Anmol swat

11/06/2026

گورنر خیبرپختونخوا فیصل کریم کنڈی نے شندور پولو فیسٹیول 2026 کا باقاعدہ افتتاح کر دیا۔ اس موقع پر صوبائی وزیر اطلاعات شفیع جان اور صوبائی مشیر برائے سیاحت ملک عدیل اقبال بھی موجود تھے۔ دنیا کے بلند ترین پولو گراؤنڈ پر منعقد ہونے والا یہ تاریخی میلہ پاکستان کی ثقافت، کھیلوں کے فروغ اور سیاحت کے لیے ایک اہم سنگِ میل ہے۔ شندور پولو فیسٹیول نہ صرف روایتی فری اسٹائل پولو کی شاندار روایت کو زندہ رکھتا ہے بلکہ ملک بھر اور بیرونِ ملک سے آنے والے سیاحوں کے لیے بھی ایک منفرد کشش کا مرکز ہے فیسٹیول کے افتتاحی پولو میچ میں لاسپور (چترال) کی ٹیم نے شاندار کھیل کا مظاہرہ کرتے ہوئے غذر (گلگت بلتستان) کو صفر کے مقابلے میں 9 گول سے شکست دے دی۔ میچ کے دوران شائقین نے کھلاڑیوں کی بہترین کارکردگی کو خوب سراہا ۔۔۔

25/05/2026

سوات سیرینا ہوٹل کے ملازمین نے ہوٹل کی بندش اور ملازمین کی برطرفی کے بعد پرنس رحیم آغا خان سے اپیل کی ہے کہ انہیں دیگر سیرینا برانچز میں ایڈجسٹ کیا جائے تاکہ برطرف ملازمین کو شدید ذہنی اور مالی پریشانی سے نجات مل سکے، جبکہ حکومتِ خیبر پختونخوا سے مطالبہ کیا گیا ہے کہ ہوٹل کو دوبارہ لیز پر دیتے وقت ملازمین کی مستقلی کو یقینی بنایا جائے۔
سوات سیرینا ہوٹل ایمپلائز یونین سی بی اے کے چیئرمین سجاد علی اور جنرل سیکرٹری اکرام اللہ نے اپنے ساتھیوں کے ہمراہ سوات میڈیا کلب میں پریس کانفرنس کرتے ہوئے کہا کہ 21 دسمبر 2025 کو اچانک نوٹس جاری کیا گیا جس میں اعلان کیا گیا کہ ہوٹل کو 31 دسمبر 2025 سے بند کر دیا جائے گا اور تمام ملازمین کی ملازمت ختم کر دی جائے گی۔ انہوں نے کہا کہ یہ فیصلہ یکطرفہ، غیر متوقع اور ملازمین کے لیے شدید ذہنی و مالی پریشانی کا سبب بنا ہے۔
انہوں نے کہا کہ یہ صرف ایک ہوٹل کی بندش نہیں بلکہ درجنوں خاندانوں کے روزگار، مستقبل اور معاشی تحفظ کے خاتمے کے مترادف ہے۔ اکرام اللہ کے مطابق سوات سیرینا ہوٹل گزشتہ کئی دہائیوں سے سیاحت کے فروغ اور مقامی افراد کو روزگار فراہم کرنے میں اہم کردار ادا کرتا رہا ہے، جبکہ ہوٹل میں تقریباً 70 ملازمین خدمات انجام دے رہے تھے جن میں سے بیشتر گزشتہ 35 برس سے ادارے سے وابستہ تھے۔
ملازمین نے خدشہ ظاہر کیا کہ لیز ختم ہونے کے بعد اگر انہیں دیگر شہروں میں منتقل کیا گیا تو ان کے خاندان، بچوں کی تعلیم اور روزگار بری طرح متاثر ہوگا۔ انہوں نے حکومتِ خیبر پختونخوا، وزیر اعلیٰ اور متعلقہ حکام سے مطالبہ کیا کہ سوات سیرینا ہوٹل کے ملازمین کو پاکستان سروسز لمیٹڈ ہی میں برقرار رکھا جائے تاکہ ان کا روزگار اور بچوں کا مستقبل محفوظ بنایا جا سکے۔
انہوں نے خبردار کیا کہ اگر ان کے تحفظات کو سنجیدگی سے نہ لیا گیا تو وہ احتجاج کا راستہ اختیار کرنے پر مجبور ہوں گے ۔۔۔

