعلیمی شعبے کی بہتری کے لیے سنجیدہ اقدامات کر رہی ہیں۔ مقررین نے زور دیا کہ یہ ہم سب کی مشترکہ ذمہ داری ہے کہ علاقے کے تمام بچوں کو تعلیم کے زیور سے آراستہ کریں اور اسکول سے باہر بچوں کو جلد از جلد سرکاری اسکولوں میں داخل کروایا جائے۔ انہوں نے مزید کہا کہ سرکاری اسکولوں میں داخلوں میں اضافہ اس بات کا ثبوت ہے کہ عوام کا اعتماد سرکاری تعلیمی اداروں پر بحال ہو رہا ہے اور ان کا معیار تعلیم بھی بہتر ہوا ہے۔ تعلیم کی روشنی ہر گھر تک پہنچانا ہم سب کا قومی فریضہ ہے، جس کے لیے ہر فرد کو حکومت کا ہاتھ بٹانا ہوگا.سماجی کارکن ایثار علی بنگش نے این سی ایچ ڈی کوہاٹ کی تعلیمی میدان میں کی جانے والی کوششوں کو سراہا اور ادارے کی خدمات کو خراجِ تحسین پیش کیا۔ انہوں نے کہا کہ این سی ایچ ڈی جیسے ادارے ملک میں خواندگی کے فروغ میں کلیدی کردار ادا کر رہے ہیں۔تقریب کے اختتام پر شرکاء نے ایک آگاہی واک میں بھی حصہ لیا، جس کا مقصد عوام میں تعلیم کی اہمیت کے حوالے سے شعور اجاگر کرنا تھا۔ واک میں مختلف طبقہ فکر سے تعلق رکھنے والے افراد نے بھرپور شرکت کی اور تعلیم کو ہر فرد کا بنیادی حق قرار دیا۔

07/09/2025

گولیوں کی بارش میں جرأت کی نئی تاریخ رقم: لاچی آپریشن کے ہیرو رومان خان کو نظر انداز کر دیا گیا
لاچی کے خطرناک پہاڑی علاقے میں ہونے والے حساس اور جان لیوا آپریشن میں اپنی جان ہتھیلی پر رکھ کر اپنے شہید ساتھیوں کی لاشیں نکالنے والے کوہاٹ پولیس کے جری سپوت، بہادر آفیسر رومان خان کو مسلسل نظرانداز کیے جانے پر پولیس فورس اور عوامی حلقوں میں شدید تحفظات جنم لینے لگے ہیں۔ذرائع کے مطابق، رومان خان نے اپنے پانچ جوانوں کے ہمراہ اس وقت آپریشن میں شرکت کی جب صورتحال نہایت خطرناک تھی۔ دہشت گردوں کی مسلسل فائرنگ اور مشکل زمینی حالات کے باوجود رومان خان نے نہ صرف اپنے جوانوں کی قیادت کی، بلکہ تین گھنٹے طویل آپریشن کے دوران مسلسل اپنے سینئرز سے رابطے میں رہ کر مکمل ہم آہنگی کے ساتھ کارروائی کو کامیابی سے ہمکنار کیا۔ عینی شاہدین کے مطابق، رومان خان اور ان کے ساتھی عمران الدین الگڈی نے انتہائی جرأت و بہادری کا مظاہرہ کرتے ہوئے اس مقام تک رسائی حاصل کی جہاں شہداء کی لاشیں موجود تھیں۔ دونوں جوانوں نے موت کی آنکھوں میں آنکھیں ڈال کر لاشوں کو نکالا اور ایک نئی مثال قائم کی۔ یہ کوئی عام کارروائی نہیں تھی، بلکہ ایسی قربانی تھی جو تاریخ میں سنہری حروف سے لکھی جائے گی۔تاہم افسوس ناک امر یہ ہے کہ اس مثالی کارکردگی کے باوجود رومان خان کو نہ تو کوئی تعریفی سند دی گئی اور نہ ہی کسی سرکاری سطح پر ان کی خدمات کو سراہا گیا۔ مقامی حلقوں کا کہنا ہے کہ رومان خان جیسے دلیر اور وفاشعار آفیسر کو نظر انداز کرنا صرف ایک فرد کے ساتھ ناانصافی نہیں، بلکہ یہ قوم کے اُن تمام سپوتوں کی حوصلہ شکنی ہے جو اپنی جانیں داؤ پر لگا کر امن کے خواب کی تعبیر ممکن بناتے ہیں۔کوہاٹ کے عوام اپنے اس قابل فخر فرزند رومان خان پر نازاں ہیں اور اعلیٰ حکام سے مطالبہ کرتے ہیں کہ اس بہادر آفیسر کی قربانیوں کا اعتراف کیا جائے اور انہیں وہ مقام دیا جائے جس کے وہ حقیقی معنوں میں حقدار ہیں۔

