https://www.facebook.com/111500548622649/

Urdu News Updates, Pabbi (2025)

22/05/2024

ایرانی صدر کے ہیلی کاپٹر حادثے کی تفصیلات سامنے آگئیں

'ایک ہیلی کاپٹر تانبے کی کان پر اتارا گیا، ہیلی کاپٹروں کو بادل سے بچانے کی ہدایت ملی'

ایرانی صدر ابراہیم رئیسی کے صدارتی کانوائے میں شامل تین ہیلی کاپٹروں کے درمیان رابطوں اور ہیلی کاپٹر حادثے کے تفصیلات سامنے آگئی ہیں۔

تین روز قبل ایرانی مشرقی آذر بائیجان صوبے میں خراب موسم کے باعث ایرانی صدرابراہیم رئیسی کے ہیلی کاپٹر کو حادثہ پیش آیا تھا جس میں ابراہیم رئیسی، وزیر خارجہ امیر عبداللہیان، مشرقی آذر بائیجان کے گورنر مالک رحمتی، تبریز کے امام سید محمد الہاشم، صدر کے سیکیورٹی یونٹ کے کمانڈر سردار سید مہدی موسوی سمیت بارڈی گارڈ اور ہیلی کاپٹر عملہ جاں بحق ہوگیا تھا۔

صدارتی کانوائے میں شامل تین ہیلی کاپٹروں میں سے ایک ہیلی کاپٹر میں موجود ایرانی اہلکارغلام حسین اسماعیل نے بتایا کہ صدر کے ہیلی کاپٹر کا پائلٹ تینوں ہیلی کاپٹروں کے کانوائے کا انچارج تھا، جب ہیلی کاپٹروں نے تبریز کیلئے دوپہر ایک بجے پرواز شروع کی تو اس وقت موسم ٹھیک تھا۔

غلام حسین اسماعیل کے مطابق صدر رئیسی کا ہیلی کاپٹر دیگر دو ہیلی کاپٹروں کے درمیان میں تھا، بادلوں کے اوپر پرواز کے 30 سیکنڈ بعد ہمارے پائلٹ نے نوٹ کیا کہ صدر کا ہیلی کاپٹر غائب ہو گیا ہے۔

ان کا کہنا تھا کہ پرواز کے 45 منٹ بعد ابراہیم رئیسی کے ہیلی کاپٹر کے پائلٹ نے دیگر ہیلی کاپٹروں کے پائلٹوں کو احکامات دیے کہ وہ قریب موجود بادل سے بچنے کیلئے اپنے ہیلی کاپٹروں کو مزید بلندی پر لے جائیں۔

انہوں نے بتایا کہ ہمارا پائلٹ پرواز کو نیچے اس لیے نہیں لا سکتا تھا کیونکہ بادل موجود تھا، چنانچہ پرواز جاری رکھی گئی اور قریبی تانبے کی کان پر اسے اتارا گیا۔

22/05/2024

ہیٹ ویو کے سبب بندر درختوں سے گرنے لگے

متعدد بندروں کو مقامی لوگوں نے بچانے کی کوشش کی ہے، ڈاکٹر

میکسیکو میں ہیٹ ویو کی وجہ سے بندر درختوں سے گر کر مر رہے ہیں۔

دی گارجین کی رپورٹ کے مطابق خلیجی ساحلی ریاست تباسکو میں کم از کم 83 درمیانے سائز کے پریمیٹ نسل کے بندر مردہ پائے گئے۔

اس حوالے سے ڈاکٹر سرجیو ویلنزوئلا نے بتایا کہ متعدد بندروں کو مقامی لوگوں نے بچانے کی کوشش کی اور وہ انہیں قریبی طبی مراکز لے کر آئے۔

انہوں نے مزید بتایا کہ “بندر ہیٹ ویو کی وجہ سے پانی کی کمی کا شکار ہوئے اور بخار میں مبتلا ہوگئے کئی زیر علاج بندروں کی حالت نازک ہے۔

خیال رہے کہ میکسیکو کی شدید گرمی سے مارچ میں کم از کم 26 افراد ہلاک ہوگئے تھے۔ دوسری جانب جانوروں کے ڈاکٹروں اور امدادی کارکنوں کا کہنا ہے کہ ہیٹ ویو سے درجنوں اور شاید سینکڑوں بندر ہلاک ہو چکے ہیں۔

ویلنزوئلا نے بے حال بندوں کے ہاتھوں اور پیروں پر برف ڈالی اور آئی وی کے ذریعے پانی کی مقدر کو پورا کرنے کی کوشش کی۔ ۔

ویلنزوئلا کے دفتر میں پنجرے موجود ہیں جہاں “صحت یاب ہونے والے بندر جارحانہ ہیں اور وہ دوبارہ کاٹ رہے ہیں، انہوں نے کہا کہ یہ عام طور پر بندر کے لیے ایک صحت مند علامت ہے۔

جنگلی حیات کے ماہر حیاتیات گلبرٹو پوزو نے 8.3 بندروں کی گنتی کی ہے جو گرمی کے باعث پانی کی کمی یا ہیٹ ویو کا شکار ہو کر ہلاک ہوگئے۔

