Bāzyāft

30/06/2025

ادارہ زبان و ادبیاتِ اردو کے تحقیقی مجلّے بازیافت کا چھیالیسواں شمارہ برائے جنوری تا جون 2025، بروقت آن لائن کر دیا گیا ہے۔ ہائیر ایجوکیشن کمیشن، اسلام آباد سے Y درجے میں منظور بازیافت، ششماہی بنیادوں پر شائع ہونے والا تحقیقی مجلّہ ہے جو جنوری 2002ء سے بلا تعطل شائع ہوتا آ رہا ہے۔ اس مجلّے کا یہ بھی امتیاز ہے کہ نہ صرف یہ پاکستان میں اردو زبان و ادب سے متعلق شائع ہونے والے تحقیقی رسائل میں اوّلیت رکھتا ہے بلکہ بین الاقوامی انڈیکسنگ اداروں کے معیارات کے ساتھ بھی مطابقت رکھتا ہے۔ مدیر اعلی پروفیسر ڈاکٹر بصیرہ عنبرین، مدیران ڈاکٹر محمد نعیم اور ساجد صدیق نظامی کی ادارت میں شائع ہونے والے بازیافت کے زیرِ نظر شمارے میں متنوّع موضوعات پر قومی و بین الاقوامی محققین کے مضامین شامل کیے گئے ہیں۔ اس شمارے کے مشمولات، مجلّے کی ویب گاہ پر دیکھے جا سکتے ہیں۔
http://111.68.103.26/journals/index.php/Bazyaft/issue/current

03/10/2024

"بازیافت" ایک مرتبہ پھر ہائر ایجوکیشن کمیشن، اسلام آباد کی جانب سے اگلے برس (25-2024) کے لیے قوی تحقیقی رسائل کے Y درجے میں منظور کر لیا گیا ہے

31/07/2024

ادارہ زبان و ادبیات اردو، پنجاب یونیورسٹی کے اہتمام سے جدید اردو نظم کے اہم ترین شعرا میں سے ایک، ن م راشد کے یوم پیدائش کی مناسبت سے بروز جمعرات، یکم اگست 2024 کو شام چھ بجے ایک ویبینار کا انعقاد کیا جا رہا ہے۔ اس ویبینار میں ممتاز راشد شناس ڈاکٹر محمد فخر الحق نوری، راشد کی فکر اور فن کے حوالے سے کلیدی گفتگو کریں گے جبکہ نامور محقق و نقاد ڈاکٹر تبسم کاشمیری صدارتی کلمات سے نوازیں گے۔ ادارہ زبان و ادبیات اردو کے صدر نشین ڈاکٹر محمد کامران کلمات تشکر ادا کریں گے۔ ویبینار میں شرکت کے لیے لنک درج ذیل ہے:
us04web.zoom.us/j/76295687369?pwd=bFq8kmheETDBsWUlo6K7cYkRbppfJJ.1

28/12/2023

’’بازیافت‘‘ کا ساتواں اور آٹھواں شمارہ بھی اکٹھا شائع کیا گیا۔ یہ شمارہ جولائی 2005ء تا جون 2006ء کے عرصے کو محیط تھا۔ مدیر ڈاکٹر محمد سلیم ملک جبکہ ڈاکٹر ضیاءالحسن معاون مدیر تھے۔ اس شمارے میں سات مضامین شامل تھے جبکہ ’کتاب نامہ‘ کے عنوان سے تین متفرق کتب پر تبصرے بھی شامل کیے گئے۔ اس شمارے کی خاص بات اس میں ممتاز نقاد محمد حسن عسکری کے ایک کم یاب انگریزی مضمون کا اردو ترجمہ ’کبھی اے حقیقتِ منتظر ‘ کے عنوان شائع ہونا تھا۔ یہ ترجمہ ایک اور اہم نقاد مظفر علی سید کا کیا ہوا تھا۔ اسی طرح اس شمارے میں ڈاکٹر خالد محمود سنجرانی کا مضمون مظفر علی سید کے اُن اداریوں کی ترتیب و تعارف پر مبنی تھا جو انھوں نے ’راوی ‘، گورنمنٹ کالج لاہور کی ادارت کے دوران تحریر کیے تھے۔
ذیل میں اس شمارے کا سرورق، ابتدائی اوراق، فہرست مضامین اور اداریہ ملاحظہ کیجیے۔

