28/07/2026
قلعہ احمد آباد: کھلی کچہری میں عوامی مسائل کے حل کی یقین دہانی
گورنمنٹ بوائز ہائی سکول قلعہ احمد آباد میں منعقدہ کھلی کچہری میں صوبائی محتسب پنجاب کے ایڈوائزر ضلع نارووال عامر اعجاز اکبر نے عوامی شکایات سنیں اور متعلقہ محکموں کو ان کے بروقت ازالے کی ہدایت کرتے ہوئے مسائل کے حل کی یقین دہانی کرائی۔
اس موقع پر ڈاکٹر عبدالخالق چوہدری، سینئر صحافی، کالم نگار اور صدر قلعہ احمد آباد پریس کلب رجسٹرڈ نے قلعہ احمد آباد کے اہم ترین عوامی مسئلے، پانچ سڑکوں پر مشتمل مرکزی چوک کی تعمیر کے لیے تحریری درخواست پیش کی۔ انہوں نے نشاندہی کی کہ چوک کی عدم تعمیر کے باعث آئے روز ٹریفک جام اور حادثات پیش آتے ہیں، جن میں کئی قیمتی جانیں ضائع ہو چکی ہیں۔ ایڈوائزر صوبائی محتسب نے اس مسئلے کو عوامی ضرورت قرار دیتے ہوئے اس کے حل کے لیے ہر ممکن تعاون کی یقین دہانی کرائی۔
کھلی کچہری میں پولیس، ریونیو اور دیگر سرکاری محکموں کے افسران بھی موجود تھے، جبکہ شہریوں نے بڑی تعداد میں اپنی درخواستیں جمع کروائیں۔ معروف سماجی شخصیت و جنرل سیکرٹری پاکستان مسلم لیگ (ن) ملک محمد شہباز، معروف سوشل ورکر محمد اعظم بٹ اور دیگر سماجی شخصیات نے بھی عوام کی رہنمائی اور معاونت میں فعال کردار ادا کیا۔
رپورٹ: محمد یاسر
انفارمیشن سیکرٹری، قلعہ احمد آباد پریس کلب رجسٹرڈ، نارووال