22/05/2024

ایرانی صدر کی وفات پر اقوام متحدہ میں ایک منٹ کی خاموشی پر اسرائیل سیخ پا

ایرانی صدر کے ہیلی کاپٹر حادثے میں جاں بحق ہونے کے بعد اقوام متحدہ کی سلامتی کونسل کے ارکان نے ان کو خراج عقیدت پیش کرنے کیلئے اجلاس کے آغاز میں ایک منٹ کی خاموشی اختیار کی۔

غیرملکی میڈیا کے مطابق پیر کو ہونے والے اس اجلاس کے موقع پر ہیلی کاپٹر حادثے پر اقوام متحدہ میں مختلف ممالک کے مندوبین نے کھڑے ہو کر ایک منٹ کے لیے خاموشی اختیار کی تھی۔

میڈیا رپورٹ کے مطابق اس اقدام پر اسرائیل کے مستقل مندوب گیلاد اردن نے ایک بار پھر ہٹ دھرمی اور بدتمیزی کا مظاہرہ کیا اور وہ ارکان کے اس عمل پر غصے میں دکھائی دیے۔

اسرائیلی مندوب نے اپنے ویڈیو پیغام میں اس عمل پر شدید تنقید کی۔

غیرملکی میڈیا کے مطابق اسرائیلی سفیر نے 2022ء میں اپنی تقریر کے دوران چند سیکنڈ کے لیے جنرل اسمبلی کے پبلک ہال میں صدر رئیسی کے خلاف ایک پلے کارڈ بھی اٹھایا تھا۔

یاد رہے کہ ایرانی صدر ابراہیم رئیسی، وزیر خارجہ حسین امیر عبداللہیان اور دیگر افراد گزشتہ اتوار کو ہیلی کاپٹر حادثے میں جاں بحق ہوگئے تھے۔

16/02/2024

زمین کس طور 2013 سے خود کو ’قیامت‘ کیلئے تیار کر رہی ہے؟

ایک بڑے شہابِ ثاقب کا زمین سے تصادم روکنے کیلئے یوروپین اسپیس ایجنسی کے مشن کی تشکیل

ایک بہت بڑی خلائی چٹان زمین کی طرف آرہی ہے۔ زمین سے اس کے تصادم کی صورت میں زمین کو غیر معمولی جانی و مالی نقصان کا سامنا ہوسکتا ہے۔

روس میں چیلیابنسک نامی شہابِ ثاقب کو تباہ ہوئے ایک عشرہ گزر چکا ہے۔ چیلیابنسک کے پھٹنے سے ڈیڑھ ہزار افراد زخمی ہوئے تھے اور خاصا مالی نقصان ہوا تھا۔

اب خلائی بسیط سے آنے والے ایک اور بڑے شہابِ ثاقب کا سامنا کرنے کے لیے زمین خود کو اچھی طرح تیار کر رہی ہے۔

13 اپریل 2029 کو Apophis زمین کے بہت قریب سے گزرے گا۔ ایک بڑے شہابِ ثاقب کو بہت قریب سے دیکھنے اور اس کا اچھی طرح جائزہ لینے کا یہ ایک اچھا موقع ہے۔ یوروپین اسپیس ایجنسی اس ٹاکرے کے حوالے سے مشن تیار کر رہی ہے۔

بروس ولس کی معروف مووی ’آرماگیڈن‘ میں ایک بہت بڑی خلائی چٹان کو زمین کی طرف آتے ہوئے دکھایا گیا ہے۔ فٹبال گراؤنڈ سے بھی بڑی اس چٹان کو زمین کے نزدیک پہنچنے سے پہلے ہی تباہ کرنے کی خاطر ایک مشن بھیجا جاتا ہے۔ اس مشن کے ارکان چٹان کو زمین سے بہت دور خلا میں تباہ کردیتے ہیں۔ ایپوفِس کے معاملے میں بھی کچھ ایسا ہی سوچا جارہا ہے۔

اس سلسلے میں دی انٹرنیشنل ایسٹیرائڈ وارننگ نیٹ ورک اور دی اسپیس مشن پلاننگ ایڈوائزری گروپ کی تشکیل کے لیے تکنیکی پیچیدگیاں دور کی جارہی ہیں۔

خلا میں ٹوٹے ہوئے ستاروں کے ٹکڑے بھٹکتے پھرتے ہیں۔ ایسی خلائی چٹانوں کو زمین سے بہت دور، خلائے بسیط ہی میں شناخت کرکے زمین سے ان کے تصادم کے امکان کا جائزہ لے کر مشن ترتیب دیے جاتے ہیں تاکہ زمین کو قیامت خیز نقصان سے بچایا جائے۔

16/02/2024

نئی فلم کی ریلیز سے پہلے ڈھائی گھنٹے تک غسل کرتا ہوں، شاہ رخ خان کا انکشاف

شاہ رخ خان نے اپنی فلمیں ہٹ اور فلاپ ہونے کے بارے میں بات کی.
متحدہ عرب امارات: بالی ووڈ کے بادشاہ شاہ رخ خان نے انکشاف کیا ہے کہ وہ اپنی ہر نئی فلم کی ریلیز سے پہلے ڈھائی گھنٹے تک غسل کرتے ہیں۔