17/05/2026

سابق صوبائی وزیر اور رکن صوبائی اسمبلی فضل حکیم نے فیک نیوز پھیلانے والوں کے خلاف قانونی کارروائی کا اعلان کرتے ہوئے کہا ہے کہ جھوٹی خبریں معاشرے کے لئے ایک بڑا ناسور بن چکی ہیں، جن کی روک تھام ناگزیر ہے۔ انہوں نے مطالبہ کیا کہ فیک نیوز اور منفی پروپیگنڈے کے خلاف قوانین کو مزید مؤثر بنایا جائے تاکہ عوام تک درست اور مصدقہ معلومات کی فراہمی یقینی بنائی جا سکے۔
سوات میڈیا کلب کے صحافیوں سے خصوصی گفتگو کرتے ہوئے فضل حکیم نے کہا کہ سوشل میڈیا پلیٹ فارمز پر جھوٹی خبروں اور بے بنیاد پروپیگنڈے کی بھرمار معاشرتی بے چینی اور انتشار کو جنم دے رہی ہے۔ انہوں نے کہا کہ بعض عناصر ذاتی مفادات کے حصول کیلئے سوشل میڈیا کا غلط استعمال کر رہے ہیں، جن کے خلاف سخت قانونی کارروائی ہونی چاہیے۔
انہوں نے کہا کہ سوشل میڈیا ایک مؤثر ذریعہ ابلاغ ضرور ہے، تاہم اس کے غلط استعمال سے نوجوان نسل بری طرح متاثر ہو رہی ہے۔ انہوں نے حکومت سے مطالبہ کیا کہ ایسے عناصر کے خلاف فوری اقدامات کئے جائیں جو جھوٹی خبروں اور منفی پروپیگنڈے کے ذریعے معاشرتی ہم آہنگی کو نقصان پہنچا رہے ہیں۔ فضل حکیم نے عوام پر بھی زور دیا کہ وہ کسی بھی خبر کو آگے بڑھانے سے قبل اس کی تصدیق ضرور کریں اور ذمہ دارانہ صحافت و سوشل میڈیا کے استعمال کو فروغ دیں۔
فضل حکیم نے کہا کہ بعض عناصر ایک منظم پروپیگنڈے کے تحت ان کی کردار کشی کر رہے ہیں۔ انہوں نے بتایا کہ پہلے ان کی تصویر کو ایڈٹ کرکے سوشل میڈیا پر وائرل کیا گیا جبکہ بعد ازاں ان کے اثاثوں کے حوالے سے مبالغہ آرائی کی گئی، تاہم وہ خاموش رہے۔ انہوں نے کہا کہ اب وقت آ گیا ہے کہ ایسے منفی کردار رکھنے والے افراد کو قانون کے کٹہرے میں کھڑا کیا جائے اور ان کے خلاف کارروائی عمل میں لائی جائے۔
سیلاب متاثرین کے حوالے سے گفتگو کرتے ہوئے انہوں نے کہا کہ انہیں متاثرین کے دکھ درد کا بخوبی احساس ہے اور وہ ہر فورم پر ان کے حقوق کیلئے آواز اٹھاتے رہے ہیں۔ انہوں نے بتایا کہ قانون سازی کے ذریعے متاثرین کے معاوضوں میں اضافہ کیا گیا ہے جبکہ صوبائی حکومت نے سیلاب متاثرین کیلئے 16 سو ملین روپے جاری کئے ہیں جو باعزت طریقے سے متاثرین تک پہنچائے جائیں گے۔
ایک سوال کے جواب میں، تیسری مرتبہ پی ٹی آئی ریجن صدر منتخب ہونے پر فضل حکیم نے کہا کہ یہ ان کیلئے اعزاز کے ساتھ ایک بڑی ذمہ داری بھی ہے۔ انہوں نے کہا کہ تمام پارٹی کارکنان اور منتخب نمائندے بانی پی ٹی آئی عمران خان کے وژن کے مطابق چلیں گے اور جو کوئی بھی پارٹی پالیسی سے انحراف کرے گا اسے درست کرنے کی کوشش کی جائے گی۔ انہوں نے مزید کہا کہ سب سے پہلے وہ خود کو احتساب کیلئے پیش کرتے ہیں، اس کے بعد اگر کسی منتخب نمائندے کے خلاف ثبوت موجود ہوں تو انہیں سامنے لایا جائے تاکہ کارروائی کی جا سکے۔
انہوں نے بعض الزامات کی سختی سے تردید کرتے ہوئے کہا کہ نہ انہوں نے پامیر ہوٹل خریدا ہے، نہ جنرل بس اڈہ اور نہ ہی یونیک کیچن سے ان کا کوئی تعلق ہے۔ انہوں نے کہا کہ یونیک کیچن کے مالک ایک نوجوان کاروباری شخصیت تھے جنہوں نے ایک اچھی کوشش کی تھی، تاہم بدقسمتی سے ان کا کاروبار بند ہوگیا۔
شاہی خاندان کے ساتھ تعلقات کے حوالے سے فضل حکیم نے کہا کہ ان کا کسی قسم کا کوئی تنازعہ نہیں اور وہ شاہی خاندان کا احترام کرتے ہیں۔ انہوں نے وضاحت کی کہ ارشد خان اور زیب النساء بی بی کے درمیان ایک معاہدہ ہوا تھا، اس کے علاوہ دیگر تمام باتیں بے بنیاد ہیں۔
اس موقع پر کلب کے چیئرمین وحیداللہ سواتی، یونین آف جرنسلٹس کے صدر رفیع اللہ خان، جنرل سیکرٹری سلمان یوسفزئی، سوشل میڈیا کے صدر حارث خان سمیت دیگر ممبران بھی موجود تھے ۔۔۔