05/09/2025

خیبر پختونخوا حکومت کے تعلیمی اصلاحات پروگرام کے تحت گورنمنٹ پرائمری اسکول جنگل خیل گیٹ، کوہاٹ سٹی میں ایک پروقار تقریب کا انعقاد کیا گیا، جس میں 84 طلباء و طالبات میں مفت اسکول بیگز، کاپیاں اور جیومیٹری بکس تقسیم کیے گئے۔ اس اہم موقع پر سماجی کارکن ایثار علی بنگش نے بطور مہمانِ خصوصی شرکت کی، جبکہ اسکول کے ہیڈ ماسٹر حافظ صابر خان بنگش، اساتذہ کرام اور طلباء کے والدین بھی بڑی تعداد میں موجود تھے۔تقریب سے خطاب کرتے ہوئے ایثار علی بنگش نے حکومتِ خیبر پختونخوا کے اس اقدام کو سراہتے ہوئے کہا کہ ابتدائی جماعتوں، بالخصوص جماعتِ ادنیٰ اور اول کے طلباء و طالبات کو تعلیمی سامان کی مفت فراہمی ایک خوش آئند قدم ہے، جو نہ صرف بچوں کو تعلیم کی طرف راغب کرے گا بلکہ ان کی تعلیمی دلچسپی میں بھی اضافہ ہوگا۔ انہوں نے کہا کہ تعلیم ہر بچے کا بنیادی حق ہے اور ایسے اقدامات سے یقینی طور پر شرح خواندگی میں اضافہ ہوگا۔ہیڈ ماسٹر حافظ صابر خان بنگش نے تقریب سے خطاب کرتے ہوئے ایثار علی بنگش کی خدمات کا خصوصی طور پر تذکرہ کیا اور کہا کہ وہ نہ صرف اسکول چھوڑنے والے بچوں کو دوبارہ تعلیم کی طرف لانے میں پیش پیش ہیں بلکہ محنت کش اور غریب بچوں کے لیے اسکول میں داخلے کے مواقع بھی فراہم کر رہے ہیں۔ انہوں نے کہا کہ سماجی کارکنان کی ایسی کاوشیں معاشرے میں مثبت تبدیلی کا پیش خیمہ ثابت ہو سکتی ہیں۔آخر میں اسکول کے 84 طلباء و طالبات میں مفت اسکول بیگز تقسیم کیے گئے،جس پر والدین نے بھی خوشی اور اطمینان کا اظہار کیا۔

05/09/2025

03/09/2025

کوہاٹ چیمبر آف کامرس اینڈ انڈسٹری کے صدر رشید پراچہ و دیگر عہدیداران نے چیمبر آفس میں منعقد ایک اہم اجلاس میں بات کرتے ہوئے کہا کہ بزنس کمیونٹی کے مرکزی رہنما ایس ایم تنویر، وزیر اعلٰی خیبرپختونخوا و دیگر اہم شخصیات کے نئے صوبوں سے متعلق بیان کی مکمل حمایت کرتے ہیں۔ انہوں نے کہا کہ ایف پی سی سی آئی کے ریسرچ سیل کی تحقیق اور ہمارے دیرینہ مطالبے کے مطابق پاکستان کی پائیدار ترقی کے لیے ڈسٹرکٹ اکانومی پر توجہ دینا وقت کی اہم ضرورت ہے، کیونکہ موجودہ خیبرپختونخوا کے کم و بیش 35 اضلاع میں سے صرف جنوبی اضلاع کے 11 ڈسٹرکٹ ہیں جن میں سے اکثر نظرانداز رہ جاتے ہیں۔ بڑے صوبوں اور بڑھتی آبادی کے باعث چھوٹے اضلاع کی معاشی اہمیت پس منظر میں چلی جاتی ہے جبکہ صوبائی ذمہ داران کی توجہ بھی تقسیم در تقسیم ہو کر رہ جاتی ہے۔ انہوں نے کہا کہ نئے صوبوں کا قیام وقت کی ضرورت ہے جس سے وسائل کی منصفانہ تقسیم، بہتر گورننس، تیز تر ترقی، عوامی مسائل کے فوری حل اور تعلیم، صحت، توانائی و روزگار کے شعبوں میں انقلابی بہتری کا امکان ہے۔ اس اہم قومی مسئلے پر تمام اسٹیک ہولڈرز فوری طور پر مشاورت کریں کیونکہ یہی ہر مسئلے کا پائیدار حل اور سب کے مفاد میں بہتر فیصلہ ہے۔
انہوں نے کہا کہ انتظامی امور میں تبدیلیاں زیادہ مشکل نہیں، کئی غیر ضروری عہدے ختم کرکے اور ڈھانچہ سادہ بنا کر نئے صوبوں کے قیام کو آسانی سے ممکن بنایا جا سکتا ہے، اس سے مسائل جنم لینے کے بجائے بہتر حکمرانی اور کارکردگی سامنے آئے گی۔ نئے صوبے فیڈریشن کو مضبوط بنائیں گے، اختیارات نچلی سطح تک منتقل ہوں گے اور عوامی اعتماد میں اضافہ ہوگا۔ رشید پراچہ نے زور دیا کہ کوہاٹ اپنی جغرافیائی و تجارتی حیثیت کے باعث جنوبی اضلاع کا گیٹ وے ہے، لہٰذا مستقبل کے ترقیاتی منصوبوں میں اسے خصوصی اہمیت دی جانی چاہیے۔
علاوہ ازیں نئے صوبوں کے قیام سے بے پناہ آمدنی اور روزگار کے مواقع پیدا ہوں گے جس سے نہ صرف عوامی خوشحالی میں اضافہ ہوگا بلکہ قومی معیشت بھی مضبوط ہوگی۔ اجلاس میں سابق صدر سید فائق شاہ۔ ارشد حیات۔ کوارڈینیٹر کرنل ر جواد پراچہ۔ سماجی شخصیت ایثار علی بنگش ودیگر موجود تھے

