Zamong Kohat

04/06/2026

نقل مافیا کی حوصلہ شکنی کریں۔

01/06/2026

اسسٹنٹ ڈائریکٹر انڈسٹریز اینڈ کنزیومر کوہاٹ ملک صفدر اعوان نے معروف سماجی و کاروباری شخصیت ملک اقبال سے ان کے حجرہ میں ملاقات کی۔ اس موقع پر سماجی کارکن ایثار علی بنگش اور وسیم گیلانی بھی موجود تھے۔ملاقات کے دوران ملک اقبال ویلفیئر ٹرسٹ کوہاٹ کی رجسٹریشن، آئین کی تیاری اور دیگر قانونی و انتظامی دستاویزات کے حوالے سے تفصیلی تبادلہ خیال کیا گیا۔اسسٹنٹ ڈائریکٹر انڈسٹریز اینڈ کنزیومر ملک صفدر اعوان نے ٹرسٹ کی رجسٹریشن کے عمل میں ہر ممکن تعاون فراہم کرنے کی یقین دہانی کرائی اور اس فلاحی اقدام کو معاشرے کے لیے خوش آئند قرار دیا۔اس موقع پر سماجی کارکن ایثار علی بنگش نے گفتگو کرتے ہوئے کہا کہ ملک اقبال ویلفیئر ٹرسٹ کوہاٹ کا قیام ایک قابلِ تحسین اور مثبت قدم ہے۔انہوں نے کہا کہ یہ تنظیم اپنے پلیٹ فارم کے ذریعے تعلیمی اداروں، بیواؤں، کھیلوں کی ٹیموں، مستحق خاندانوں اور معاشرے کے غریب ترین طبقات کی مدد اور فلاح و بہبود کے لیے بھرپور کردار ادا کرے گی۔ انہوں نے امید ظاہر کی کہ ٹرسٹ مستقبل میں علاقے میں سماجی خدمات کے فروغ میں اہم سنگِ میل ثابت ہوگا۔ملک اقبال نے اسسٹنٹ ڈائریکٹر ملک صفدر اعوان، ایثار علی بنگش اور دیگر شرکاء کا شکریہ ادا کرتے ہوئے کہا کہ وہ عرصہ دراز سے فلاحی سرگرمیوں میں مصروف ہیں اور معاشرے کے پسماندہ خاندانوں، غریب طلبہ، قیدیوں اور دیگر ضرورت مند افراد کی مدد کے لیے کام کر رہے ہیں۔ انہوں نے کہا کہ ویلفیئر ٹرسٹ کی باقاعدہ رجسٹریشن مکمل ہونے کے بعد فلاحی کاموں کا دائرہ مزید وسیع کیا جائے گا اور زیادہ منظم انداز میں عوامی خدمت کا سلسلہ جاری رکھا جائے گا۔انہوں نے اس عزم کا اظہار کیا کہ ملک اقبال ویلفیئر ٹرسٹ کوہاٹ علاقے میں سماجی بہبود، تعلیم، انسانی خدمت اور رفاہِ عامہ کے منصوبوں کے ذریعے مستحق افراد کی زندگیوں میں مثبت تبدیلی لانے کے لیے بھرپور کردار ادا کرے گا۔

