Zamong Kohat

06/09/2026

کوھاٹ یوم دفاع چھ ستمبر کے حوالے سے استرزئی بالا میں شہید میجر خادم حسین (ستارہ جرات) کو خراج عقیدت پیش کرنے کے لئے ایک پُروقار تقریب کا انعقاد کیا گیا,جس میں شہید خادم حسین کے فرزند بریگیڈیئر اختر حسین، کرنل حیدر علی، سماجی کارکن ایثارعلی بنگش۔کرنل ریٹائرڈ زاہد بنگش۔کرنل ریٹائرڈ اظہر علی۔سابق ڈی ایس پی کریمان علی۔ایس ایچ او تھانہ استرزئی عدنان آفریدی۔نسیم عباس اور علاقہ مشران اور عوام نے بھر پور شرکت کی بریگیڈیئر اختر حسین نے اس موقع پر 6 ستمبر 1965 کے شہیدوں کو زبردست الفاظ میں خراج عقیدت پیش کیا گیا اور ان کی ایصال ثواب کیلئے قرآن خوانی کی گئی اس موقع پر تقریب سےخطاب کرتے ہوئے شہید میجر خادم حسین کے فرزند بریگیڈیئر اختر حسین نےکہا کہ علاقہ بنگش کے عوام افواج پاکستان کے ساتھ شانہ بشانہ کھڑے ہیں اور ان کے ساتھ ہر قسم کی قربانی کے لئے ہمہ وقت تیار ہیں۔ان کا کہنا تھا کہ 6ستمبر 1965 کے عظیم معرکے میں ہمارے والد شہید میجر خادم حسین اور دیگر آفیسرز اور جوانوں نے شجاعت اور جوانمردی کے وہ جوہر دکھائے کہ رہتی دنیا تک ان کا تذکرہ ہوتا رہے گا وطن پر جان نچھاور کرنے والے ہمارے ہیروز ہیں ان کا کہنا تھا کہ 6 ستمبر 1965 پاکستان کی تاریخ کا وہ دن جب جرأت اور بہادری کی نئی تاریخ رقم ہوئی ۔ان تمام شہیدوں، غازیوں دلیروں اور بہادروں کو سلام پیش کرتے ہیں،تقریب کے اختتام پر ملک کی سلامتی اور خوشحالی کے لئے خصوصی دعاکی گئیں،

28/08/2026

ای-کھلی کچہری
تاریخ: 31 اگست 2026
بروز پیر، بوقت 12:00 بجے سے 1:00 بجے تک
وزیراعلیٰ خیبرپختونخوا کے گڈ گورننس کے تحت اور چیف سیکرٹری خیبرپختونخوا سید شہاب علی شاہ کی ہدایت پر کمشنر کوہاٹ ڈویژن سید معتصم باللہ شاہ عوامی مسائل کے فوری حل اور شہریوں کو بروقت ریلیف کی فراہمی کے لیے ای-کھلی کچہری کا انعقاد کر رہے ہیں۔
اس موقع پر کمشنر کوہاٹ ڈویژن کے آفیشل فیس بک پیج پر براہِ راست (Live) آ کر شہریوں کی شکایات اور مسائل سنے جائیں گے اور ان کے حل کے لیے متعلقہ حکام کو فوری اقدامات کی ہدایات جاری کی جائیں گی۔
تمام شہریوں سے گزارش ہے کہ وہ اپنی شکایات اور مسائل سے آگاہ کرنے، متعلقہ امور کی نشاندہی کرنے اور براہِ راست اپنی آواز حکام تک پہنچانے کے لیے ای-کھلی کچہری میں بھرپور شرکت یقینی بنائیں۔
Facebook Official Page: Commissioner Kohat Division Kohat
فون نمبر: 09229260002
سید معتصم باللہ شاہ
کمشنر کوہاٹ ڈویژن