29/04/2026

سوات میڈیا کلب کا ماہانہ اجلاس کوکاری سوات میں منعقد ہوا، جس میں کلب کے اراکین نے بھرپور شرکت کی۔ اجلاس کا باقاعدہ آغاز تلاوتِ کلامِ پاک سے ہوا، جس کی سعادت سلمان یوسفزئی نے حاصل کی، جبکہ اجلاس کا ایجنڈا سوات الیکٹرانک میڈیا ایسوسی ایشن کے صدر صمد انجم نے پیش کیا۔
اجلاس سے خطاب کرتے ہوئے سوات میڈیا کلب کے چیئرمین وحید اللہ سواتی، یونین آف جرنلسٹس کے صدر رفیع اللہ خان اور صمد انجم سمیت دیگر مقررین نے کہا کہ صحافی برادری کو اپنی پیشہ ورانہ کارکردگی بہتر بنا کر ایک مضبوط اور فعال کردار ادا کرنا ہوگا تاکہ صحافت کے معیار کو مزید بلند کیا جا سکے۔
اجلاس میں ایک اہم مشترکہ فیصلہ بھی کیا گیا، جس کے مطابق اگر سوات میڈیا کلب کا کوئی بھی ممبر یا عہدیدار سوات پریس کلب یا اس کے ممبران کے ساتھ کسی بھی قسم کا صحافتی تعلق رکھے گا تو اس کی ممبرشپ معطل تصور کی جائے گی۔ یہ فیصلہ گزشتہ دنوں ایک ممبر کی جانب سے سوات پریس کلب سے وابستہ سوشل میڈیا پلیٹ فارمز پر کوریج سامنے آنے کے بعد کیا گیا، جس پر کلب کے اراکین نے شدید تحفظات کا اظہار کیا تھا۔
اجلاس سے نائب صدر عباس یوسفزئی، جنرل سیکرٹری سلمان یوسفزئی، قوت خان، انفارمیشن سیکرٹری لال شیر خان، نائب صدر عجب خان، سوشل میڈیا جنرل سیکرٹری سلمان جان دادا، سلیمان خان اور ضیاء خان نے بھی خطاب کرتے ہوئے اپنے خیالات کا اظہار کیا۔
اجلاس کے اختتام پر شرکاء نے اس عزم کا اظہار کیا کہ سوات میڈیا کلب کو مزید فعال، شفاف اور مضبوط بنانے کے لیے مشترکہ اقدامات کیے جائیں گے ۔۔۔