چار سال کے طویل وقفے کے بعد، شاہ رخ خان نے سال 2023 میں اپنی تین سُپر ہٹ فلموں ‘پٹھان’، ‘جوان’ اور ‘ڈنکی’ کے ساتھ بالی ووڈ میں شاندار واپسی کی، اُن کی تینوں فلموں نے ریکارڈ توڑ کامیابی اپنے نام کی۔

اب حال ہی میں شاہ رخ خان نے متحدہ عرب امارات میں منعقدہ “ورلڈ گورنمنٹ سمٹ” میں شرکت کی جہاں اُنہوں نے انکشاف کیا کہ وہ اپنی ہر نئی فلم کی ریلیز سے پہلے ایک کام لازمی کرتے ہیں۔

شاہ رخ خان نے کہا کہ بھارت میں فلمیں زیادہ تر جمعہ کو ریلیز ہوتی ہیں تو میں اپنی فلم کی ریلیز سے ایک دن پہلے جمعرات کو ڈھائی گھنٹے غسل کرتا ہوں جس سے مجھے بہت سکون ملتا ہے۔

اداکار نے اپنی فلمیں ہٹ اور فلاپ ہونے کے بارے میں بات کرتے ہوئے کہا کہ فلموں کے نتائج اکثر اداکار اور فلمسازوں کو حیران کردیتے ہیں، اکثر ہم کسی فلم پر بہت زیادہ محنت کرتے ہیں اور اُمید ہوتی ہے کہ دنیا کو یہ فلم پسند آئے گی لیکن وہ فلم فلاپ ہوجاتی ہے، اسی طرح جس فلم کی کہانی اداکار کو خاص پسند نہیں آتی وہ فلم سب سے زیادہ ہٹ ہوجاتی ہے۔

اُنہوں نے کہا کہ کامیابی اور ناکامی زندگی کا حصہ ہے، ہمیں ہمیشہ اپنے لیے دُعا مانگنی چاہیے اور اپنی غلطیوں سے سیکھ کر مزید اچھا کام کرنا چاہیے۔

ایک سوال کے جواب میں شاہ رخ خان نے مزاحیہ انداز میں کہا کہ مجھے پیسوں کی ضرورت ہے کیونکہ نہانے کا تیل بہت مہنگا ہوگیا ہے۔

16/02/2024

یہ ایک بھی قرآنی آیت نہیں سنا سکے اور ۔۔ اقرار الحسن کی حق خطیب حسین علی بادشاہ سے مناظرے کی ویڈیوز وائرل، دیکھئے کیا کچھ ہوا؟

اقرار الحسن اور حق خطیب کا معاملہ گذشتہ کئی ہفتوں سے جاری تھا جس میں اینکر پرسن اقرار نے پیر آف بلاوڑہ شریف حق خطیب حسین علی بادشاہ سے متعلق دعویٰ کیا تھا کہ وہ ختم نبوت کے نعرے کی پیچھے اپنا کاروبار چمکا رہے ہیں۔

کئی دنوں تک اقرار الحسن کی جانب سے حق خطیب کو سامنے آکر اپنے عملیات کرانے کا چیلنج کیا جاتا رہا۔ اقرار اپنے آفیشل سوشل میڈیا پیجز پر بھی حق خطیب سے متعلق لوگوں کے ذہنوں میں پھیلی جھوٹی کرامات کا پردہ فاش کرنے کے حوالے سے بتاتے رہے۔

اقرار الحسن نے پیر آف بلاوڑہ جاکر مناظرے کرنے سے قبل یوٹیوب پر ایک مختصر ویڈیو بھی شیئر کی اور بتایا کہ وہ اپنے ساتھ متعدد معذور اور بیمار افراد لے کر جا رہے ہیں تاکہ حق خطیب ایک ہی پھونک اسے ان معذوروں کو بھی اپنے پیروں پر کھڑا کر سکیں۔

بعد ازاں انہوں نے یوٹیوب پر پیر آف بلاوڑہ شریف سے مناظرے کی براہ راست ویڈیو بھی شیئر کی، جس میں کوئی آواز سمجھ نہیں آ رہی اور اقرار الحسن کو ہجوم میں حق خطیب سے گلے ملتے دیکھا جا سکتا ہے۔

اقرار الحسن نے اپنی ٹوئٹس میں بتایا کہ حق خطیب کے مریدوں نے ان پر اور ان کی ٹیم پر تشدد کیا، ان کے موبائل اور کیمرے چھین لیے اور انہیں براہ راست مناظرہ نشر کرنے سے روک دیا۔

اس پر حق خطیب نے انہیں بتایا کہ یہ کرامات ہوتی ہیں، جیسے دیگر علما کے پاس بھی کرامات تھیں اورساتھ ہی ویڈیو میں پیر آف بلاوڑہ کو دیگر علما کے نام غلط لیتے ہوئے بھی سنا جا سکتا ہے۔