26/08/2026

پشاور: عوامی نیشنل پارٹی خیبر پختونخوا کے صدر میاں افتخار حسین، تحصیل بڈھ بیر میں سابق آزاد امیدوار (پی کے 77) فضل محمد خان آفریدی کی شمولیت کے موقع پر

|

26/08/2026

25/08/2026

ڈپٹی کمشنر کوہاٹ محمد نواز وزیر نے نوجوان اور باصلاحیت کوہ پیما ماریہ بنگش کو کوہ پیمائی اور ایڈونچر اسپورٹس کے شعبے میں ان کی شاندار لگن، بے مثال ہمت اور نمایاں کامیابیوں کے اعتراف میں نقد انعام سے نوازا۔اس موقع پر ماریہ بنگش کی حوصلہ افزائی کرتے ہوئے کہا گیا کہ نوجوانوں، بالخصوص خواتین کی کھیلوں اور مہم جوئی کی سرگرمیوں میں بڑھتی ہوئی شرکت ایک مثبت اور خوش آئند رجحان ہے۔ماریہ بنگش نے سال 2024 میں مشہور پہاڑی مقامات میرانجانی اور مشکپوری کی پگڈنڈیوں سے اپنے کوہ پیمائی کے سفر کا آغاز کیا۔ ابتدائی مرحلے سے ہی انہوں نے عزم، حوصلے اور جذبے کے ساتھ مشکل اور چیلنجنگ پہاڑی مہم جوئی کا سلسلہ جاری رکھا اور کوہ پیمائی کے میدان میں اپنی صلاحیتوں کا لوہا منوایا۔ ان کی مسلسل محنت اور ایڈونچر اسپورٹس سے وابستگی نوجوان نسل کے لیے بالخصوص ایک قابلِ تقلید مثال قرار دی گئی۔تقریب کے دوران ریجنل اسپورٹس آفیسر کوہاٹ اسد خان نے بھی ماریہ بنگش کی کامیابیوں کو سراہتے ہوئے انہیں تعریفی سرٹیفکیٹ پیش کیا۔ انہوں نے کہا کہ ماریہ بنگش نے اپنی صلاحیتوں اور عملی جدوجہد کے ذریعے نہ صرف ذاتی سطح پر کامیابیاں حاصل کیں بلکہ نوجوانوں میں کھیلوں، کوہ پیمائی اور صحت مند بیرونی سرگرمیوں کے فروغ کے لیے بھی مثبت کردار ادا کیا۔ڈپٹی کمشنر کوہاٹ محمد نواز وزیر نے اس موقع پر کہا کہ نوجوانوں کو مثبت اور صحت مند سرگرمیوں کی جانب راغب کرنا وقت کی اہم ضرورت ہے۔انہوں نے ماریہ بنگش کی ہمت اور عزم کو سراہتے ہوئے امید ظاہر کی کہ وہ مستقبل میں بھی کوہ پیمائی اور ایڈونچر اسپورٹس کے میدان میں مزید کامیابیاں حاصل کریں گی اور ضلع کوہاٹ و ملک کا نام روشن کریں گی۔محمد نواز وزیر اور ریجنل اسپورٹس آفیسر اسد خان نے ماریہ بنگش کو خصوصی طور پر اس بات کی ترغیب دی کہ وہ دیگر نوجوانوں، خصوصاً خواتین کو کھیلوں، کوہ پیمائی، ایڈونچر اور دیگر صحت مند بیرونی سرگرمیوں میں بھرپور حصہ لینے کے لیے حوصلہ افزائی کرتی رہیں۔ انہوں نے کہا کہ خواتین کو آگے بڑھنے کے مواقع اور مناسب حوصلہ افزائی فراہم کی جائے تو وہ ہر شعبے میں اپنی صلاحیتوں کا بھرپور اظہار کرسکتی ہیں۔اس موقع پر ماریہ بنگش کی شاندار کارکردگی کو کوہاٹ کے نوجوانوں اور خواتین کے لیے باعثِ فخر قرار دیتے ہوئے کہا گیا کہ ان جیسے باہمت نوجوان ملک میں کھیلوں اور ایڈونچر کلچر کے فروغ میں اہم کردار ادا کر سکتے ہیں۔ ضلعی انتظامیہ اور محکمہ کھیل کی جانب سے بھی باصلاحیت نوجوانوں کی حوصلہ افزائی اور کھیلوں کے فروغ کے لیے ہر ممکن تعاون جاری رکھنے کے عزم کا اظہار کیا گیا۔

