08/06/2026
سوات: شکردرہ میں افضل گجر پر ہونے والی فائرنگ کے واقعے میں اہم پیش رفت سامنے آئی ہے۔ محکمہ انسداد دہشت گردی (سی ٹی ڈی) سوات اور پولیس کی مشترکہ کارروائی کے دوران مقدمے میں نامزد تین ملزمان کو گرفتار کر لیا گیا۔
پولیس کے مطابق افضل گجر کی مدعیت میں تھانہ سی ٹی ڈی میں مقدمہ نمبر 6 درج کیا گیا ہے، جس میں تعزیرات پاکستان کی دفعات 302، 324، 147، 148، 149، 427، 120-B سمیت انسداد دہشت گردی ایکٹ کی دفعہ 7 اے ٹی اے شامل کی گئی ہے۔
ایف آئی آر میں مجموعی طور پر چھ افراد کو نامزد کیا گیا ہے، جن میں سے تین کو گرفتار کر لیا گیا ہے۔ گرفتار ملزمان میں سلیم ولد رحم با چا، جان شیر ولد رحم باچا اور ابراہیم ولد جان شیر شامل ہیں، جن کا تعلق شکردرہ، سوات سے ہے۔
مقدمے میں نامزد دیگر ملزمان میں باچا خان ولد شاہ اعظم سکنہ سواتئی بانڈہ، ابراہیم ولد جان شیر سکنہ شکردرہ اور مظفر عرف خالد عرف منصور سکنہ سربنڈہ شامل ہیں۔
سی ٹی ڈی حکام کے مطابق واقعے کی مزید تفتیش جاری ہے جبکہ باقی نامزد ملزمان کی گرفتاری کے لیے چھاپوں کا سلسلہ جاری ہے۔
واضح رہے کہ گزشتہ شب شکردرہ میں افضل گجر کی گاڑی پر فائرنگ کے نتیجے میں ان کا بیٹا، بھتیجا اور گن مین جاں بحق جبکہ افضل گجر خود زخمی ہوگئے تھے۔ واقعے کے بعد علاقے میں کشیدگی پائی جاتی ہے اور متاثرہ خاندان کی جانب سے لاشوں کے ہمراہ احتجاج بھی کیا گیا۔