اقرار الحسن کا کہنا تھا کہ حق خطیب ایک قرآنی آیت بھی نہ سنا سکے اور ساتھ ہی انہوں نے انہیں جعلی پیر قرار دیتے ہوئے علما سے مطالبہ کیا کہ وہ حق خطیب کے خلاف آواز بلند کریں۔

16/02/2024

دادا کی پوتی کا نیا روپ سوشل میڈیا پر وائرل، الیکشن پر کیا کہتی ہیں؟ جانئے

مظفر گڑھ (ڈیلی پاکستان آن لائن )انتخابی مہم کے دوران اپنے دادا کی مثالیں دیتے ہوئے علاقہ مکینوں سے ووٹ کی اپیل کرنے والی نوجوان ماہا بخاری کا نیا روپ دیکھ کر سوشل میڈیا صارفین دنگ رہ گئے ۔

تفصیلات کے مطابق ماہا بخاری نے سوشل میڈیا پر وائرل ہونے والی ویڈیو میں سرخ رنگ کا ٹاپ اور سیاہ رنگ کی جینز زیب تن کی ہوئی ہے جس میں نہایت خوبصورت دکھائی دے رہی ہیں جبکہ انتخابی مہم کے دوران وہ پاکستان کے روایتی لباس شلوار قمیض میں دکھائی دیتی رہی لیکن ایک مرتبہ پھر وہ اپنے مغربی روپ میں سب کی توجہ کا مرکز بن گئیں ہیں ۔

نوجوان صحافی ویڈیو میں ماہا بخاری سے سوال کرتا ہے کہ آپ کا الیکشن کیسا رہا ؟ جس پرانہوں نے جواب دیتے ہوئے کہا کہ یہ سب اللہ کے ہاتھ میں ہے ، سب کے سامنے ہے جو بھی ہوا، پورے ملک کا الیکشن ہی صحیح نہیں رہا تو میرا اکیلی کا کیسے صحیح رہتا۔

دھاندلی کے سوال کا جواب دیتے ہوئے ماہا نے کہا کہ انصاف اللہ پر چھوڑ دیاہے ، ناانصافی تو پورے ملک میں سب کے ساتھ ہی ہوئی ہے ۔آخر میں نوجوان صحافی نے سوال پو چھا کہ آپ کسی جماعت کی مخصوص نشست پر اسمبلی پہنچنے کی کوشش میں ہیں ؟ جس پر ماہا بخاری نے جواب دیا کہ مجھے تو ایسا کچھ نہیں پتا لیکن اگر آپ کو پتا ہے تو مجھے بھی بتا دیں۔

یاد رہے کہ ماہا بخاری کی الیکشن مہم کے دوران ایک ویڈیو سوشل میڈیا پر بہت زیادہ وائرل ہوئی جس میں وہ اپنے دادا کا نام لے کر انتہائی جذباتی انداز میں لوگوں سے ووٹ کی اپیل کر رہی تھیں لیکن ان کی یہ ترکیب بھی کام نہ آئی اور 5 نشستوں سے الیکشن لڑنے والا ان کا پور اخاندان ہی ہار گیا ۔

واضح رہے کہ عام انتخابات میں مظفر گڑھ کی تحصیل جتوئی سے تعلق رکھنے والے سابق چیئر مین کشمیر کمیٹی سید باسط سلطان بخاری خاندان سمیت بری طرح ہار گئے تھے ، جو دو قومی اور تین صوبائی اسمبلیوں کی نشست پر لڑ رہے تھے ، سید باسط خود این اے 176 اور پی پی 272 سے امیدوار تھے ان کی بیٹی شہر بانو این اے 177 سے ن لیگ کے ٹکٹ پر الیکشن لڑ رہی تھیں جبکہ باسط سلطان کی اہلیہ زہرا باسط این اے 178 اور پی پی 274 سے آزاد حیثیت میں الیکشن لڑ رہی تھیں ۔

16/02/2024

پولیس اہلکار کی سیلفی کے بعد منی پور میں ہنگامے، دو ہلاک، 25 زخمی

منی پور میں دو قبائل کے درمیان شدید کشیدگی پائی جاتی ہے اور ان کے درمیان جھڑپوں میں متعدد ہلاکتیں بھی ہو چکی ہیں (فوٹو: اے ایف پی)
انڈیا کی ریاست منی پور میں مسلح افراد کے ساتھ سیلفی وائرل ہونے پر پولیس اہلکار کو معطل کیے جانے کے خلاف ہنگامے پھوٹ پڑے، جن میں کم سے کم دو افراد ہلاک اور 25 زخمی ہو گئے۔

انڈین ٹی وی این ڈی ٹی وی کے مطابق واقعہ منی پور کے علاقے کوکی زو قبائل کی اکثریت رکھنے والے ضلع چند پور میں پیش آیا۔

رپورٹ کے مطابق ہیڈ کانسٹیبل سیام لال پور کی ایک ایسی سیلفی سوشل میڈیا پر وائرل ہوئی جس میں وہ مسلح افراد کے ساتھ ایک پہاڑ پر بنے مورچے میں کھڑے ہیں۔ اس کے بعد محکمے کی جانب سے ان کو معطل کیا گیا۔