20/08/2026

محکمہ جنگلات اورکزئی کے قانونی اختیارات میں مبینہ مداخلت، ڈی ایف او اورکزئی کا ڈپٹی کمشنر اورکزئی سے نوٹس لینے کا مطالبہ
ڈویژنل فاریسٹ آفیسر، اورکزئی فاریسٹ ڈویژن ہنگو نے ڈپٹی کمشنر اورکزئی کو ایک تحریری مراسلے کے ذریعے محکمہ جنگلات کے قانونی اختیارات اور فرائض میں مبینہ مداخلت کا معاملہ اٹھاتے ہوئے فوری انتظامی اور قانونی توجہ دینے کی درخواست کی ہے۔ مراسلے میں مؤقف اختیار کیا گیا ہے کہ ایڈیشنل اسسٹنٹ کمشنر کلایہ کی جانب سے جنگلاتی پیداوار کی نقل و حمل اور ٹرانسپورٹ پاسز سے متعلق معاملات میں مبینہ مداخلت خیبر پختونخوا فاریسٹ آرڈیننس 2002 اور خیبر پختونخوا فاریسٹ پروڈیوس ٹرانزٹ رولز 2004 کے تحت محکمہ جنگلات کے قانونی دائرۂ اختیار کو متاثر کر رہی ہے۔ڈویژنل فاریسٹ آفیسر کی جانب سے لکھے گئے مراسلے میں کہا گیا ہے کہ جنگلاتی پیداوار کے انتظام، تحفظ اور اس کی قانونی نقل و حمل کو منظم کرنے کی بنیادی ذمہ داری محکمہ جنگلات اور متعلقہ مجاز فاریسٹ افسران پر عائد ہوتی ہے۔ مراسلے کے مطابق خیبر پختونخوا فاریسٹ آرڈیننس 2002 کی دفعہ 26 کے تحت ڈویژنل فاریسٹ آفیسر اپنے دائرۂ اختیار میں جنگلاتی پیداوار کے انتظام، تحفظ اور ضابطہ کاری کا مجاز اور ذمہ دار اتھارٹی ہے۔مراسلے میں بتایا گیا ہے کہ محکمہ جنگلات کے تفویض کردہ اختیارات میں جنگلاتی پیداوار کی نقل و حمل کا ضابطہ اور کنٹرول، جنگلات سے متعلق جرائم کی روک تھام اور نشاندہی، قانون کے مطابق خلاف ورزیوں کے خلاف کارروائی اور جنگلاتی پیداوار کی قانونی نقل و حمل کے لیے ٹرانسپورٹ پاسز کا اجرا، تصدیق اور منسوخی شامل ہیں۔ڈی ایف او اورکزئی نے اپنے مؤقف میں کہا کہ خیبر پختونخوا فاریسٹ پروڈیوس ٹرانزٹ رولز 2004 کے رول 3 کے تحت کسی بھی جنگلاتی پیداوار کو مجاز فاریسٹ آفیسر کی جانب سے جاری کردہ درست ٹرانسپورٹ پاس کے بغیر منتقل نہیں کیا جا سکتا۔ مراسلے کے مطابق لکڑی یا دیگر جنگلاتی پیداوار کے ماخذ، ملکیت اور اصلیت کی تصدیق کے علاوہ ٹرانسپورٹ پاس کے اجرا اور توثیق کا مکمل عمل محکمہ جنگلات کے قانونی دائرۂ اختیار میں آتا ہے۔مراسلے میں ایک مخصوص واقعے کا حوالہ دیتے ہوئے کہا گیا ہے کہ 15 جولائی 2026 کو رجسٹریشن نمبر J-9637 والی ایک پک اپ گاڑی کو ایک پرانی منہدم شدہ عمارت سے حاصل کی گئی ایندھن کی لکڑی منتقل کرتے ہوئے پایا گیا۔ محکمہ جنگلات کے متعلقہ عملے نے گاڑی اور لکڑی کا معائنہ کیا اور لکڑی کے قانونی ماخذ اور ملکیت کے حوالے سے اطمینان کے بعد ٹرانسپورٹ پاس نمبر 02 مورخہ 15 جولائی 2026 جاری کیا گیا۔مراسلے کے مطابق محکمہ جنگلات کا دعویٰ ہے کہ تمام قانونی تقاضے پورے کرنے اور درست ٹرانسپورٹ پاس کی موجودگی کے باوجود مذکورہ گاڑی کو ایڈیشنل اسسٹنٹ کمشنر کلایہ نے روک لیا۔ خط میں الزام لگایا گیا ہے کہ اس کارروائی کے دوران قانونی نقل و حمل میں رکاوٹ ڈالی گئی، ڈرائیور سے اصل ٹرانسپورٹ پاس لے لیا گیا اور محکمہ جنگلات کے قانونی دائرۂ اختیار اور ڈویژنل فاریسٹ آفیسر کے اختیارات سے متعلق اختلاف پیدا ہوا۔ اسی مراسلے میں تازی خیل فاریسٹ چیک پوسٹ کا بھی ذکر کیا گیا ہے، جہاں محکمہ جنگلات کے عملے کے قبضے میں موجود اصل ٹرانسپورٹ پاسز مبینہ طور پر انتظامی ہدایات پر لے لیے جانے کا معاملہ اٹھایا گیا ہے۔ محکمہ جنگلات کے مطابق اس قسم کی کارروائیوں سے فیلڈ عملے کی سرکاری ذمہ داریوں کی انجام دہی متاثر ہو رہی ہے۔ ڈویژنل فاریسٹ آفیسر نے مراسلے میں قانونی مؤقف اختیار کیا ہے کہ فاریسٹ آرڈیننس 2002 اور ٹرانزٹ رولز 2004 کے تحت کسی ایگزیکٹو مجسٹریٹ یا انتظامی افسر کو مجاز فاریسٹ اتھارٹی کی جانب سے جاری کردہ ٹرانسپورٹ پاس کو ضبط کرنے یا یکطرفہ طور پر کالعدم قرار دینے کا اختیار حاصل نہیں۔ مراسلے میں یہ بھی کہا گیا ہے کہ اگر کسی ٹرانسپورٹ پاس کی اصلیت یا قانونی حیثیت کے بارے میں کوئی شک پیدا ہو تو معاملہ تصدیق کے لیے پاس جاری کرنے والی متعلقہ فاریسٹ اتھارٹی کو بھیجا جانا چاہیے۔مراسلے میں خیبر پختونخوا فاریسٹ آرڈیننس 2002 کی دفعہ 110 کا حوالہ دیتے ہوئے کہا گیا ہے کہ نیک نیتی کے ساتھ فرائض انجام دینے والے فاریسٹ افسران کو قانونی تحفظ حاصل ہے۔ اسی طرح دفعہ 79 اور خیبر پختونخوا فاریسٹ آفیسرز (پاورز، ڈیوٹیز اینڈ ریوارڈ) رولز 2004 کے رول 5 کا حوالہ دیتے ہوئے جرمانوں، ضبطی اور دیگر متعلقہ امور کے لیے مقررہ قانونی طریقۂ کار کی موجودگی پر زور دیا گیا ہے۔مراسلے میں کہا گیا ہے کہ محکمہ جنگلات کے قانونی معاملات میں مسلسل مداخلت سے ڈویژنل فاریسٹ آفیسر کے قانونی دائرۂ اختیار پر منفی اثر پڑ سکتا ہے، جنگلات سے متعلق قوانین کے نفاذ میں مشکلات پیدا ہو سکتی ہیں اور فیلڈ میں خدمات انجام دینے والے عملے کے حوصلے بھی متاثر ہو سکتے ہیں۔ محکمہ جنگلات کے مؤقف کے مطابق ایسی صورتحال جنگلاتی پیداوار کی غیر قانونی نقل و حمل کی روک تھام اور جنگلاتی وسائل کے تحفظ کے مقاصد میں بھی رکاوٹ بن سکتی ہے۔تاہم مراسلے میں ضلعی انتظامیہ کے امن و امان برقرار رکھنے کے کردار کو تسلیم کرتے ہوئے کہا گیا ہے کہ محکمہ جنگلات ضلعی انتظامیہ کے ساتھ مکمل تعاون اور بہتر باہمی رابطہ کاری کا حامی ہے۔ اس کے باوجود جنگلاتی پیداوار، ٹرانسپورٹ پاسز اور متعلقہ تکنیکی و قانونی معاملات خصوصی جنگلاتی قوانین کے تحت محکمہ جنگلات کے دائرۂ اختیار میں آتے ہیں۔ڈویژنل فاریسٹ آفیسر نے ڈپٹی کمشنر اورکزئی سے درخواست کی ہے کہ خیبر پختونخوا فاریسٹ آرڈیننس 2002 اور ٹرانزٹ رولز 2004 کے تحت ڈویژنل فاریسٹ آفیسر کے خصوصی اور قانونی اختیارات کو برقرار رکھنے اور ان کا باضابطہ اعتراف کرنے کے لیے اقدامات کیے جائیں۔ ضلعی انتظامیہ کے تمام متعلقہ افسران کو واضح ہدایات جاری کرنے کی بھی درخواست کی گئی ہے تاکہ وہ ٹرانسپورٹ پاسز کے اجرا، تصدیق اور نفاذ کے معاملات میں غیر ضروری مداخلت سے گریز کریں۔مراسلے میں مزید کہا گیا ہے کہ کسی بھی قسم کے شک یا ابہام کی صورت میں جنگلاتی پیداوار کی نقل و حمل میں رکاوٹ ڈالنے کے بجائے معاملہ تصدیق کے لیے متعلقہ ڈویژنل فاریسٹ آفیسر کے پاس بھیجا جائے۔ محکمہ جنگلات اور ضلعی انتظامیہ کے درمیان بہتر بین الادارہ جاتی رابطہ کاری کے لیے انتظامی ہدایات جاری کرنے کی درخواست بھی کی گئی ہے، تاکہ جنگلات سے متعلق قوانین پر ان کی اصل روح اور متن کے مطابق مؤثر عمل درآمد یقینی بنایا جا سکے۔ڈی ایف او اورکزئی نے ڈپٹی کمشنر سے فوری اور مؤثر مداخلت کی درخواست کرتے ہوئے امید ظاہر کی ہے کہ محکمہ جنگلات کے قانونی دائرۂ اختیار کے تحفظ، ضلع اورکزئی میں جنگلاتی وسائل کے مؤثر انتظام اور مختلف سرکاری اداروں کے درمیان بہتر تعاون کو یقینی بنانے کے لیے مناسب اقدامات کیے جائیں گے۔

