27/09/2025
🔥یہ پنجابی شاعری یاتو اُستاد دامن کی ہے یا سائیں اختر لاہوری کی
آپ کمنٹ میں بتائں۔
عنوان "ﷲ میاں تھلے آ" :
— پوری نظم مندرجہ ذیل ہے:
ﷲ میاں تھلے آ
اپنی دنیا ویہندا جا
یا اسمانوں رزق ودھا
یا فِر کر جا مکّ مکا
تینوں دھی ویاہنی پیندی
نانکی چھَک بناؤنی پیندی
رُسّی بھین مناؤنی پیندی
لتھّ جاندے سبھ تیرے چاء
ﷲ میاں تھلے آ
دھیاں نوں توں جمنے دیندوں
کُڑماں دے توں طعنے سہندوں
نال شریکاں کدے نہ بہندوں
مٹی جاندی کپڑے کھا
ﷲ میاں تھلے آ
تیرے گھر نہ دانے ہُندے
پاٹے لیف پرانے ہُندے
کملے لوک سیانے ہُندے
پا دندے تینوں گھبرا
ﷲ meyaan تھلے آ
تیرا کوٹھا چوندا رہندا
بِھجدا رہندوں اٹھدا بہندا
دِسدا نہ تینوں چڑھدا لہندا
اُگّ پیندا ہر پاسے گھاہ
ﷲ میاں تھلے آ
تیری ماں تے پیو نہ ہُندا
گھر وچ آٹا گھیؤ نہ ہُندا
جو تُوں چاہندوں سو نہ ہُندا
ویہندا وِکدی کس کس بھا
ﷲ میاں تھلے آ
بھکھ نَنگ مینوں جیون نہیں دیندی
نجڑی کپڑے سِیون نہیں دیندی
وہوٹی مینوں کون نہیں دیندی
گھر وچ لگّ گئی مارشل لا
ﷲ میاں تھلے آ
ویکھ شیئے تے وہابی لڑ پئے
سُنی ڈانگاں لے کے چڑھ پئے
اِک دوجے نوں قتل کریندے
آکھن ساڈا اِک خدا
ﷲ میاں تھلے آ
سدھا سادہ ساؤُ ہُندوں
مسکیناں دا بھاؤ ہُندوں
دفتر دے وچ باؤ ہُندوں
افسر دِندے مغز کھپا
ﷲ میاں تھلے آ
ویکھ دھیاں لئی ماپے مر گئے
جان دی بازی لا کے ہر گئے
عزت دے گھر سنجے کر گئے
کر گیا پہریدار تباہ
ﷲ میاں تھلے آ
چوری دا الزام غریبی
روندی پھرے عنایت بیبی
پُتّ چھڈاون لئی گل خاناں
لیندا مر گیا ابھے ساہ
ﷲ میاں تھلے آ
تیرے گھر لئی چندہ منگدے
ڈردے لوک نہ کولوں لنگھدے
سبھ نوں گھر تے دے نہیں سکیا
اپنا گھر تے آپ بنا
ﷲ meyaan تھلے آ
نیک محمد کِدھر جاوے
روٹی رزق حلال کماوے
تیرا حکم تے طیّب روزی
بن گیا اوہدے گل دا پھاہ
ﷲ میاں تھلے آ
سکے ویر دے بلد وکا کے
بھین نے دھی نوں شُگن لوا کے
اوہدے اُتے قرض چڑھا کے
رشتہ لیا سو پھر پرتا
ﷲ میاں تھلے آ
جابر مرد زنانی کُٹّن
بلدے چلّھے اُتے سُٹّن
نکّ وڈھن تے گُتاں پُٹّن
مگروں لِکھتاں دین پھڑا
ﷲ میاں تھلے آ
لکھت ملے تے ملاں لیکھے
پنج شریعت پان بھلیکھے
دھی دا کون حلالہ ویکھے
اپنے جرم دی دین سزا
ﷲ میاں تھلے آ
ملاں قاضی ڈِھڈوں کھوٹے
وڈھی کھا کھا ہو گئے موٹے
سچ آکھاں تے مارن سوٹے
مگروں دیندے فتویٰ لا
ﷲ میاں تھلے آ
ماڑے دی دھی کڈھ نچاندے
خلق نوں اُسدا ننگ وکھاندے
گھر وچ دھی اے خوف نہ کھاندے
مول نہ کردے شرم حیا
ﷲ میاں تھلے آ
آکھن ظلم دی رسی لمّی
وچ بہشتیں جان گے کمی
دے کے تگڑے سوچ نکمی
لٹّ لیندے ماڑے دے چا
ﷲ میاں تھلے آ
رانجھے چاواں نال سہیڑے
ملیا دان نہ بن گئے کھیڑے
سنجے ہو گئے وسدے ویہڑے
جاندی واری لا گئے دا
ﷲ میاں تھلے آ
بھکھ توں ڈردی آئی بنگالن
منگدی روٹی کپڑا سالن
ویچن، رَنّ بنا نہ پالن
رقماں وٹّ کے دین پھڑا
ﷲ میاں تھلے آ
شہراں وچ ہنیر نیں جھلے
بچیاں دے لہو فرشیں ڈُلہے
کتھوں لیائیے کھرل تے دُلہے
ٹُر پین جیہڑے متھا لا
ﷲ میاں تھلے آ
گلیاں دے وچ پھرے اداسی
پھیرا لا گئی موت دی ماسی
ڈردی خلقت بن گئی داسی
واء چلے تے نکلے تراہ
ﷲ میاں تھلے آ
دھی کمی دی سوہنی ہووے
وہوٹی جے من موہنی ہووے
اوہدے لئی تے ہونی ہووے
تگڑے لیندے چکّ چکا
ﷲ میاں تھلے آ
دھی ماڑے دی مار سٹی نے