24/05/2026

سابق وائس پریزیڈنٹ کینٹ بورڈ کوہاٹ محسن عتیق نے وارڈ ون کا دیرینہ پانی کا مسئلہ حل کر دیا۔45 لاکھ روپے کی لاگت سے ٹیوب ویل سولرائزیشن منصوبہ مکمل، سابق وائس پریزیڈنٹ کینٹ بورڈ کوہاٹ محسن عتیق کی خصوصی کاوشوں سے وارڈ ون کے عوام کا پینے کے صاف پانی کا دیرینہ مسئلہ حل ہو گیا۔ 45 لاکھ روپے کی لاگت سے ٹیوب ویل سولرائزیشن منصوبہ کامیابی کے ساتھ مکمل کر لیا گیا ہے، جس کے بعد بجلی کی طویل اور غیر اعلانیہ لوڈشیڈنگ کے باوجود شہریوں کو پانی کی فراہمی بلا تعطل جاری رہے گی۔تفصیلات کے مطابق وارڈ ون کے مختلف علاقوں خصوصاً سپرنگ ویلی، اندرون کینٹ، شملہ پہاڑی، نیازی محلہ اور دیگر ملحقہ آبادیوں کے مکینوں کو عرصہ دراز سے پینے کے صاف پانی کی شدید قلت کا سامنا تھا۔ بجلی کی بندش کے باعث ٹیوب ویل اکثر غیر فعال رہتے تھے جس سے شہریوں کو شدید مشکلات پیش آتی تھیں۔ محسن عتیق نے عوامی مسائل کے حل کو ترجیح دیتے ہوئے ٹیوب ویل کو سولر سسٹم پر منتقل کرنے کے منصوبے پر خصوصی توجہ دی، جس کے نتیجے میں اب مذکورہ علاقوں میں صاف پانی کی فراہمی کا مسئلہ بڑی حد تک حل ہو چکا ہے۔ علاقہ مکینوں نے اس منصوبے کی تکمیل پر خوشی کا اظہار کرتے ہوئے محسن عتیق کی کاوشوں کو سراہا اور اسے عوامی خدمت کا بہترین اقدام قرار دیا۔اس موقع پر سابق وائس پریزیڈنٹ کینٹ بورڈ کوہاٹ محسن عتیق نے اسٹیشن کمانڈر ملک شاہد نواز اور سی او کینٹ بورڈ کوہاٹ کا خصوصی شکریہ ادا کرتے ہوئے کہا کہ اس اہم عوامی فلاحی منصوبے کی منظوری اور تکمیل میں ان کا تعاون قابلِ تحسین ہے۔ انہوں نے کہا کہ عوامی خدمت ہی ان کی اولین ترجیح ہے اور مستقبل میں بھی علاقے کی ترقی اور بنیادی سہولیات کی فراہمی کے لیے اپنی کوششیں جاری رکھیں گے۔

