29/05/2026
خداوند یسوع مسیح کے پاک نام میں سب کو سلام۔
میں وسیمہ نظام، آپ سب کی بہن، پچھلے 25 سال سے پاکستان میں مسیحیوں کے حقوق، خاص طور پر مسیحی بچیوں کے تحفظ، جبری مذہب تبدیلی اور سیکشول ہراسمنٹ کے خلاف آواز اٹھاتی آ رہی ہوں۔ میری زندگی کا مقصد ہمیشہ یہی رہا ہے کہ مظلوموں کی آواز بنوں اور سچ کے لیے کھڑی رہوں۔
میرے عزیز دوستو، آپ میں سے بہت سے لوگ پچھلے کچھ ہفتوں سے میری غیر موجودگی کے بارے میں پوچھ رہے تھے۔ آج میں آپ سب کو بتانا چاہتی ہوں کہ میں اچانک کیوں غائب ہو گئی تھی۔
کچھ ہفتے پہلے میرا ایک بہت خطرناک ایکسیڈنٹ ہوا۔ یہ حادثہ اتنا شدید تھا کہ مجھے شدید چوٹیں آئیں۔ ایک لمحے کے لیے ایسا لگا جیسے زندگی ختم ہونے والی ہے۔ درد، خوف اور بے بسی کے ان لمحوں میں صرف ایک ہی نام تھا جس نے مجھے سنبھالا… اور وہ نام ہے زندہ خداوند یسوع مسیح کا۔
میں آج آپ سب کے سامنے زندہ کھڑی ہوں تو صرف خدا کے فضل، اُس کی رحمت اور اُس کی حفاظت کی وجہ سے۔ ڈاکٹروں نے اپنی کوشش کی، لوگوں نے دعائیں کیں، مگر میری جان بچانے والا صرف میرا خداوند یسوع مسیح ہے۔
ان دنوں میں نے بہت کچھ محسوس کیا۔ میں نے دیکھا کہ زندگی کتنی قیمتی ہے، اور یہ بھی کہ خدا اپنے بندوں کو کبھی تنہا نہیں چھوڑتا۔ جب انسان کمزور ہو جاتا ہے تب خدا کی قدرت کامل ہوتی ہے۔
میں خاص طور پر اپنی مسیحی قوم سے کہنا چاہتی ہوں:
کبھی ہمت نہ ہاریں۔ چاہے حالات کتنے ہی مشکل کیوں نہ ہوں، چاہے دشمن کتنے ہی طاقتور کیوں نہ ہوں، ہمارا خدا زندہ ہے۔ وہ ہماری دعائیں سنتا ہے، وہ ہماری حفاظت کرتا ہے، اور وہ ہمیں ہر آزمائش سے نکالنے کی قدرت رکھتا ہے۔
میں آپ سب کی دعاؤں، محبت اور فکر مندی کے لیے دل کی گہرائی سے شکر گزار ہوں۔ آپ کی دعاؤں نے مجھے طاقت دی۔ میں ابھی مکمل طور پر صحت یاب نہیں ہوئی، لیکن پہلے سے بہتر ہوں اور خداوند کے فضل سے جلد دوبارہ پوری طاقت کے ساتھ اپنے مشن پر واپس آؤں گی۔
میری آپ سب سے درخواست ہے کہ میرے لیے دعا کرتے رہیں، اور اُن تمام مظلوم بچیوں اور خاندانوں کے لیے بھی دعا کریں جو آج بھی ظلم کا سامنا کر رہے ہیں۔
آخر میں میں صرف یہ کہنا چاہتی ہوں:
"اگر خدا ہمارے ساتھ ہے تو کون ہمارے خلاف ہو سکتا ہے۔"
خداوند یسوع مسیح آپ سب کو اپنی حفاظت میں رکھے۔
آپ کی بہن،
وسیمہ نظام