اس کے خلاف سینکڑوں کی تعداد میں لوگ احتجاج کے لیے نکلے جو سکیورٹی فورسز کے ساتھ جھڑپوں میں بدل گیا اور رپورٹ میں ایسی تصاویر بھی شامل کی گئی جن میں جگہ جگہ آگ لگی ہوئی ہے۔

اسی طرح ایسی ویڈیوز اور تصاویر بھی سامنے آئی ہیں جن میں لوگوں نے ایس پی کے دفتر کا گھیراؤ کر رکھا ہے، پولیس کا کہنا ہے کہ علاقے میں شدید کشیدگی کا ماحول ہے۔

مظاہرین نے پولیس چیف کے دفتر کے سامنے ایک بس اور دوسرے انفراسٹرکچر کو نذر آتش کیا اور صورت حال بگڑنے پر سکیورٹی فورسز نے فائرنگ کر دی۔

علاقے میں موبائل پر انٹرنیٹ کی سروس بھی بند کر دی گئی ہے۔

چورا چاند پور کے پولیس سپرٹنڈنٹ شیوانند سوروے کا کہنا ہے کہ ’ہیڈ کانسٹیبل سیام لال پور کے خلاف محکمانہ تحقیقات مکمل ہو گئی ہیں، سوشل میڈیا پر ایک ویڈیو کلپ وائرل ہوا تھا جس میں ان کو مسلح افراد کے ہمراہ اپنی ویڈیو بناتے ہوئے دیکھا جا سکتا ہے، جس کے بعد ان کو معطل کیا گیا۔‘

پولیس کا کہنا ہے کہ علاقے میں صورت حال کشیدہ ہے (فوٹو: این ڈی ٹی وی)

احتجاج کے دوران سامنے آنے والی ویڈیوز میں مسلح افراد کے گروپس کو ایک دوسرے پر فائرنگ کرتے ہوئے دیکھا جا سکتا ہے اور وہ خود کو ’گاؤں کے محافظ رضاکار‘ قرار دیتے ہیں۔

یہ صورت حال ایک ایسے وقت میں سامنے آئی ہے جب منی پور کے دو قبائل میں نسلی کشیدگی پہلے سے موجود ہے اور ان کے درمیان جھڑپوں میں ہلاکتیں بھی ہو چکی ہیں۔

پولیس کی جانب سے ایکس پر جاری بیان میں کہا گیا ہے کہ ’ریپڈ ایکشن فورس (آر اے ایف) نے مظاہرین کو منتشر کرنے کے لیے آنسو گیس کے شیل فائر کیے جس میں لوگ زخمی بھی ہوئے۔‘

پوسٹ کے مطابق ’ایک 300 سے 400 افراد پر مشتمل ہجوم نے ایس پی آفس میں گھسنے کی کوشش کی اور پتھراؤ کیا جس پر ریپڈ ایکشن فورس حرکت میں آئی۔‘

احتجاج کرنے والوں کا کہنا ہے کہ ہیڈ کانسٹیبل کو ناجائز طور پر معطل کیا گیا ہے اور ان کو بحال کیا جائے۔

16/02/2024

سائنس دانوں نے مقناطیس کی نئی قسم دریافت کرلی

دریافت ہونے والی یہ قسم (آلٹرمیگنیٹزم) مقناطیس کی تیسری قسم ہے

پراگ: سائنس دانوں نے بالآخر مقناطیس کی ایک نئی قسم دریافت کر لی جس کے متعلق ان کا خیال تھا کہ یہ وجود نہیں رکھتی۔ آلٹر میگنیٹزم نامی یہ مظہر دریافت کرنے والی ٹیم کا کہنا ہے کہ یہ مقناطیس مزید بہتر برقی آلات بنانے کے لیے استعمال کیا جاسکے گا۔

آلٹرمیگنٹس، فیرو میگنیٹس (کچن ریفریجریٹر میں پائی جانے والی قسم) اور اینٹی فیرو میگنٹس (جس پہلی بار فرانسسی طبعیات دان لوئیس نیل نے 1930 کی دہائی میں دریافت کیا تھا) کے بعد میگنیٹزم کی تیسری قسم ہے۔

آلٹرمیگنیٹزم کا تجرباتی ثبوت سوئس لائٹ سورس (ایس ایل ایس) میں چیک اکیڈمی آف سائنسز اور سوئٹزرلینڈ کے پال شیرر انسٹیٹیوٹ کے سائنس دانوں کے اشتراک سے حاصل کیے گئے۔

اس مقناطیس کا نظریہ پہلی بار 2019 میں چیک رپبلک کی انسٹیٹیوٹ آف فزکس اور جرمنی کی یونیورسٹی آف مینز کے سائنس دانوں کی ٹیم نے پیش کیا تھا۔

تحقیق کی سربراہی کرنے والے ادارے چیک اکیڈمی آف سائنسز میں قائم انسٹیٹیوٹ آف فزک کے پروفیسر تھامس جنگ ورتھ کا کہنا تھا کہ جس چیز کو لوگ ناممکن سمجھتے تھے وہ در حقیقت ممکن ہے۔ اور یہ ایسی چیز نہیں جو چند ایک مبہم مواد میں پائی جاتی ہو۔ بلکہ یہ ایسے متعدد کرسٹل میں وجود رکھتا ہے جو لوگوں کے دراز میں موجود ہوتے ہیں۔