عزت لُٹّ، وچ غار سٹی نے
روندی تے کرلاندی رہِ گئی
کول کھلوتے رہے بھرا
ﷲ میاں تھلے آ
سولاں سال دی روپ کماری
کلو سونے نال سنگاری
جبراً چاڑھ ستی تے ماری
پنڈت لے گئے نال سواہ
ﷲ میاں تھلے آ
گینگ ریپ نے تھاں تھاں ہُندے
لاہ لیندے موئیاں دے بندے
گھیؤ دی تھاں تے ورتن کندے
مرچیں دِندے فَکّ ملا
ﷲ میاں تھلے آ
ہتھیں چھُریاں جدھر جاندے
نکّوں کنّوں زیور لاہندے
ننگیاں لاشاں نہیں دفناؤندے
حرمت دِندے ہو ودھا
ﷲ میاں تھلے آ
ویکھ وڈیرے غدر مچاندے
دھیاں نال قرآن نکانہدے
پُتراں لئی جائدات بچاندے
دھی دا حصہ لین لُکا
ﷲ میاں تھلے آ
لُٹّدے کئی دستور بنا کے
بندیاں نوں مجبور بنا کے
کپڑے روں دی حور بنا کے
اوہناں لیندے آہرے لا
ﷲ میاں تھلے آ
ویکھ اپنے نیکاں دا کارا
مال یتیماں کھا گئے سارا
اک بیوہ دا ڈھا کے ڈھارا
دِتی اک مسیت بنا
ﷲ میاں تھلے آ
اک بیوہ دا پُتر مویا
آن شریکا کٹھا ہویا
کجھ تے لگّ گیا گور کفن تے
باقی گیا شریکا کھا
ﷲ میاں تھلے آ
پنڈاں دے پنڈ خالی ہو گئے
لکھاں ہتھ سوالی ہو گئے
کاں باغاں دے مالی ہو گئے
بلبل لئی نیں پنجرے پا
ﷲ میاں تھلے آ
گروپ ہتھوڑے مار کے چوٹاں
سریاں پھیہندے وانگ اخروٹاں
پھر وی درج نہ ہون رپوٹاں
ناکے توڑ کے ہون ہوا
ﷲ میاں تھلے آ
دیس دے ویہڑے ہو گئے سوڑے
جابر پھردے ہو ہو چوڑے
پنڈت ملاں بولن کوڑے
توں کیوں ہو گئیوں بے پرواہ
ﷲ میاں تھلے آ
دو دو ہتھیں مایہ ہونجھی
کھا گئے پاک کتاب دی پونجی
تاج کمپنی ہوئی نہ لونجی
تینوں وی لا گئے نی دا
ﷲ میاں تھلے آ
ہر وسطی وچ بمب دھماکے
اُڈیا گوشت تے مر گئے کاکے
دَس دَس مَن دے لگّ گئے دھاکے
بمباں دِتا ماس اڈا
ﷲ میاں تھلے آ
ویکھ کی پتراں ظلم کمایا
ماں ملت نوں آپ ہرایا
کھا گئے نے جنت دا سایہ
چٹے جھاٹے پائی سواہ
ﷲ میاں تھلے آ
عرباں ہتھ کرن مزدوری
چند کھاندے نے گھیؤ دی چوری
رزق حلال نہ پیندی پوری
اوکھے ہو گئے لینے ساہ
ﷲ میاں تھلے آ
ڈاکو، چوراں وچ یکجہتی
رل کے چوری کرن ڈکیتی
رقماں دسن گھر دے بھیتی
جان محافظ اکھ چرا
ﷲ میاں تھلے آ
ہو گئے سبھ ناکام ہٹاچی
وعظاں کر کر تھکّ گئے باچی
بند نہ ہویا لہو کراچی
امناں دے جھنڈے لہرا
ﷲ میاں تھلے آ
کی پڑھدا میں سبز کتاباں
فرقہ بندی وچ نصاباں
اکلیتاں نے وچ عذاباں
ملاں، فادر دین ہوا
ﷲ میاں تھلے آ
جو کوئی گلّ لوکائی دی کردا
فاقے دکھ ہٹائی دی کردا
جابر نال ڈٹائی دی کردا
اوہنوں دینے دار چڑھا
ﷲ میاں تھلے آ
کتھوں آون ایہہ دہشت گردے
کیڑا مالک کس دے بردے
مارن لوکاں آپ ن مردے
ناکے توڑ کے ہون ہوا
ﷲ میاں تھلے آ
نشے جوانی نشیاں ہر گئے
ماواں زندہ پتر مر گئے
بھیناں دے گھر سنجے کر گئے
جیباں دے وچ پڑیاں پا
ﷲ میاں تھلے آ
ماڑے گھر دی عزت لُٹی
پرچہ درج نہ ہو گئی چھُٹی
اتوں پولیس نے لائی جھُٹی
حبس بے جا بن گیا لا
ﷲ میاں تھلے آ
مہنگائی نے دِتا جھونا
چٹنی ہو گئی دال سلونا
چلدا کوئی ن جادو ٹُونا
من سلوے نوں پھر ورھا
ﷲ میاں تھلے آ
لا قانون دی بالا دستی
بالا دستاں لئی اے سستی
بن پیسے دے مٹ جائے ہستی
ماڑے نوں نہ ملن گواہ
ﷲ میاں تھلے آ
بش بنیا فرعون خدایا
خلق دی نپّی دھون خدایا
کھائے انسانی لون خدایا
آ کے ساڈی دھون چھڈا
ﷲ میاں تھلے آ
کتھوں آئے قحط طوفانی
بھکھاں مارے بال سوڈانی
لے گئے گرجھ حقوقِ انسانی
کھادھے چیلاں جشن منا