02/09/2025

یونائیٹڈ پینٹی کوسٹل چرچ ہنگو کے یوتھ تنظیم نے اپنی نئی تنظیم کا باقاعدہ اعلان کر دیا۔ اس مناسبت سے ایک پروقار تقریب کا انعقاد کیا گیا جس میں مختلف شعبہ جات کے منتخب عہدیداروں اور ممبران کو باقاعدہ شناخت کارڈز جاری کیے گئے۔تقریب کی صدارت سکھ کمیونٹی سے تعلق رکھنے والے چیئرمین سکھ کیمونٹی نصیب چند نے کی۔ اُن کی قیادت میں تمام منتخب عہدیداروں کو ذمہ داریاں تفویض کی گئیں اور تنظیمی شناخت کارڈز کی تقسیم عمل میں آئی۔ اس موقع پر یوتھ تنظیم کے ممبران نے چیئرمین نصیب چند کے کردار کو سراہتے ہوئے اُن کے تعاون اور رہنمائی پر دلی شکریہ ادا کیا۔تنظیم کے نئے ڈھانچے میں چیئرمین: پادری دانش مسیح۔صدر افراہیم گل۔سیکرٹری ایرک گل۔خزانچی: ذیشان گل۔ایونٹ کوآرڈینیٹر زبیر مسیح۔انفارمیشن سیکیورٹی آفیسر یوسف یوحنا۔کمیونیکیشن کوآرڈینیٹر امان اعجاز شامل تھے۔ تقریب میں نوجوانوں کی بڑی تعداد نے شرکت کی اور یوتھ تنظیم کی نئی قیادت کو مبارکباد پیش کی۔ شرکاء نے امید ظاہر کی کہ یہ تنظیم نوجوانوں کی رہنمائی اور سماجی و فلاحی کاموں میں نمایاں کردار ادا کرے گی۔تقریب کے اختتام پر اجتماعی دعا کی گئی اور تمام شرکاء نے یوتھ تنظیم کی کامیابی، ترقی اور مستقبل کے منصوبوں کے لیے نیک تمناؤں کا اظہار کیا۔اس کے علاوہ اقلیتی مشران لازر مسیح ۔سدیر مسیح ۔یوسف مسیح اور اقبال گیل بھی موجود تھے

02/09/2025

کمشنر کوہاٹ کا صبح سویرے مختلف بازاروں کا اچانک دورہ — بارش کے بعد انتظامی سرگرمیاں تیز
کمشنر کوہاٹ ڈویژن معتصم باللہ شاہ نے آج صبح سویرے کوہاٹ شہر کے مختلف بازاروں کا اچانک دورہ کیا اور حالیہ بارشوں کے بعد کی صورتحال کا تفصیلی جائزہ لیا۔ ان کے اس غیر اعلانیہ دورے کا مقصد شہری سہولیات، نکاسی آب، صفائی ستھرائی اور ٹریفک کی روانی کو موقع پر جا کر چیک کرنا تھا۔ کمشنر کوہاٹ معتصم باللہ شاہ نے بارش کے باعث پیدا ہونے والے مسائل، خصوصاً پانی کی نکاسی اور صفائی کے نظام کا معائنہ کیا اور موقع پر موجود بلدیہ اور دیگر متعلقہ اداروں کے افسران کو ہدایات جاری کیں کہ کسی بھی قسم کی کوتاہی برداشت نہیں کی جائے گی۔عوامی حلقوں نے کمشنر کے اس اقدام کو سراہتے ہوئے کہا ہے کہ کوہاٹ کی تاریخ میں پہلی بار کسی اعلیٰ سرکاری افسر نے اس انداز میں براہ راست میدان میں آ کر حالات کا جائزہ لیا ہے، جو کہ قابل تعریف اور خوش آئند اقدام ہے۔ معتصم باللہ شاہ نے میڈیا سے گفتگو کرتے ہوئے کہا کہ شہریوں کو بنیادی سہولیات کی فراہمی ضلعی انتظامیہ کی اولین ترجیح ہے اور تمام متعلقہ ادارے ہمہ وقت متحرک اور چوکس رہیں گے تاکہ کسی بھی ہنگامی صورتحال سے مؤثر طریقے سے نمٹا جا سکے۔

