30/05/2026
عمر نواز خان کے بڑے اعلانات: مشینری، سڑکوں، پانی کی اسکیموں اور کنوؤں کے منصوبوں کی خوشخبری
بھوگڑ منگ میں منعقدہ ایک کارنر میٹنگ کے دوران رہنما پاکستان تحریک انصاف عمر نواز خان نے عوام کے لیے متعدد ترقیاتی منصوبوں اور سہولیات کا اعلان کیا۔
کارنر میٹنگ سے خطاب کرتے ہوئے عمر نواز خان نے کہا، میں بہت جلد مشینری خرید رہا ہوں، مشینیں دوں گا، آپ لوگ جتنی مرضی سڑکیں نکالنی ہیں نکال لیں۔" اس کے علاوہ انہوں نے پانی کی اسکیموں اور کنوؤں کے منصوبوں کا بھی اعلان کیا۔
اپنے خطاب میں انہوں نے مزید کہا کہ انہیں ان لوگوں پر فخر ہے جو اپنی مدد آپ کے تحت کام کرتے ہیں۔ انہوں نے عوام پر زور دیا کہ صرف سرکاری کاموں کے انتظار میں نہ رہیں بلکہ اپنی مدد آپ کے تحت ترقیاتی کاموں میں حصہ لیں، کیونکہ اللہ تعالیٰ ایسے کاموں میں برکت عطا فرماتا ہے۔ انہوں نے جاری منصوبے کے لیے مزید 20 گھنٹے مشینری فراہم کرنے کا اعلان بھی کیا۔
عمر نواز خان نے کہا کہ جبر یونین کونسل سے آغاز کیا گیا جہاں لاکھوں روپے مالیت کے پانی کے پائپ فراہم کیے گئے، جس سے تقریباً 80 فیصد آبادی کو پانی کی سہولت میسر آئی۔ اسی طرح سچاں یونین کونسل میں بھی 80 سے 90 فیصد آبادی کو پانی کی فراہمی ممکن بنائی گئی ہے۔
انہوں نے واضح کیا کہ اس وقت سیاست یا ووٹوں کی بات نہیں بلکہ انسانی خدمت کا وقت ہے۔ تمام ترقیاتی منصوبے مرحلہ وار مکمل کیے جائیں گے جن میں کچی سڑکیں، کنوؤں کی تعمیر اور مزید پانی کی اسکیمیں شامل ہیں۔
سیاحت کے حوالے سے گفتگو کرتے ہوئے عمر نواز خان نے کہا کہ سرن ویلی قدرتی حسن سے مالا مال ہے اور مقامی افراد خوش نصیب ہیں کہ انہیں ایسی خوبصورت وادی میسر ہے۔ انہوں نے کہا کہ صاف پانی، بہتر سڑکیں، معیاری تعلیم اور صحت کی سہولیات ہر شہری کا بنیادی حق ہیں اور ان کی فراہمی کسی پر احسان نہیں بلکہ عوام کی خدمت ہے۔
انہوں نے سیاحوں اور مقامی افراد سے اپیل کی کہ وادی کو صاف ستھرا رکھنے میں اپنا کردار ادا کریں تاکہ سیاحت کو فروغ ملے اور نوجوانوں کے لیے روزگار کے مزید مواقع پیدا ہوں۔
عمر نواز خان نے کہا کہ بعض مقامات پر ہوٹلوں کے کرائے غیر معمولی حد تک زیادہ ہیں، جبکہ ان کا مقصد ایسے منصوبے شروع کرنا ہے جن سے مقامی افراد کو روزگار ملے اور علاقے میں سیاحت کو فروغ حاصل ہو۔
اپنے خطاب کے دوران انہوں نے چیئرمین پاکستان تحریک انصاف عمران خان کا ذکر کرتے ہوئے کہا کہ مشکل حالات میں بھی انہوں نے عمران خان کا ساتھ نہیں چھوڑا اور آئندہ بھی ان کے نظریے کے ساتھ کھڑے رہیں گے۔ انہوں نے کارکنوں پر زور دیا کہ عمران خان کی ہر کال پر بھرپور انداز میں لبیک کہیں اور سرن ویلی سے بھی بڑی تعداد میں نمائندگی کو یقینی بنایا جائے۔
کارنر میٹنگ میں شہزادہ قمر زیب خان، آصف جہاں خان، اجمل خان، افتخار خان، شاہد خان، نذیر بھائی، خالد خان، شہریار خان، بلاول خان، ضیاء خان، نعیم خان، یاور خان، اسفندیار خان اور دیگر معززین و کارکنان نے شرکت کی۔
