26/04/2026
خیبر: جمرود پولیس نے کامیاب کارروائی کرتے ہوئے فلائنگ کوچ کے ذریعے بڑی مقدار میں افیون اسمگل کرنے کی کوشش ناکام بنا دی۔ گاڑی کے خفیہ خانوں سے 22 کلوگرام افیون برآمد کر کے ملزم کو گرفتار کر لیا گیا، جبکہ مقدمہ درج کرکے مزید تفتیش شروع کر دی گئی۔
تفصیلات کے مطابق ڈی پی او خیبر وقار احمد کی ہدایت پر ضلع بھر میں منشیات فروشوں اور اسمگلروں کے خلاف کارروائیاں جاری ہیں۔ اسی سلسلے میں ایس ایچ او جمرود صدیق خان کی نگرانی میں سب انسپکٹر بخت منیر اور اسسٹنٹ انچارج تختہ بیگ اصغر خان نے شاکس بائی پاس پر خصوصی ناکہ بندی کے دوران ایک مشتبہ فلائنگ کوچ کو روک لیا۔
پولیس نے دوران تلاشی گاڑی کے خفیہ خانوں سے 22 کلوگرام افیون برآمد کر لی۔ کارروائی کے دوران ملوث ملزم میانے ولد گل حسن سکنہ غلنی حلیم زئی ضلع مہمند کو گرفتار کرکے حوالات منتقل کر دیا گیا۔ ملزم سے مزید تفتیش جاری ہے اور اہم انکشافات متوقع ہیں۔
ایس ایچ او جمرود صدیق خان نے کہا کہ جمرود کے حدود میں منشیات فروشوں اور اسمگلروں کیلئے کوئی رعایت نہیں، نوجوان نسل کو تباہ کرنے والوں کے خلاف بلاامتیاز کارروائیاں جاری رہیں گی۔ انہوں نے علاقائی مشران سے اپیل کی کہ پولیس کے ساتھ تعاون کرکے اس جہاد میں بھرپور حصہ لیں تاکہ معاشرے کو منشیات جیسی لعنت سے پاک کیا جا سکے۔