28/12/2023

30/11/2023

اورینٹل کالج، پنجاب یونیورسٹی کے اہتمام سے مشرقی زبانوں اور ادبیات کے تحقیقی مجلوں میں لکھنے والے اہل قلم کے لیے "تحقیقی مضمون نگاری: مبادیات و رسمیات" کے زیر عنوان دو روزہ تربیتی کارگاہ (ورکشاپ) (Online & In-person) 12۔11 دسمبر 2023 کو منعقد کی جا رہی ہے۔ طالب علموں کے لیے رجسٹریشن فیس 500 روپے جبکہ دیگر شرکا کے لیے 1000 روپے مقرر کی گئی ہے۔ درج ذیل لنک کے ذریعے رجسٹریشن کروائی جا سکتی ہے:

https://docs.google.com/forms/d/1rYPhNAUMsZZZSY68M6RjHODkvpqWynKT4SuoR9GL4F0/edit?usp=drivesdk

رجسٹرڈ شرکا کو سرٹیفیکیٹ بھی دیے جائیں گے۔

23/11/2023

’’بازیافت‘‘ کا پانچواں اور چھٹا شمارہ اکٹھا شائع کیا گیا۔ یہ شمارہ جولائی 2004ء تا جون 2005ء کے عرصے کو محیط تھا۔ مدیر ڈاکٹر محمد سلیم ملک تھے۔ اس شمارے میں نو مضامین شامل تھے جبکہ ’کتاب نامہ‘ کے عنوان سے پانچ متفرق کتب پر تبصرے بھی شامل کیے گئے ۔ ذیل میں اس شمارے کے ابتدائی اوراق، فہرست ِ مضامین اور اداریہ ملاحظہ کیجیے۔

02/11/2023

’’بازیافت‘‘ کا چوتھا شمارہ جنوری تا جون 2004ء کے عرصے کو محیط تھا۔ مدیر ڈاکٹر تحسین فراقی ہی تھے۔ مجلس ادارت اور معاونین میں کوئی تبدیلی نہ آئی۔ یہ شمارہ پچھلے شماروں کی نسبت قدرے ضخیم تھا۔ کل ضخامت 350 صفحات کے لگ بھگ پہنچ گئی۔ اس شمارے میں بھی تیرہ مضامین شامل تھے جبکہ ’کتاب نامہ‘ کے عنوان سے چھے متفرق کتب پر تبصرے بھی شامل کیے گئے ۔ تحقیقی و تنقیدی مضامین کا امتزاج اور رنگا رنگی قابلِ داد تھی۔ یہی وجہ تھی کہ ’تقدیم‘ میں مدیر ’’بازیافت‘‘ لکھتے ہیں: ’’ہمیں پُر اعتماد مسرت ہے کہ شعبۂ اردو نے ادب کے قارئین کو خوش رنگ مضامین کا ایک گل دستہ فراہم کر دیا ہے جو یقین ہے کہ دیر تک ان کے مشامِ جاں کو معطّر کرتا رہے گا۔‘‘
ذیل میں اس شمارے کے ابتدائی اوراق، فہرست ِ مضامین اور اداریہ ملاحظہ کیجیے۔