27/08/2025

ڈویژن ہیڈکوارٹر اسپتال KDA کوہاٹ کے کیفے اور ریسٹورنٹس سیل، تین افراد گرفتار
عوامی شکایات پر فوری کارروائی کرتے ہوئے ڈپٹی کمشنر کوہاٹ رحیم اللہ محسود کی ہدایت پر ایڈیشنل اسسٹنٹ کمشنر ون اور حلال فوڈ اتھارٹی کی مشترکہ ٹیم نے ڈسٹرکٹ ہیڈکوارٹر اسپتال کوہاٹ میں قائم کیفے، ریسٹورنٹ اور فاسٹ فوڈ مراکز کا تفصیلی معائنہ کیا۔ کارروائی کے دوران ان کاروباری مراکز میں سرکاری نرخ سے زائد قیمتوں پر اشیاء کی فروخت، ایکسپائر کپ کیک اور بریڈ کی دستیابی، سالن میں ممنوع چائنہ سالٹ کا استعمال، ملازمین کے میڈیکل ٹیسٹ نہ ہونے، گلی سڑی چٹنی، کھلے ڈسٹ بن، ممنوع پلاسٹک ڈرم، اور غیر معیاری اجزاء کا استعمال پایا گیا۔علاوہ ازیں پکی اور ناپکی اشیاء ایک ساتھ رکھنے، غیر معیاری چائے، ٹوٹے برتنوں، اور صفائی کے ناقص انتظامات، کم عمر لڑکوں سے مشقت لینے، کچن اسٹاف کی صفائی نہ ہونے، اور لائسنس کی عدم موجودگی جیسے سنگین خلاف ورزیاں بھی رپورٹ ہوئیں۔
تمام خلاف ورزیوں کے پیش نظر تینوں مراکز کو موقع پر سیل کر دیا گیا، جبکہ تین افراد کو گرفتار کر کے پولیس کے حوالے کیا گیا۔ ضبط شدہ غیر معیاری اشیاء کو بحقِ سرکار ضبط کر لیا گیا۔ضلعی انتظامیہ نے یقین دہانی کروائی ہے کہ عوامی صحت سے کھیلنے والے عناصر کے خلاف سخت کارروائی جاری رہے گی۔

25/08/2025

عوامی نیشنل پارٹی کے سربراہ صدر اسفندیار ولی خان نے پی ٹی آئی ایم پی اے شفیع جان کو 10 کروڑ ہرجانے نوٹس بھیج دیا۔ پی ٹی آئی کے ممبر صوبائی اسمبلی شفیع جان نے 22 اگست کو اسمبلی فلور پر تقریر دوران اسفندیار ولی خان پر بے جا الزامات لگائے۔ شفیع جان نے اپنی تقریر میں اسفندیار ولی خان پر پختونوں کے سر پر ڈالر لینے کا الزام لگایاتھا۔ شفیع جان نے اسمبلی تقریر کی ویڈیو اپنے ذاتی فیس بک پیچ پر شیئر کی ۔اسفندیارولی خان کے وکیل کی طرف سے جاری کردہ نوٹس میں کہاگیا کہ بے جا اور سنگین الزامات سے میرے موکل کی دل آزاری ہوئی ہے ۔ اس سے پہلے پی ٹی آئی کے سابق صوبائی وزیر شوکت یوسفزئی نے بھی اسی طرح کے الزامات لگائے تھے۔شوکت یوسفزئی الزامات ثابت نہ کرسکے اور کیس ان کے خلاف ڈگری ہوا۔ نوٹس میں کہا گیا کہ شفیع جان 15 دن کے اندر معافی مانگے اور ویڈیو فیس پیج سے ڈیلیٹ کرلیں بصورت دیگر قانون کے مطابق کارروائی کا حق رکھتے ہیں۔

25/08/2025

اہم اعلان