یہ دریافت جہاں نئی جنریشن کے کمپیوٹر اور برقی آلات میں بہتری کو یقینی بناتی ہے وہیں محققین کا ماننا ہے کہ یہ کنڈینسڈ میٹر فزکس کے فہم کو بھی بہتر کرے کی جو اسپنٹرونکس کے شعبے کو میں جدت لا سکتا ہے۔

16/02/2024

متحدہ عرب امارات میں طوفانی ژالہ باری سے نقصانات کی حیران کُن تصاویر وائرل

ایسی ژالہ باری دہائیوں میں بھی دیکھی نہ سُنی، شہریوں کے تاثرات

متحدہ عرب امارات کی ریاست العین میں بارش کی طرح ہونے والی ژالہ باری اور اس سے ہونے والے نقصانات کی ویڈیوز سوشل میڈیا پر وائرل ہیں۔

العین کے گارڈن سٹی میں رہنے والوں کے لیے یہ سب کچھ خوشگوار نہیں تھا۔ خلیج ٹائمز سے بات کرتے ہوئے کچھ رہائشیوں نے اپنی حالت زار کے بارے میں بتایا کہ اس سے شہر بھر میں گاڑیوں اور دکانوں کو نقصان پہنچا ہے، ایسی ژالہ باری پہلے کبھی نہ دیکھی۔

دہائیوں سے العین میں رہنے والے ایک ہندوستانی لیجیش پریم لال اس وقت گھر پر ہی تھے جب شدید ژالہ باری شروع ہوئی۔ انہوں نے کہا کہ میں یہاں 40 سال سے رہ رہا ہوں لیکن اتنے بڑے پیمانے پر ایسا طوفان پہلے کبھی بھی نہیں دیکھا۔

لیجیش کے مطابق گھر کے باہر کے منظر نے ان پر مایوسی طاری کردی کیونکہ ان کی گاڑی کی چھت اور کھڑکیاں ژالہ باری کی زد میں آکر ٹوٹ گئے تھے۔ بہت سی گاڑیاں تباہ ہو گئیں اور صرف یہی نہیں، بلکہ دکانوں کی کھڑکیوں اور سائن بورڈز کو بھی نقصان پہنچا ۔

انٹیریئر کنٹریکٹنگ کے کاروبار کے مالک 48 سالہ لیجیش نے مزید بتایا کہ شہر بھر میں متعدد درخت جڑ سے اکھڑ گئے اور عمارتوں کو بھی معمولی نقصان پہنچا۔ژالہ باری کے علاوہ موسلا دھار بارش کی وجہ سے شہر میں کئی ٹریفک لائٹس خراب ہوگئیں اور سڑکوں پر پانی بھر گیا۔

لیجیش کے مطابق کو صبح سویر رہائشیوں کو حکام کی طرف سے انتباہی ہنگامی پیغامات موصول ہونے لگے تو وہ باہرنہیں نکلے، ان الرٹس سے ہمیں مدد ملی اورلوگوں نے قواعد پر عمل کیا۔

العین میں انڈین سوشل سینٹر کے سابق صدر مبارک مصطفیٰ جو اب ایک آٹوموبائل کمپنی میں بطور مینیجرکام کرتے ہیں، کہا کہ ایسی ژالہ باری کبھی نہ دیکھی۔

مبارک مصطفیٰ کے مطابق ، ’میرے گھر کے پیچھے ایک وادی بہہ رہی ہے جس کے اوپر برف کی گیندیں ہیں۔ میں یہاں 26 سال سے رہ رہا ہوں اور ایسا کچھ کبھی نہیں دیکھا۔ ایسا لگتا ہے جیسے میں دنیا کے کسی دوسرے حصے میں ہوں۔‘

اس طوفان سے ان کی کار، پجیرو اور پچھلی کھڑکی کو شدید نقصان پہنچا۔ انہوں نے بتایا کہ سڑک پراُن کی دیگر گاڑیاں بھی اسی طرح کے حالت میں ہیں۔ صرف العین کے جہیلی میں 500 سے 600 گاڑیوں کو نقصان پہنچا جبکہ ان کے علاقے کی گلیوں میں 100 سے 150 گاڑیوں کو نقصان پہنچا۔

شیئر کی گئی ویڈیو میں طوفان کی شدت کی وجہ سے انکے کمپاؤنڈ کا فرنیچر ٹوٹا ہوا دکھائی دے رہا ہے۔

مبارک مصطفیٰ کے مطابق ان کی انشورنس پالیسی میں قدرتی آفات کا دعویٰ ہے۔ آٹوموبائل انڈسٹری میں کام کرتے ہوئے وہ جانتےہیں کہ یہ کیسے کام کرتا ہے، اس لیے بہت سے گاہکوں کے دعووں کے حل کیلئے وہ کل پولیس اسٹیشن جائیں گے۔