11/08/2026

ملازمت کا اعلان
ایک معروف اور مستحکم تعمیراتی کمپنی کو قابل، باصلاحیت اور تجربہ کار امیدوار کی خدمات درکار ہیں۔
عہدہ: پروجیکٹ انجینئر (سول)
پروجیکٹ کا مقام: کوہاٹ، خیبر پختونخوا
تعلیمی قابلیت اور تجربہ
کسی تسلیم شدہ ادارے سے B.Sc. سول انجینئرنگ یا B.Tech سول انجینئرنگ کی ڈگری۔
تعمیراتی منصوبوں میں کم از کم 8 سے 10 سال کا متعلقہ عملی تجربہ۔
تعمیراتی کاموں کی تکمیل اور فنشنگ کے شعبے میں وسیع تجربہ رکھنے والے امیدواروں کو ترجیح دی جائے گی۔
اہم ذمہ داریاں اور مطلوبہ مہارتیں
سائٹ پر تمام تعمیراتی سرگرمیوں کی نگرانی، انتظام اور بروقت تکمیل کو یقینی بنانا۔
IPCs (Interim Payment Certificates) کی تیاری اور پراسیسنگ۔
مقدار کا سروے، Quantity Take-Off اور پیمائش کرنے کی مکمل صلاحیت۔
MRS کی اشیاء، نرخوں اور تکنیکی وضاحتوں کا مکمل علم۔
BOQs، پیمائشوں اور ٹھیکیداروں کے بلوں کی تیاری، جانچ اور تصدیق۔
MS Office، خصوصاً MS Excel اور متعلقہ تعمیراتی سافٹ ویئر پر مکمل عبور۔
کام کی پیش رفت، معیار اور منظور شدہ ڈرائنگز و تکنیکی وضاحتوں کے مطابق کام کی نگرانی۔
تعمیراتی و فنشنگ کاموں کی تکمیل اور سائٹ پر ان کے مؤثر انتظام کی مکمل صلاحیت۔
Electrical اور MEP Works کے حوالے سے مناسب تکنیکی معلومات۔
کنسلٹنٹس، کلائنٹ، سائٹ اسٹاف، ٹھیکیداروں اور دیگر متعلقہ اسٹیک ہولڈرز کے ساتھ مؤثر رابطہ اور ہم آہنگی۔
تعمیراتی طریقہ کار، پیمائش، دستاویزات اور پروجیکٹ کی تکنیکی ضروریات کی اچھی سمجھ۔
مطلوبہ امیدوار کی خصوصیات
مثالی امیدوار تکنیکی طور پر قابل، ذمہ دار، فعال اور بااعتماد ہو، جو سائٹ کے روزمرہ امور، تعمیراتی سرگرمیوں اور پروجیکٹ سے متعلق دستاویزات کو مؤثر انداز میں آزادانہ طور پر سنبھالنے کی صلاحیت رکھتا ہو۔
درخواست دینے کا طریقہ
دلچسپی رکھنے والے اور مذکورہ معیار پر پورا اترنے والے امیدوار درج ذیل نمبر پر رابطہ کریں:
واٹس ایپ: 0326-9925799
پروجیکٹ کا مقام: کوہاٹ، خیبر پختونخوا
نوٹ: صرف وہی امیدوار درخواست دینے کے اہل ہوں گے جو اوپر دی گئی تعلیمی قابلیت، تجربے اور مطلوبہ مہارتوں کے معیار پر پورا اترتے ہوں۔