11/04/2026

سوات: پی ٹی آئی کونسلر کی صحافی کو سنگین دھمکیاں، صحافتی حلقوں میں تشویش کی لہر
سوات میں پاکستان تحریک انصاف (پی ٹی آئی) کے ایک مقامی کونسلر سلطان روم کی جانب سے صحافی کو سنگین نتائج کی دھمکیاں دینے کا واقعہ سامنے آیا ہے، جس پر صحافتی حلقوں میں شدید تشویش پائی جا رہی ہے اور آزادیٔ صحافت پر حملہ قرار دیا جا رہا ہے۔
کوکارئی سے تعلق رکھنے والے پی ٹی آئی کے کونسلر سلطان روم نے ابتک نیوز سوات کے بیوروچیف عجب خان کو مبینہ طور پر دھمکیاں دیں۔ صحافی عجب خان نے رمضان پیکج سے متعلق ایک خبر نشر کی تھی، جس پر کونسلر سیخ پا ہوگیا اور نامناسب زبان استعمال کرتے ہوئے کہا کہ وہ میڈیا کو نہیں مانتا اور کوئی بھی اس کے خلاف خبر نشر نہیں کر سکتا۔
صحافی عجب خان نے اس صورتحال پر ردعمل دیتے ہوئے کہا کہ خبر نشر کرنا ان کا پیشہ ورانہ فریضہ ہے اور عوام تک حقائق پہنچانا ان کی ذمہ داری ہے۔ انہوں نے واضح کیا کہ وہ کسی دباؤ یا دھمکی کے سامنے نہیں جھکیں گے۔ اس کے بعد مبینہ طور پر کونسلر مزید مشتعل ہو گیا اور صحافی کو جان سے مارنے کی دھمکیاں دیں۔
واقعے کے بعد سوات کے صحافتی تنظیموں نے سخت ردعمل دیتے ہوئے اس عمل کی شدید مذمت کی ہے۔ سوات میڈیا کلب کے چیئرمین وحیداللہ سواتی، میڈیا یونین آف جرنلسٹس کے صدر رفیع اللہ خان، اور الیکٹرانک میڈیا ایسوسی ایشن کے صدر صمد انجم سمیت دیگر صحافی رہنماؤں نے مشترکہ بیان میں کہا کہ صحافیوں کو ہراساں کرنا اور دھمکیاں دینا آزادیٔ اظہار رائے پر براہ راست حملہ ہے۔
انہوں نے مطالبہ کیا کہ متعلقہ حکام فوری طور پر واقعے کا نوٹس لیں اور ملوث کونسلر کے خلاف قانونی کارروائی عمل میں لائی جائے تاکہ آئندہ ایسے واقعات کی روک تھام ممکن ہو سکے۔ رہنماؤں نے اس عزم کا اظہار کیا کہ وہ کسی بھی دباؤ کے بغیر اپنی صحافتی ذمہ داریاں جاری رکھیں گے اور حقائق عوام کے سامنے لاتے رہیں گے۔
صحافتی تنظیموں نے خبردار کیا کہ اگر اس واقعے کا نوٹس نہ لیا گیا تو وہ احتجاج کا حق محفوظ رکھتے ہیں ۔۔۔

15/03/2026

‏وفاقی حکومت نے 20 اور 21 مارچ کو عید تعطیلات کا نوٹیفکیشن جاری کر دیا
کابینہ ڈویڑن کے جاری کردہ نوٹیفکیشن کے مطابق جمعہ اور ہفتہ کوعید تعطیلات ہونگی
22 مارچ کواتوار کی چھٹی ہوگی جبکہ 23 مارچ کو یوم پاکستان کی گزیٹڈ چھٹی ہوگی
عید الفطر پر مجموعی طور پر جمعہ،ہفتہ،اتواراور پیرکی چار چھٹیاں ہونگی ۔۔۔