انہوں نے سڑکوں کی صفائی کیلئے فوری کارروائی کو سراہتے ہوئے کہا کہ مجھے متحدہ عرب امارات کے بارے میں یہی پسند ہے، یہاں ہر کوئی ایک ٹیم کے طور پر کام کرتا ہے. برف کے بڑے گولوں کی وجہ سے نکاسی آب کا نظام بند ہو گیا تھا اور پولیس نے فوری کارروائی کی ۔

العین کے ایک اور رہائشی روئل کا تعلق فلپائن سے ہے اور وہ 15 سال سے متحدہ عرب امارات میں مقیم ہیں۔ وہ اپنی گاڑی کی ٹوٹی ہوئی کھڑکی، سائیڈ شیشے اور ڈینٹس کو دیکھ کر بیدار ہوئے۔

العین میں اپنے دو کتوں کے ساتھ رہنے والی پولینڈ کی شہری اگاتا بھی ژالہ باری کے باعث گھر کی چھت بجنے سے بیدار ہوئیں۔

ان کے دوستوں کی جانب سے شیئر کی گئی دتصاویر میں التوام اسپتال کے قریب واقع کمپاؤنڈ کو ژالہ باری سے کافی نقصان پہنچا ہوا دکھائی دے رہا ہے۔ طوفان کی وجہ سے کئی جگہوں پر کئی دیواروں پر لگا پینٹ بھی اکھڑ گیا۔

العین میں 16 سال سے رہائش پذیر سوڈانی نژاد مونا ایلسڈگ نے ژالہ باری کو نیا تجربہ قرار دیتے ہوئے کہا کہ اس طرح کا طوفان کبھی نہیں دیکھا۔ ہمیں پہلی ژالہ باری دیکھے 7 سال ہو چکے ہیں اور وہ بہت ہلکی تھی۔ یہ ایک انوکھا تجربہ تھا۔

مونا کے دادا جو توام اسپتال میں تھے، جاگ رہے تھے جب شہر میں ژالہ باری ہوئی۔ ان کی جانب سے شیئر کی گئی ویڈیو میں طوفان کا شدید اثر دیکھا جا سکتا ہے جس نے علاقے کی عمارتوں کو نقصان پہنچایا۔

العین کے اسکولوں کے ایک گروپ کے سی ای او زاہد سروش 1980 میں شہر منتقل ہو گئے تھے۔ تقریبا 12 سال دور رہنے کے باوجود انہوں نے اس طرح کی کوئی چیز کبھی نہیں دیکھی۔

زاہد نے کہا کہ طلباء نے آج ریموٹ لرننگ کا مشاہدہ کیا۔ لیکن ہم نے کم از کم مزید دو دن تک ریموٹ لرننگ جاری رکھنے کی اجازت کے لیے حکام سے رابطہ کیا ہے۔ اس حالت میں کلاسوں کا انعقاد ہمارے لئے بالکل ناممکن ہوگا۔

16/02/2024

مختصر وقت کیلئے دنیا کا امیر ترین شخص، 2 منٹ میں ساری دولت گنوا دی

کرس رینالڈز اپنے اکاؤنٹ میں ایک دن اچانک کھربوں ڈالرز دیکھ کر حیران رہ گئے

ڈیلاویئر: ہم میں سے اکثر لوگ لاٹری جیتنے کر یا کسی نہ کسی طرح کروڑ پتی بننے کا خواب دیکھتے ہیں لیکن کیا ہو اگر یہ خواب حقیقت کا روپ دھار لے اور آپ کے اکاؤنٹ میں لاکھوں یا اربوں نہیں بلکہ کھرب در کھرب ڈالرز کی رقم آجائے؟

ایسا ایک واقعہ امریکا میں پیش آیا تھا جس میں ایک مڈل کلاس شہری بہت ہی مختصر لمحے کے لیے انسانی تاریخ کا کھرب در کھرب پتی (quadrillionaire) بن گیا تھا لیکن محض 2 منٹ بعد اس نے یہ ساری دولت گنوادی تھی۔

ڈیلاویئر کاؤنٹی سے تعلق رکھنے والے کرس رینالڈز نے جولائی 2013 کو ایک دن اپنا پے پال اکاؤنٹ کھولا تاکہ معلوم کرسکیں اکاؤنٹ میں کتنے پیسے بچے ہیں لیکن انہیں یہ دیکھ کر اپنی آنکھوں پر یقین نہیں آیا کہ انکے اکاؤنٹ میں 92 92,233,720,368,547,800 ڈالرز موجود تھے۔

مختلف خبر رساں اداروں کو جب اس واقعے کی اطلاع ملی تو انہوں نے انکشاف کیا کہ کرس رینالڈز میکسیکو کے کاروباری شخص کارلوس سلم سے دس لاکھ گنا زیادہ امیر ہوگئے ہے جو اُس وقت دنیا کے امیر ترین آدمی تھے اور ان کی مجموعی دولت 67 بلین ڈالرز تھی۔