23/05/2026

انسپکٹر جنرل جیل خانہ جات خیبرپختونخوا، ریحان گل خٹک سے ڈسٹرکٹ انسانی حقوق کمیٹی کے رکن اور کوہاٹ پریس کلب کے ایگزیکٹو ممبر ایثار علی بنگش نے اُن کے دفتر میں ملاقات کی۔ ملاقات کے دوران ڈسٹرکٹ جیل کوہاٹ میں مخیر حضرات کے تعاون سے جاری فلاحی، اصلاحی اور قیدیوں کی فلاح و بہبود سے متعلق مختلف منصوبوں پر تفصیلی تبادلۂ خیال کیا گیا۔اس موقع پر جیلوں میں قیدیوں کی تعلیم، تربیت، بحالی اور اصلاحی اقدامات پر بھی گفتگو ہوئی۔ملاقات کے دوران آئی جی جیل خانہ جات خیبرپختونخوا ریحان گل خٹک نے ایثار علی بنگش کی سماجی خدمات اور قیدیوں کی فلاح کے لیے کی جانے والی کاوشوں کو سراہتے ہوئے کہا کہ وزیراعلیٰ خیبرپختونخوا کے وژن کے مطابق صوبے کی جیلوں کو روایتی قید خانوں کے بجائے جدید اصلاحی مراکز میں تبدیل کرنے کے لیے عملی اقدامات کیے جا رہے ہیں۔انہوں نے کہا کہ محکمہ جیل خانہ جات کا مقصد صرف قیدیوں کو سزا دینا نہیں بلکہ انہیں ایک بہتر انسان، باعزت شہری اور معاشرے کا مفید فرد بنانا ہے۔ریحان گل خٹک نے کہا کہ محکمہ جیل خانہ جات کے موجودہ نظام کو “Punitive” یعنی سزا پر مبنی ماڈل سے “Reformative” یعنی اصلاحی اور بحالی کے ماڈل کی طرف منتقل کیا جا رہا ہے۔اس مقصد کے تحت قیدیوں کی ذہنی، اخلاقی، تعلیمی اور فنی تربیت پر خصوصی توجہ دی جا رہی ہے تاکہ وہ سزا مکمل کرنے کے بعد معاشرے پر بوجھ بننے کے بجائے باعزت اور خودمختار زندگی گزار سکیں۔انہوں نے بتایا کہ صوبے کی مختلف جیلوں میں صنعتی اور تکنیکی تربیتی مراکز قائم کیے جا چکے ہیں، جہاں قیدیوں کو کمپیوٹر کورسز، الیکٹریشن، کارپینٹری، سلائی کڑھائی اور دیگر فنی ہنر سکھائے جا رہے ہیں۔ اس کے علاوہ ناخواندہ قیدیوں کے لیے بنیادی تعلیم کا بھی انتظام کیا گیا ہے، جبکہ مزید تعلیم حاصل کرنے کے خواہشمند قیدیوں کو میٹرک، ایف اے، بی اے، دینی تعلیم، حفظِ قرآن اور ترجمۂ قرآن کی سہولیات فراہم کی جا رہی ہیں۔آئی جی جیل خانہ جات نے کہا کہ دینی تعلیم اور حفظِ قرآن مکمل کرنے والے قیدیوں کو قانونی طور پر سزا میں رعایت بھی دی جاتی ہے تاکہ انہیں مثبت تبدیلی اور اصلاح کی جانب راغب کیا جا سکے۔ انہوں نے کہا کہ محکمہ جیل خانہ جات کی کوشش ہے کہ جیل کی زندگی قیدیوں کے لیے مایوسی کے بجائے امید، اصلاح اور بہتر مستقبل کی نئی شروعات ثابت ہو۔انہوں نے کہا کہ برصغیر میں قیدیوں کے لیے پہلا باقاعدہ قانونی نظام برطانوی دور حکومت میں متعارف کرایا گیا تھا، جبکہ پاکستان میں جیلوں اور قیدیوں سے متعلق بنیادی قانون “Prisons Act 1894” ہے، جو آج بھی نافذ العمل ہے۔ ان کا کہنا تھا کہ خیبرپختونخوا جیل خانہ جات و اصلاحات ایکٹ 2024 اس وقت محکمہ قانون میں زیرِ غور ہے اور اس کی جانچ پڑتال جاری ہے۔ریحان گل خٹک نے مزید انکشاف کیا کہ ڈسٹرکٹ جیل کوہاٹ کے ساتھ تقریباً 475 کنال اضافی اراضی موجود ہے اور اسے سینٹرل جیل کا درجہ دینے کے لیے ایڈیشنل چیف سیکرٹری کے ساتھ تفصیلی اور مثبت اجلاس منعقد ہو چکا ہے۔ اس وقت یہ معاملہ فنانس ڈیپارٹمنٹ میں زیر غور ہے اور امید ہے کہ جلد ہی ڈسٹرکٹ جیل کوہاٹ کو سینٹرل جیل کا درجہ دینے کا باضابطہ نوٹیفکیشن جاری کر دیا جائے گا۔انہوں نے بتایا کہ مختلف جیلوں میں ماڈل انٹرویو رومز قائم کیے گئے ہیں، جہاں 800 سے زائد ملاقاتی اپنے عزیز و اقارب سے بہتر ماحول میں ملاقات کرتے ہیں۔ اس کے علاوہ جیلوں میں ای-ملاقات کا نظام بھی متعارف کرایا گیا ہے، جس کے ذریعے ملک اور بیرونِ ملک کہیں سے بھی قیدیوں کے ساتھ آن لائن ملاقات ممکن بنائی گئی ہے۔اب تک 10 ہزار سے زائد افراد اس سہولت سے فائدہ اٹھا چکے ہیں۔آئی جی جیل خانہ جات کے مطابق منشیات کے عادی افراد کے علاج اور بحالی کے لیے مختلف جیلوں میں ڈرگ ری ہیبلیٹیشن سینٹرز (DRCs) قائم کیے گئے ہیں۔ انہوں نے مزید کہا کہ ڈسٹرکٹ جیل کوہاٹ کو سینٹرل جیل میں تبدیل کرنے کے ساتھ ساتھ ملاکنڈ ڈویژن کے لیے ضلع ملاکنڈ میں بھی ایک جدید سینٹرل جیل قائم کی جائے گی تاکہ جیل اصلاحات کے عمل کو مزید مؤثر بنایا جا سکے۔

22/05/2026

ڈپٹی کمشنر کوہاٹ محمد نواز وزیر کی ہدایت پر ڈسٹرکٹ ویجلینس کمیٹی کے ممبر ایثار علی بنگش نے پاکستان بیت المال سویٹ ہوم کوہاٹ کا دورہ کیا۔ اس موقع پر اسسٹنٹ ڈائریکٹر بیت المال کوہاٹ غفار خان، اسٹاف اور طلبہ بھی موجود تھے۔ایثار علی بنگش نے بچوں سے مشقت، جبری مشقت، ون ویلنگ اور بچوں کے تحفظ سے متعلق آگاہی سیشن کا انعقاد کیا۔ سیشن کے دوران طلبہ کو ان سماجی برائیوں کے نقصانات اور بچوں کے حقوق و تحفظ کے حوالے سے آگاہ کیا گیا۔اسسٹنٹ ڈائریکٹر بیت المال کوہاٹ غفار خان نے ڈپٹی کمشنر کوہاٹ محمد نواز وزیر اور ایثار علی بنگش کا شکریہ ادا کرتے ہوئے امید ظاہر کی کہ سویٹ ہوم میں اس طرح کے بامقصد سیشنز کا سلسلہ آئندہ بھی جاری رکھا جائے گا۔

