03/09/2026
میں انسانی حقوق اور بچوں کے تحفظ کے حوالے سے آگاہی سیمینار
بچوں سے #جنسی زیادتی کے بڑھتے واقعات، انسانی حقوق کی پامالی اور بچوں کی حفاظت کے حوالے سے اہم آگاہی سیمینار کا انعقاد
تلہ گنگ: ضلع تلہ گنگ کے زیرِ اہتمام تلہ گنگ کے خوبصورت ہال میں "انسانی حقوق کا تحفظ اور بچوں کی حفاظت" کے عنوان سے ایک اہم آگاہی سیمینار منعقد ہوا۔
تقریب کی صدارت مرکزی وائس چیئرمین پاکستان ملک عرفان اعوان نے کی، جبکہ چیئرمین پنجاب چوہدری ناصر گجر اور سینئر وائس چیئرمین پنجاب چوہدری ظفر گوندل مہمانانِ خصوصی تھے۔ تقریب کی نظامت کے فرائض ممتاز شاعرہ، ادیبہ اور دخترِ تلہ گنگ نمرہ ملک نے احسن انداز میں انجام دیے۔
#سیمینار میں مختلف سماجی و فلاحی تنظیموں کے عہدیداران، والدین اور شہریوں کی بڑی تعداد نے شرکت کی۔ اس موقع پر چیئرمین تلہ گنگ ملک اسد کھوکھر، وائس چیئرمین پنجاب محمد شعیب، صدر و جنرل سیکرٹری تلہ گنگ ارشد محمود سمیت انٹرنیشنل ہیومن رائٹس موومنٹ کے دیگر عہدیداران بھی موجود تھے۔
تقریب کا آغاز تلاوتِ کلامِ پاک سے ہوا، جس کے بعد ابتدائی کلمات پیش کیے گئے۔ مقررین نے بچوں اور بچیوں کے ساتھ جنسی زیادتی کے بڑھتے ہوئے واقعات، انسانی حقوق کی پامالی، بچوں کے تحفظ اور معاشرے میں آگاہی پیدا کرنے کی ضرورت پر تفصیلی گفتگو کی۔
مرکزی وائس چیئرمین پاکستان ملک عرفان اعوان نے خطاب کرتے ہوئے والدین پر زور دیا کہ وہ اپنے بچوں کی حفاظت کے ساتھ ساتھ اپنے محلے اور علاقے میں بھی مشکوک سرگرمیوں پر نظر رکھیں۔ انہوں نے کہا کہ بچوں کو محفوظ ماحول فراہم کرنا صرف والدین ہی نہیں بلکہ پورے معاشرے کی مشترکہ ذمہ داری ہے۔
انہوں نے پنجاب پولیس اور تلہ گنگ پولیس کی ان کوششوں کو بھی سراہا جو انسانی حقوق کے تحفظ، مظلوموں کی مدد اور جرائم پیشہ عناصر کے خلاف کارروائی کے لیے کی جا رہی ہیں۔
چیئرمین پنجاب چوہدری ناصر گجر نے اپنے خطاب میں انسانی حقوق کی اہمیت اور انٹرنیشنل ہیومن رائٹس موومنٹ کی جانب سے انسانی حقوق کے تحفظ کے لیے جاری کاوشوں پر روشنی ڈالی۔
سینئر وائس چیئرمین پنجاب چوہدری ظفر گوندل نے کہا کہ بچوں کو ان خطرات اور حقائق سے آگاہ کرنا وقت کی اہم ضرورت ہے جن سے وہ جنسی استحصال کا شکار ہو سکتے ہیں۔ انہوں نے والدین پر زور دیا کہ وہ بچوں کے ساتھ دوستانہ تعلق قائم کریں، ان کی سرگرمیوں پر نظر رکھیں اور کسی بھی غیر معمولی صورتحال کو نظر انداز نہ کریں۔
تقریب کے دوران ایس ایچ او تلہ گنگ امان اللہ کو معصوم بچوں سے متعلق کیسز میں فوری کارروائی، مظلوموں کی آواز بننے اور انسانی حقوق کے تحفظ کے لیے خدمات کے اعتراف میں اپریسیئشن سرٹیفکیٹ سے نوازا گیا۔
اسی طرح انٹرنیشنل ہیومن رائٹس موومنٹ ضلع تلہ گنگ کے عہدیداران کو بھی ان کی عمدہ کارکردگی اور انسانی حقوق کے لیے خدمات کے اعتراف میں تعریفی اسناد پیش کی گئیں۔
سینئر وائس چیئرمین پنجاب چوہدری ظفر گوندل کو بھی انسانی حقوق کے لیے ان کی نمایاں کاوشوں پر اپریسیئشن سرٹیفکیٹ پیش کیا گیا۔
اس موقع پر "محسنِ انسانیت" وائس چیئرمین مرکز پاکستان ملک عرفان اعوان کو انسانیت کی خدمت اور انسانی حقوق کے لیے غیر معمولی خدمات کے اعتراف میں خصوصی ایوارڈ سے نوازا گیا۔
تقریب کی نظامت کے فرائض انجام دینے والی محترمہ نمرہ ملک کو بھی انسانی حقوق کی آگاہی اور انٹرنیشنل ہیومن رائٹس موومنٹ کے ساتھ تعاون و معاونت پر اپریسیئشن سرٹیفکیٹ پیش کیا گیا۔
تقریب کے دوران انٹرنیشنل ہیومن رائٹس موومنٹ ضلع تلہ گنگ کے نومنتخب عہدیداران میں نوٹیفکیشن لیٹرز اور تنظیمی کارڈز بھی تقسیم کیے گئے۔
اختتام پر چیئرمین تلہ گنگ ملک اسد کھوکھر نے تمام معزز مہمانان، مقررین، تنظیمی عہدیداران، والدین اور شرکاء کا شکریہ ادا کیا اور اس عزم کا اظہار کیا کہ انسانی حقوق کے تحفظ، بچوں کی حفاظت اور معاشرے میں شعور و آگاہی کے فروغ کے لیے انٹرنیشنل ہیومن رائٹس موومنٹ ضلع تلہ گنگ اپنی کاوشیں جاری رکھے گی۔
پیغامِ سیمینار
"بچوں کی حفاظت، انسانی حقوق کا تحفظ — محفوظ معاشرہ ہم سب کی ذمہ داری!"
