14/12/2025
بریکنگ نیوز
کوڑا کرکٹ کے ڈھیر، تعفن اور بیماریاں—منتخب نمائندے لاپتہ!
عوام کا چیئرمین ارشد قریشی اور کونسلرز کے خلاف کھلا احتجاج
یوسی 8 منوآباد، غریب آباد اور غلام رسول شاہ کالونی میں صفائی ستھرائی مکمل طور پر ناکام ہو چکی ہے۔ گلیاں کوڑے کے ڈھیروں میں تبدیل ہو چکی ہیں، شدید بدبو اور بیماریوں نے عوام کی زندگی اجیرن بنا دی ہے، مگر منتخب جیالے چیئرمین ارشد قریشی اور کونسلرز کہیں نظر نہیں آتے۔عوام نے اپنی شدید نفرت اور غصے کا اظہار کرتے ہوئے پورے علاقے میں احتجاجی بینرز آویزاں کر دیے ہیں، جن پر صاف لکھا ہے کہ ہمیں ووٹ مانگنے والے آج جواب دینے سے کیوں بھاگ رہے ہیں؟شہریوں کا کہنا ہے کہ یوسی کے لیے ہر ماہ 12 لاکھ روپے جاری کیے جاتے ہیں، مگر زمین پر صفائی کا نام و نشان نہیں۔ سوال یہ ہے کہ یہ رقم آخر کہاں جا رہی ہے؟عوام نے اس مبینہ لوٹ مار کی اعلیٰ سطح پر تحقیقات کا مطالبہ کیا ہے۔علاقہ مکینوں نے پیپلز پارٹی کی قیادت کو خبردار کیا ہے کہ اگر فوری نوٹس نہ لیا گیا تو احتجاج سڑکوں تک محدود نہیں رہے گا بلکہ ضلعی سطح پر پھیلایا جائے گا، جس کی تمام تر ذمہ داری منتخب نمائندوں پر عائد ہوگی۔
عوام کا دو ٹوک مطالبہ: صفائی دو، یا کرسی چھوڑو!