19/05/2026

آؤ روضہ رسول ﷺ پر سلام پیش کرتے ہیں

17/05/2026

عوامی نیشنل پارٹی ساؤتھ وزیرستان اپر کے ضلعی صدر انور حیات نے اپر وزیرستان میں مبینہ کرپشن، بدعنوانی اور ترقیاتی منصوبوں میں بے ضابطگیوں پر شدید تحفظات کا اظہار کرتے ہوئے مطالبہ کیا ہے کہ علاقے میں “لوٹ کھسوٹ کا بازار” فوری طور پر بند کیا جائے۔ انہوں نے الزام عائد کیا کہ مقامی ایم پی اے من پسند افراد کو ٹھیکے اور نوکریاں دے رہے ہیں جبکہ عوام بنیادی سہولیات سے محروم ہیں۔پشاور پریس کلب میں علاقہ مکینوں کے ہمراہ پریس کانفرنس سے خطاب کرتے ہوئے انور حیات نے کہا کہ اپر وزیرستان کے عوام آج بھی پینے کے صاف پانی، صحت کی معیاری سہولیات اور تھری جی و فور جی انٹرنیٹ جیسی بنیادی ضروریات سے محروم ہیں۔ انہوں نے کہا کہ ترقیاتی فنڈز عوامی فلاح پر خرچ کرنے کے بجائے مبینہ طور پر مخصوص افراد کو نوازنے کے لیے استعمال کیے جا رہے ہیں۔انہوں نے شین وام اسٹیڈیم کا ٹینڈر منسوخ کرنے پر شدید احتجاج کرتے ہوئے کہا کہ اس اقدام سے علاقے کے نوجوانوں کے مستقبل کو نقصان پہنچایا گیا ہے۔ ان کا کہنا تھا کہ کھیلوں کے میدان نوجوان نسل کی مثبت سرگرمیوں کے لیے نہایت اہم ہیں، مگر بدقسمتی سے انہیں بھی سیاست اور مفادات کی نذر کیا جا رہا ہے۔ انہوں نے مطالبہ کیا کہ اسٹیڈیم کے ٹینڈر کی منسوخی کی وجوہات عوام کے سامنے لائی جائیں۔انور حیات نے مزید کہا کہ بعض بااثر افراد سیاسی شخصیات کے نام استعمال کرتے ہوئے اپر وزیرستان میں مبینہ لوٹ مار اور اقربا پروری میں ملوث ہیں۔ انہوں نے دعویٰ کیا کہ اگر وزیراعلیٰ کو شکایات بھی کی جائیں تو ان پر کوئی توجہ نہیں دی جاتی۔انہوں نے چیف آف آرمی اسٹاف، وزیراعظم شہباز شریف اور چیف سیکرٹری خیبر پختونخوا سے اپیل کی کہ اپر وزیرستان کے حالات کا نوٹس لیا جائے اور مبینہ کرپشن و بدانتظامی کے خاتمے کے لیے مؤثر اقدامات کیے جائیں۔ انور حیات نے خبردار کیا کہ اگر صورتحال نہ بدلی گئی تو وہ عدالت سے رجوع کریں گے اور بعد ازاں اپر وزیرستان کے عوام کے ہمراہ خیبر پختونخوا اسمبلی کے سامنے احتجاجی دھرنا دیا جائے گا، جس کی ذمہ داری مقامی ایم پی اے پر عائد ہوگی۔

17/05/2026

08/05/2026

آغوش الخدمت کوہاٹ کے آر ایم او سید یوسف شاہ نے کوہاٹ چیمبر آف کامرس اینڈ انڈسٹری کے دفتر میں صدر کوہاٹ چیمبر رشید پراچہ اور سماجی شخصیت ایثار علی بنگش سے ملاقات کی۔ ملاقات کے دوران آغوش الخدمت میں زیرِ کفالت یتیم اور مستحق بچوں کی فلاح و بہبود، تعلیم، صحت اور رہائش سے متعلق امور پر تبادلۂ خیال کیا گیا۔ سید یوسف شاہ نے آغوش الخدمت کے اغراض و مقاصد اور جاری فلاحی سرگرمیوں پر روشنی ڈالتے ہوئے بتایا کہ ادارہ معاشرے کے مخیر حضرات اور تاجر برادری کے تعاون سے بے سہارا بچوں کو بہتر مستقبل فراہم کرنے کے لیے کوشاں ہے۔ اس موقع پر صدر چیمبر رشید پراچہ نے آغوش الخدمت کی خدمات کو سراہتے ہوئے یقین دہانی کرائی کہ کوہاٹ چیمبر آف کامرس اینڈ انڈسٹری، تاجر برادری اس نیک مقصد کے لیے ہر ممکن تعاون جاری رکھے گی۔