12/06/2026
مردان: تھانہ شیخ ملتون پولیس کا بڑا سائبر کریک ڈاؤن، شہریوں کے اکاؤنٹس ہیک کرکے رقم ہتھیانے والے 11 رکنی گروہ کا بھانڈا پھوٹ گیا، خواتین سمیت ملزمان گرفتار
مردان:
تھانہ شیخ ملتون پولیس نے آن لائن فراڈ اور سائبر کرائم میں ملوث عناصر کے خلاف بڑی کارروائی کرتے ہوئے 11 ملزمان کو گرفتار کر لیا۔
گرفتار ملزمان میں اختر عباس ولد اقبال، محمد بشیر ولد مظفر عباس ساکنان شورکوٹ ضلع جھنگ، محمد رفیق ولد محمد صدیق سکنہ بہاولپور، غلام عباس ولد محمد ریاض سکنہ خانیوال، مختیار احمد ولد نذیر احمد اور محمد ارشد ولد محمد علی ساکنان سرگودھا، بابر علی ولد نظیر محمد ساکن راولپنڈی، خالد ولد محمد بخش ساکن اسلام آباد، ثناء اللہ ولد اسرار محمد ساکن پارہوتی مردان، جبکہ خواتین ملزمان میں مسماۃ خدیجہ اور مسماۃ حولہ ساکنان اسلام آباد شامل ہیں۔
پولیس کے مطابق ملزمان شہریوں کے سوشل میڈیا اور دیگر آن لائن اکاؤنٹس ہیک کرکے دھوکہ دہی کے ذریعے رقم ہتھیانے میں ملوث تھے۔ کارروائی کے دوران ان کے قبضے سے 18 موبائل فون، 2 فلیش فائر وائی فائی ڈیوائسز، ایک لیپ ٹاپ اور وارداتوں میں استعمال ہونے والی موٹر سائیکل برآمد کر لی گئی۔
ابتدائی تفتیش کے مطابق گرفتار ملزمان ایک منظم نیٹ ورک کے تحت سائبر فراڈ کی سرگرمیوں میں ملوث تھے۔ ملزمان کے خلاف مقدمات درج کرکے مزید تفتیش شروع کر دی گئی ہے جبکہ ان کے دیگر ساتھیوں اور نیٹ ورک کے حوالے سے بھی تحقیقات جاری ہیں۔
