11/01/2026
ڊويزن جو مرڪزي، معتبر ۽ بااعتماد صحافتي ادارو ايوانِ صحافت ميرپورخاص اُن روشن حقيقت جو زنده مثال آهي ته جيڪڏهن نيت صاف، پيشه ورانه ايمانداري پختي ۽ عوامي صحافت جو جذبو اٽل هجي ته بغير سرڪاري گرانٽ ۽ بغير سرڪاري عمارت جي به حق ۽ سچ جي آواز کي بيباڪي سان بلند ڪري سگهجي ٿو۔
ايوانِ صحافت ميرپورخاص ڪيترن ئي سالن کان بغير خوف، لالچ ۽ دٻاءَ جي عوامي مسئلن کي جرئت، سچائي ۽ اثرائتي انداز سان اجاگر ڪندو اچي ٿو ۽ هر سال يومِ آزادي ۽ يومِ ثقافت جهڙا قومي ۽ ملي ڏينهن اهڙي شان، شاندار حب الوطني ۽ قومي يڪجهتي سان ملهائيندو آهي، جو هزارين شهرين سان گڏ سياسي، سماجي، مذهبي اڳواڻن ۽ اعليٰ انتظامي آفيسرن جي وڏي شرڪت ان اداري جي مقبوليت، ساک ۽ عوامي اعتماد جو زنده ثبوت بڻجي ٿي۔
پر انتهائي افسوس ۽ ڳڻتيءَ جو مقام آهي ته گذريل ڪجهه مهينن کان ايوانِ صحافت ميرپورخاص ۽ ان جي ذميوارن خلاف ڪجهه مخصوص مفاد پرست، سازشي ۽ بدنيت عنصرن پنهنجي سرپرستن ۽ حوارين سميت منظم نموني سان منفي پروپيگنڊا، بهتان تراشي ۽ ڪُڌي سازشن جو گندو سلسلو شروع ڪري ڇڏيو آهي۔
اهي حسد، ناڪامي ۽ ذاتي بغض جي باهه ۾ سڙندڙ سگِ رقيب ڪڏهن زهر اوڳاڇي رهيا آهن ته ڪڏهن ڀونڪي اداري جي ساک کي نقصان پهچائڻ جون ناڪام ڪوششون ڪري رهيا آهن، پر تاريخ شاهد آهي ته اهڙيون حرڪتون هميشه ذلت ۽ رسوائي جو سبب بڻجن ٿيون۔
اهي عنصر نه صرف پنهنجي عهدن، اختيارن ۽ طاقت جو بي رحماڻو ۽ ناجائز استعمال ڪري رهيا آهن، پر آزاديِ صحافت ۽ عوام جي بنيادي حقِ اظهار تي به کليل ۽ خطرناڪ حملو ڪري رهيا آهن، جيڪو ڪنهن به مهذب ۽ جمهوري سماج ۾ ناقابلِ قبول آهي۔
اسان فيلڊ مارشل، چيف آف ڊفينس فورسز، حافظ سيد عاصم منير صاحب کان پُرزور، سنجيده ۽ ذميوارانه اپيل ڪريون ٿا ته اهڙن شرپسند، سازشي، اختيارن جي غلط استعمال ۾ ملوث عنصرن ۽ انهن جي سهولت ڪارن خلاف سخت، بي لاڳاپا ۽ عبرتناڪ قانوني ڪارروائي ڪئي وڃي، جيئن هڪ ذميوار، عوام دوست ۽ اصولي صحافتي اداري کي متنازع بڻائڻ، بدنام ڪرڻ ۽ نقصان پهچائڻ جون سڀ مذموم سازشون هميشه لاءِ دفن ٿي سگهن۔
ايوانِ صحافت ميرپورخاص نه ڪڏهن جهڪيو آهي، نه وڪاميو آهي ۽ نه ئي ڪنهن دٻاءَ، ڌمڪي يا سازش آڏو سرِ تسليم خم ڪندو، ڇو ته سچ ۽ حق جي آواز کي نه خريد ڪري سگهجي ٿو، نه دٻائي سگهجي ٿو ۽ نه ئي خاموش ڪرائي سگهجي ٿو۔