18/02/2026

سوات میڈیا یونین آف جرنلسٹس کے صدر رفیع اللہ خان اور الیکٹرانک میڈیا ایسوسی ایشن کے صدر صمد انجم کی قیادت میں صحافیوں کے ایک وفد نے سوات میڈیا کلب کے چیئرمین وحید اللہ سواتی کو عمرہ کی سعادت حاصل کرنے پر مبارکباد دینے کے لیے ان کی رہائش گاہ کا دورہ کیا۔
اس موقع پر وفد نے وحید اللہ سواتی کو ہار پہنائے اور پھولوں کے گلدستے پیش کیے۔ صحافیوں نے ان کے لیے نیک تمناؤں اور دعاؤں کا اظہار کیا اور کہا کہ ان کی قیادت میں سوات کا صحافتی شعبہ مزید مضبوط ہوگا۔
وفد میں سوات میڈیا کلب کے جنرل سیکرٹری واحد زمان، یونین آف جرنلسٹس کے جنرل سیکرٹری سلمان یوسفزئی، سوشل میڈیا کلب کے جنرل سیکرٹری سلمان جان، ابتک نیوز کے بیورو چیف عجب خان، سیلمان خان اور سیف اللہ کاکا خیل شامل تھے۔
آخر میں وحید اللہ سواتی نے وفد کا شکریہ ادا کرتے ہوئے کہا کہ صحافی برادری کی محبت اور اعتماد ان کے لیے باعثِ فخر ہے اور وہ آئندہ بھی صحافیوں کے مسائل کے حل کے لیے بھرپور کردار ادا کرتے رہیں گے۔صحافیوں نے ملکی سلامتی اور استحکام کے لئے دعا مانگی گئی ۔۔۔

17/02/2026

ڈسٹرکٹ سوات میں ڈاکٹر فخری عالم کی بطور DDHO تعیناتی، محکمہ صحت کے لیے خوش آئند قدم۔ جاوید اللہ خان
ڈسٹرکٹ سوات میں ڈاکٹر فخری عالم کی بطور ڈسٹرکٹ ڈپٹی ہیلتھ آفیسر (DDHO) تعیناتی اور چارج سنبھالنے پر انہیں دل کی گہرائیوں سے مبارکباد پیش کرتے ہیں۔
اس موقع پر قائم مقام DHO سوات کی حیثیت سے ڈاکٹر فخری عالم کی قیادت، رہنمائی اور خدمات کو خراجِ تحسین پیش کرتے ہوئے کہا گیا کہ ان کی سرپرستی میں محکمہ صحت ڈسٹرکٹ سوات ترقی کی جانب گامزن ہے۔
انہوں نے کہا کہ ہمیں پورا یقین ہے کہ ڈاکٹر فخری عالم کی قیادت میں Allied Health Professionals کے مسائل کے حل، فرسٹ ایڈ کلینکس کی بہتری، سروس اسٹرکچر کی مضبوطی اور عوامی صحت کی سہولیات میں نمایاں بہتری آئے گی، جس سے عوام کو معیاری طبی سہولیات فراہم ہوں گی۔
اس موقع پر جاوید اللہ خان جنرل سیکرٹری پیرامیڈیکل ایسوسی ایشن ضلع سوات اور سینیئر نائب صدر کوآرڈینیشن آلائیڈ ہیلتھ پروفیشنلز فیڈریشن خیبر پختونخوا نے کہا کہ ان کی تنظیم اور پوری ٹیم آلائیڈ ہیلتھ پروفیشنلز فیڈریشن ضلع سوات کے پلیٹ فارم سے محکمہ صحت کے ساتھ ہر ممکن تعاون جاری رکھے گی۔
انہوں نے مزید کہا کہ تمام متعلقہ ادارے باہمی اشتراک سے ضلع سوات میں صحت کے نظام کو مزید فعال، منظم اور مثالی بنانے کے لیے اپنا کردار ادا کرتے رہیں گے ۔۔۔

28/01/2026

پاکستان بمقابلہ آسٹریلیاٹی ٹونٹی سیریز ، ٹرافی کی رونمائی

پاکستان اور آسٹریلیا کےدرمیان ٹی ٹونٹی سیریز کے ٹرافی کی رونمائی کر دی گئی

ٹرافی کی رونمائی کپتان سلمان علی آغا اورآسٹریلیا کے کپتان میچل مارش نے کی

پاکستان اور آسٹریلیا کےدرمیان سیریز کا پہلا میچ کل قذافی اسٹیڈیم میں کھیلاجائےگا ۔۔۔

23/01/2026