10/10/2023

’’بازیافت‘‘ کا تیسرا شمارہ جولائی تا دسمبر 2003ء کے عرصے کو محیط تھا۔ مدیر بدستور ڈاکٹر تحسین فراقی تھے۔ مجلس ادارت میں ڈاکٹر محمد فخر الحق نوری ، ڈاکٹر اورنگ زیب عالم گیر اور ڈاکٹر محمد سلیم ملک شامل تھے۔ معاونین پچھلے شمارے کے ہی برقرار رہے۔ اس شمارے میں تیرہ مضامین شامل تھے جبکہ ’کتاب نامہ‘ کے عنوان سے سات متفرق کتب و رسائل پر تبصرے بھی شامل کیے گئے ۔ ’تقدیم‘ میں مدیر ’’بازیافت‘‘ اردو کے کلاسیکی متون کی اہمیت و حفاظت کے پیشِ نظر لکھتے ہیں:
’’ہمارے لیے یہ امر موجب تسکین ہے کہ مجلّہ ’’بازیافت‘‘ بہت حد تک تسلسل سے ہم کنار ہو گیا ہے اور اسے تیزی سے برعظیم پاک و ہند کے ممتاز اہلِ قلم کا تعاون حاصل ہو رہا ہے۔۔۔ ہماری یہ خواہش رہی ہے کہ مجلہ ’’بازیافت‘‘ کے ہر شمارے میں اہم کلاسیکی اردو متون شائع ہوتے رہیں تاکہ ہمارا وہ اہم ورثہ کسی حد تک محفوظ ہو جائے، جس کی بقا اور اس پر مزید تحقیق و تدقیق کے رستے ہماری زوال آمادہ علمی اور تہذیبی صورتِ حال کے باعث بند ہوتے جا رہے ہیں۔ ‘‘
ذیل میں اس شمارے کے ابتدائی اوراق، فہرست ِ مضامین اور اداریہ ملاحظہ کیجیے۔

03/10/2023

’’بازیافت‘‘ کا دوسرا شمارہ جنوری 2003ء میں شائع ہوا۔ مدیر ڈاکٹر تحسین فراقی تھے جبکہ مجلس ادارت میں ڈاکٹر سہیل احمد خان، ڈاکٹر محمد فخر الحق نوری اور ڈاکٹر اورنگ زیب عالم گیر شامل تھے۔ معاونین کے طور پر (پروفیسر) بصیرہ عنبرین اور (پروفیسر) ضیاء الحسن کو مجلس ِ ادارت کا حصہ بنایا گیا۔ نیز فیصلہ کیا گیا کہ ’’بازیافت‘‘ اب سال میں دو مرتبہ شائع ہوا کرے گا۔ مجلس مشاورت بھی قائم کی گئی۔ اس شمارے میں دس مضامین شامل تھے جبکہ ’کتاب نامہ‘ کے عنوان سے چار مؤقر کتب پر تبصرے بھی شامل کیے گئے ۔ ذیل میں اس شمارے کے ابتدائی اوراق، فہرست ِ مضامین اور اداریہ دیکھیے۔

29/09/2023

’’بازیافت‘‘ کا پہلا شمارہ جنوری 2002ء میں منظرِ عام پر آیا۔ مدیر ِ مؤسس ڈاکٹر رفیع الدین ہاشمی تھے جبکہ مجلس ادارت میں ڈاکٹر تحسین فراقی، ڈاکٹر محمد فخر الحق نوری اور ڈاکٹر اورنگ زیب عالم گیر شامل تھے ۔ ’’بازیافت‘‘ کے اجرا کے حوالے سے مزید معلومات کے لیے پہلے شمارے کا ’اداریہ‘دیکھا جا سکتا ہے۔ پہلے شمارے میں دس مضامین شامل تھے۔ ذیل میں اس شمارے کا اندرونی سرورق ، اداریہ اور فہرست ِ مضامین دیکھیے۔

29/09/2023

مجلّہ ’’بازیافت‘‘ کے جملہ امور کے متعلق تازہ اطلاعات کے حصول کے لیے ویب سائٹ کو تسلسل سے دیکھتے رہیے۔ نیز ویب سائٹ پر حالیہ برسوں کے شمارے اور مضامین بھی دیکھے جا سکتے ہیں۔