14/10/2023
اسرائيل پاران غزه جي شهرين کي 24 ڪلاڪن ۾ ڏاکڻي حصي ڏانهن لڏي وڃڻ جو حڪم
اسرائيلي فوج غزه جي سمورن شهرين کي 24 ڪلاڪن اندر ڏاکڻي حصي ڏانهن لڏي وڃڻ جو حڪم ڏنو آهي.
خبرن جي اداري ’رائٽرز‘ موجب اسرائيل سندس امڪاني زميني ڪاروائي کان اڳ غزه جي سرحد ويجهو ٽينڪون گڏ ڪرڻ شروع ڪيون آهن.
اسرائيلي فوج چيو آهي ته هو ايندڙ ڏينهن ۾ غزه جي شهر ۾ وڏي ڪاروائي ڪندي، ۽ وڌيڪ اعلان کانپوءِ ئي شھري واپس اچي سگهندا.
اسرائيل پاران 23 لک آبادي واري علائقي غزه تي بمباري جاري آھي، جتي ان جوابي ڪاروائيءَ دوران هينئر تائين 1400 کان وڌيڪ ماڻهو مارجي ويا آهن.
حماس پاران 7 آڪٽوبر تي سامونڊي، زميني ۽ هوائي رستن تان ڪيل حملن ۾ اسرائيل اندر مارجي ويلن جو انگ 1300 کان وڌيڪ آهي، جڏهن ته اسرائيل جا ڪيترائي فوجي توڙي عام شهري غزه ۾ حماس جي قبضي ھيٺ آهن.
اسرائيل جي بچاء واري وزير، يواف گيلنٽ خميس تي هڪ بيان ۾ چيو ھو ته ’هاڻ ھي جنگ جو وقت آهي.‘
جمعي جي ڏينھن اسرائيلي فوج هڪ بيان ۾ چيو ته غزه جا ماڻهو پنهنجي ۽ پنھنجي خاندان جي حفاظت لاءِ اتريان علائقا خالي ڪري ڇڏين، ۽ پاڻ کي حماس جي دهشتگرديءَ کان ڌار ڪري ڇڏين.
اسرائيلي فوج چيو ته حماس جا هٿياربند زمين اندر ٺھيل سرنگهن ۽ ڳُتيل آبادي وارن علائقن اندر معصوم شهرين سان گڏ عمارتن ۾ موجود آهن.
حماس جي هڪ عهديدار غزه جا علائقا خالي ڪرڻ جي چتاءُ کي ڪوڙي پروپيگنڊا قرار ڏيندي شهرين تي زور ڀريو ته هو ڪنھن به دوکي ۾ نه اچن.
گڏيل قومن جي اداري چيو آهي ته اُتر غزه جي سموري آبادي جو ھاڃيڪاري کان سواءِ ڏکڻ ڏانھن منتقل ٿيڻ ’ناممڪن‘ آهي.
سھائتا جي عالمي تنظيم ’ريڊ ڪراس‘ جو چوڻ آهي ته ٻارڻ جي کوٽ سبب غزه جي اسپتالن ۾ھلندڙ جنريٽرايندڙ ڪجهه ڪلاڪن ۾ بند ٿي ويندا، جڏهن ته گڏيل قومن جي خوراڪ واري اداري چتاءُ ڏنو آهي ته غزه ۾ خوراڪ ۽ پاڻي جي کوٽ انتهائي ڳڻتي واري حد تائين پھچي وئي آهي.
فلسطيني پناهگيرن لاءِ گڏيل قومن جي اداري چيو آهي ته هُن پنهنجي اٽالي کي غزه جي ڏاکڻي حصي ڏانهن منتقل ڪري ڇڏيو آهي.
سماجي رابطي جي ويب سائيٽ ’ايڪس‘ تي جاري ھڪ بيان ۾ اداري چيو ته اسان اسرائيلي اختياري وارن تي زور ڀريون ٿا ته ھو پناهگيرن جي ڪئمپن جي حفاظت يقيني بڻائين ۽ انهن کي نشانو نه بڻايو وڃي.
(هن خبر لاءِ مواد ’رائٽرز‘ تان ورتو ويو آھي)
