25/02/2025
عبدالحمید قریشی مرحوم ایک ایسی عہد ساز شخصیت تھے جنہوں نے اپنے قلم، فن اور فکر سے تحریکِ خودمختار کشمیر کو نئی جہت عطا کی۔ چڑھوئی بازار میں بطور پینٹر اور آرٹسٹ کام کرتے ہوئے، ان کے فن میں نہ صرف جمالیاتی عظمت جھلکتی تھی بلکہ ان کے نظریات کی روشنی بھی عیاں ہوتی تھی۔ ان کی زندگی آزادی کی متوالی تھی، اور ان کا ہر لمحہ جموں کشمیر لبریشن فرنٹ کے اصولوں کی پاسداری میں بسر ہوا۔
قریشی برادران کا خانوادہ ہمیشہ سے خودمختار کشمیر کے نظریے کا علمبردار رہا، اور عبدالحمید قریشی اس قافلے کے سرخیلوں میں سے ایک تھے۔ انہوں نے محض گفتار کے غازی ہونے پر اکتفا نہ کیا بلکہ اپنے اعمال سے ایک ناقابلِ تسخیر استقامت اور نظریاتی وابستگی کی مثال قائم کی۔ ان کے لب و لہجے میں جوش، فکر میں گہرائی اور عزم میں وہ صلابت تھی جو تحریکوں کو دوام بخشتی ہے۔
وہ ایک فکری محاذ کے سپاہی تھے، جنہوں نے تحریکِ آزادی کے بیانیے کو نہ صرف اجاگر کیا بلکہ اسے عملی قالب میں ڈھالنے کی سعی بھی کی۔ قاضی عبدالحمید قریشی، عتیق الرحمن ہاشمی، حبیب الرحمن ہاشمی اور خلیق الرحمن ہاشمی—سبھی بھائیوں کی جدو جہد ایک مشترکہ نصب العین کی آئینہ دار تھی، اور عبدالحمید قریشی مرحوم اس قافلے کے فکری معمار تھے۔ ان کی خدمات اور قربانیاں تاریخِ چڑھوئی میں سنہرے حروف سے لکھی جائیں گی، اور ان کی یادیں ہمیشہ آزادی کے متوالوں کے دلوں میں زندہ رہیں گی۔