کرس نے سی این این کو بتایا کہ پہلے میں نے سوچا کہ شاید کوئی مزاق کر رہا ہے۔ بدقسمتی سے یہ سب اس وقت ختم ہوا جب پے پال کو اپنی غلطی کا فوری احساس ہوا اور انہوں نے رینالڈز سے ہونے والی ‘تکلیف’ کے لیے معافی مانگی اور غلطی کو درست کیا،

پے پال نے تلافی کے طور پر کرس کے پسند کے خیراتی ادارے کو کچھ رقم عطیہ کرنے کی پیشکش کی۔ ادارے نے اپنے جاری کردہ بیان میں کہا کہ ہم کرس کے عطیہ کرنے کے مقصد میں شامل ہونا چاہتے ہیں اور یہ اعزاز کی بات ہے۔

ادارے نے یہ بھی بتایا کہ ہم نے یہ پیشکش کرنے کے لیے کرس سے رابطہ کیا ہے اور کہا ہے کہ ہم شکر گزار ہیں کہ وہ ہمارے ایک گاہک ہے۔

13/02/2024

بھارتی وزیراعظم بدھ کو متحدہ عرب امارات میں پہلے مندر کا افتتاح کریں گے

27 ایکڑ پر بنائے گئے مندر کے لیے زمین شیخ محمد بن زید النہیان نے بطور تحفہ دی تھی

ابوظہبی: بھارتی وزیر اعظم نریندر مودی منگل سے شروع ہونے والے دو روزہ سرکاری دورے کے دوران متحدہ عرب امارات میں پہلے مندر کا افتتاح کریں گے۔

عرب میڈیا کے مطابق بھارتی وزیراعظم نریندر مودی متحدہ عرب امارات کے گزشتہ 8 ماہ کے دوران تیسرے اور 2015 کے بعد سے ساتویں سرکاری دورے پر منگل کو ابوظہبی پہنچیں گے۔

اس دو روزہ دورے میں بھارتی وزیراعظم متحدہ عرب امارات کے صدر شیخ محمد بن زید النہیان اور نائب صدر سمیت اعلیٰ حکام سے ملاقات کریں گے اور ابوظہبی میں مشرق وسطیٰ کے پہلے مندر کا افتتاح کریں گے۔

اس مندر کی تعمیر کا فیصلہ بھارتی وزیراعظم کے متحدہ عرب امارات کے 2015 کو کیے گئے دورے میں کیا گیا تھا۔ مندر کے لیے 13.5 ایکڑ (55 ہزار مربع میٹر) زمین اُس وقت کے ولی عہد اور موجودہ صدر محمد بن زید النہیان نے بطور تحفہ فراہم کی تھی۔

اس مندر کی تعمیر کا سنگ بنیاد 21 اپریل 2019 کو سوامی نارائن سنستھا کے روحانی لیڈر مہنت سوامی مہاراج شیلانیاس ودھی نے رکھا تھا جس میں متحدہ عرب امارات کے حکام بھی موجود تھے۔

مندر کی 7 چوٹیاں متحدہ عرب امارات کی 7 امارتوں کو ظاہر کرتی ہیں۔ اس مندر کی تعمیر میں استعمال ہونے والے سیکڑوں ٹن پتھروں کو بھارت میں ماہر کاریگروں نے تراشا تھا اور پھر انھیں متحدہ عرب امارات لاکر جوڑا گیا۔

مندر کے لیے منتخب کیے گئے پتھر راجستھان کے تھے جن کی خاصیت یہ ہے کہ شدید گرمی میں بھی یہ ٹھنڈک کا احساس دیتے ہیں۔

مندر کی لمبائی 262 فٹ، چوڑائی 180 فٹ اور اونچائی 108 فٹ ہے جب کہ اس میں 410 ستون، 12 اہرام کی چوٹیاں، 2 گنبد ہیں۔ مندر کی تعمیر ایسے کی گئی ہے اس پر 7 شدت کے زلزے کا کوئی اثر نہیں ہوگا۔

اپنے دورے میں بھارتی وزیراعظم نریندر مودی دبئی میں ورلڈ گورنمنٹ سمٹ 2024 میں بھی شرکت کریں گے جس میں ترکیہ اور قطر سمیت دیگر خلیجی ممالک کے سربراہان کی شرکت بھی متوقع ہے۔

بھارت اور متحدہ عرب امارات کے درمیان حالیہ برسوں میں تجارتی تعلقات نہایت مستحکم ہوئے ہیں دونوں ممالک کے یکم مئی 2022 سے جامع اقتصادی شراکت داری معاہدہ (CEPA) کے نفاذ کے بعد سے دو طرفہ تجارت 85 بلین ڈالر تک پہنچ گئی۔

یاد رہے کہ UAE 2022-23 میں براہ راست غیر ملکی سرمایہ کاری کے لحاظ سے بھارت میں سرفہرست 4 بڑے سرمایہ کار ممالک میں شامل ہے۔

Urdu News Updates

22/05/2024

22/05/2024

22/05/2024

16/02/2024

16/02/2024

16/02/2024

16/02/2024

16/02/2024

16/02/2024

16/02/2024

16/02/2024

13/02/2024

Address

Telephone

Website

Alerts

Contact The Business

Shortcuts

Share

Category