09/08/2026

محکمہ جنگلات کوہاٹ کے ڈویژنل فاریسٹ آفیسر (DFO) وحدت ذیشان کی ہدایت پر رینج فاریسٹ آفیسر اعتبار علی نے علاقہ بنگش کے گاؤں علی زئی میں صدیوں پرانے تاریخی پیپل کے درخت کے زمین بوس ہونے والی جگہ کا دورہ کیا اور صورتحال کا جائزہ لیا۔اس موقع پر سماجی کارکن ایثار علی بنگش، سید مدثر حسین نقوی، معروف شخصیت ڈاکٹر ملک محمد بشیر علی زئی اور علاقے کے دیگر مشران بھی موجود تھے۔ رینج فاریسٹ آفیسر اعتبار علی نے زمین بوس ہونے والے تاریخی درخت کی جگہ اور اطراف کا تفصیلی معائنہ کیا جبکہ مقامی افراد نے اس قدیم درخت کی تاریخی، ثقافتی اور ماحولیاتی اہمیت کے حوالے سے آگاہ کیا۔ڈاکٹر ملک محمد بشیر علی زئی نے اس موقع پر بریفنگ دیتے ہوئے بتایا کہ علی زئی گاؤں کا یہ قدیم پیپل کا درخت محض ایک تناور شجر نہیں تھا بلکہ یہ علاقے کی شناخت، روایات اور اجتماعی یادوں کا ایک اہم حصہ تھا۔ ان کا کہنا تھا کہ کئی نسلوں نے اس درخت کی گھنی چھاؤں میں وقت گزارا اور یہ درخت اہلِ علاقہ کے لیے ایک نمایاں تاریخی اور قدرتی ورثے کی حیثیت رکھتا تھا۔انہوں نے بتایا کہ تاریخی حوالوں کے مطابق علی زئی کے اس شجرِ کہن کی شہرت انیسویں صدی سے بھی چلی آ رہی تھی۔ 1873ء میں مشہور برطانوی سیاح اور جغرافیہ دان جنرل چارلس میک گریگر نے اپنی کتاب Central Asia میں علی زئی گاؤں کا ذکر کرتے ہوئے یہاں موجود ایک شاندار پیپل کے درخت کو گاؤں کی نمایاں شناخت قرار دیا تھا۔تاریخی تحریر کے مطابق اس دور میں علی زئی تقریباً 140 گھروں پر مشتمل ایک آبادی تھی، جہاں زیادہ تر بنگش قبیلے سے تعلق رکھنے والے افراد آباد تھے۔ گاؤں سرسبز میدانوں، چشموں اور بڑے درختوں کے درمیان واقع تھا، جبکہ یہ قدیم پیپل کا درخت علاقے کے قدرتی حسن اور تاریخی اہمیت کی علامت سمجھا جاتا تھا۔مقامی روایات کے مطابق یہ پیپل کا درخت نہایت قدیم اور غیر معمولی جسامت کا حامل تھا۔ اس کی گھنی اور وسیع شاخیں دور تک پھیلی ہوئی تھیں اور گرم موسم میں مسافروں، مقامی باشندوں اور راہ گیروں کے لیے قدرتی سایہ فراہم کرتی تھیں۔ اہلِ علاقہ کے نزدیک یہ درخت صرف ایک درخت نہیں بلکہ اپنی بستی کی صدیوں پرانی تاریخ، تہذیب اور شناخت کا اہم حصہ تھا۔اس تاریخی درخت کی ایک نمایاں خصوصیت یہ بھی تھی کہ یہ بڑی تعداد میں سبز طوطوں اور دیگر پرندوں کا محفوظ قدرتی مسکن تھا۔ صبح اور شام کے اوقات میں درخت پر بیٹھنے والے طوطوں اور دیگر پرندوں کی آوازیں علی زئی کی فضا کو ایک منفرد منظر اور قدرتی حسن عطا کرتی تھیں۔ درخت کے زمین بوس ہونے کے بعد نہ صرف علی زئی گاؤں کی ایک صدیوں پرانی قدرتی شناخت ختم ہو گئی بلکہ ہزاروں سبز طوطوں سمیت متعدد پرندے بھی اپنے قدرتی مسکن سے محروم ہو گئے۔ مقامی افراد کے مطابق درخت کے گرنے سے پرندوں کے گھونسلے اور آشیانے بھی متاثر ہوئے، جبکہ بڑی تعداد میں طوطے اور دیگر پرندے اپنے مسکن سے محروم ہو کر اطراف میں منڈلاتے نظر آئے۔اہلِ علاقہ نے افسوس کا اظہار کرتے ہوئے کہا کہ تاریخی اور قدیم درخت صرف لکڑی یا سایہ فراہم کرنے والے پودے نہیں ہوتے بلکہ یہ نسلوں کی یادوں، مقامی ماحول، حیاتیاتی تنوع اور قدرتی ورثے کے امین ہوتے ہیں۔ایسے درخت اپنے اندر کئی دہائیوں بلکہ صدیوں کی تاریخ سمیٹے ہوئے ہوتے ہیں، اس لیے ان کی بروقت دیکھ بھال، ماہرین سے معائنہ اور ضروری حفاظتی اقدامات انتہائی ضروری ہیں۔انہوں نے مطالبہ کیا کہ علاقے میں موجود دیگر قدیم اور تاریخی درختوں کی باقاعدہ نشاندہی کی جائے اور ان کے تحفظ کے لیے خصوصی اقدامات اٹھائے جائیں۔ درختوں کی صحت اور مضبوطی کا وقتاً فوقتاً ماہرین سے معائنہ کرایا جائے تاکہ کسی بھی خطرناک صورتحال سے قبل حفاظتی اقدامات کیے جا سکیں۔مقامی مشران نے کہا کہ علی زئی کے اس قدیم پیپل کے درخت کے گرنے سے بستی کا ایک نمایاں قدرتی اور تاریخی نشان ہمیشہ کے لیے ختم ہو گیا ہے۔ گاؤں کے باسیوں کے لیے یہ درخت محض ایک تناور شجر نہیں تھا بلکہ بستی کی صدیوں پرانی داستان کا ایک خاموش راوی تھا، جس نے نسلوں کو آتے، جوان ہوتے اور رخصت ہوتے دیکھا۔آج اس تاریخی پیپل کے درخت کی جگہ خالی ہے، مگر اس کی گھنی چھاؤں، اس سے وابستہ یادیں اور اس پر آباد پرندوں کی دنیا اہلِ علاقہ کے دلوں میں ہمیشہ زندہ رہے گی۔