آفیشلJamia Qadria Hanfia Multan

12/08/2025

11/08/2025

تقریبِ سہ ماہی امتحان — اعلانِ نتائج و تقسیمِ انعامات

12 صفر المظفر 1447ھ بمطابق 07 اگست 2025ء بروز جمعرات، صبح 10:20 بجے جامعہ میں ایک پُروقار تقریبِ سہ ماہی امتحان کے نتائج و تقسیمِ انعامات منعقد ہوئی۔ اس روح پرور موقع پر درجۂ کتب (درسِ نظامی) اور شعبۂ میٹرک کے طلباء کے سہ ماہی امتحانات کے نتائج کا اعلان کیا گیا۔

بحمدِ اللہ تعالیٰ! اکابرِ جامعہ کے اخلاص و للہیت کی برکات، اور اساتذہ و طلبہ کے حسنِ عمل کے ثمرات آج اپنی پوری شان کے ساتھ ظاہر ہوئے۔ کامیابی کی خوشبو سے فضا مہک اٹھی، اور اساتذہ و طلبہ کے چہروں پر خوشی و اطمینان کی روشنی جھلکنے لگی۔

امتیازی پوزیشن حاصل کرنے والے طلباء کو جامعہ کے استاذ الحدیث، حضرت مولانا عمر فاروق صاحب دام ظلہ العالی کے دستِ مبارک سے انعامات پیش کیے گئے۔ اسی موقع پر سہ ماہی میں باقاعدہ حاضری رکھنے والے طلباء کی بھی خصوصی انعامات کے ذریعے حوصلہ افزائی کی گئی۔

تقریب کے اختتام پر مدیر الجامعہ و جانشین حضرت شیخ رحمۃ اللہ علیہ، حضرت مولانا زکریا صاحب زید مجدہ نے انعام یافتہ طلباء کو مبارک باد دی، مستقبل میں مزید کامیابیوں کی دعا فرمائی اور علم و عمل کی راہوں میں استقامت کی نصیحت کی۔

22/07/2025

الحمدللہ! عزیزم مولوی فخر الاسلام سلمہ اللہ کو ہوش آ گیا ہے۔ کبیروالا اسپتال سے انہیں نشتر اسپتال ملتان ریفر کیا گیا ہے، جہاں وہ زیر علاج ہیں۔

تمام احباب سے دعاؤں کی درخواست ہے کہ
اللّٰہ تعالیٰ انہیں مکمل صحت و شفا عطا فرمائے۔ آمین۔

22/07/2025

مولوی فخر الاسلام( شریک دورہ حدیث جامعہ قادریہ حنفیہ ملتان) کے ساتھ پیش آنے والا افسوسناک واقعہ
اللّٰہ تعالیٰ تمام طلباءِ علومِ دینیہ کو اپنی حفظ و امان میں رکھے

جامعہ قادریہ حنفیہ ملتان کے طالب علم مولوی فخر الاسلام ولد رب نواز (رہائشی کوٹ بہادر، ضلع جھنگ)، جو اس سال دورۂ حدیث شریف میں شریک ہیں، آج اپنے سہ ماہی امتحان کا آخری پرچہ مکمل کرنے کے بعد گھر روانہ ہوئے۔

ابتدائی سفر میں ان کے ہمراہ ان کے ساتھی مولوی حسنین تھے۔ جب وہ رانگو پل پہنچے تو وہاں سے مولوی فخر الاسلام نے ایک کار والے سے لفٹ لی۔ افسوسناک طور پر دورانِ سفر اس کار سوار نے انہیں نشہ آور چیز کھلا کر بے ہوش کیا اور ان کا قیمتی موبائل فون، نقد رقم اور دیگر سامان لوٹ کر انہیں کبیروالا کے قریب خٹک ہوٹل، پھترے والا کے مقام پر بے ہوشی کی حالت میں پھینک کر فرار ہو گیا۔

الحمدللہ، اب ان کے اہلِ خانہ تک اطلاع پہنچ چکی ہے، اور وہ اسپتال میں زیر علاج ہیں۔ اب تک ہوش میں نہیں آئے۔ ہم تمام اساتذہ، طلبہ اور متعلقین سے دعا کی اپیل کرتے ہیں کہ اللہ تعالیٰ مولوی فخر الاسلام کو جلد از جلد شفائے کاملہ عاجلہ عطا فرمائے، ان کے اہل خانہ کو صبر و سکون عطا فرمائے، اور ان کے دل کو تسلی بخشے۔

یہ واقعہ ہم سب کے لیے ایک تلخ یاد دہانی ہے کہ زمانہ بہت نازک ہے، اور سفر کے دوران غیر معمولی احتیاط کی اشد ضرورت ہے۔ خصوصاً طلباء دین، جو قوم و ملت کا قیمتی سرمایہ ہیں، ان کے لیے یہ اور بھی اہم ہے کہ:

🔹 اجنبی افراد سے فاصلہ رکھیں،
🔹 غیر شناختہ سواری سے گریز کریں،
🔹 دعا و اذکار کو سفر کا مستقل ساتھی بنائیں،
🔹 اور ہمیشہ اپنی لوکیشن و حالات کی اطلاع گھر یا جامعہ کو دیتے رہیں۔

اللّٰہ تعالیٰ تمام اہلِ دین، بالخصوص طلبہ و اساتذہ کی حفاظت فرمائے، اور ایسے تمام فتنوں و حادثات سے عافیت عطا فرمائے۔ آمین