16/01/2024
AWAIS QARNI Bin nawaz
هر څوک دې شي بې زوره بې ازاره لکه ډم
ځئ ژوند وکړو د څو ورځو لهٔ پاره لکه ډم
زهٔ کــــــله د تذليل په انتها کښې خندېدای شم
زه دومــــــــــــــره حوصله نه لرم ياره لکه ډم
په چـــــپه خوله چا کومه ناروا کړله برداشت؟
په روڼ تـــــــــندي چا وکړه هره چاره لکه ډم
مولا خو دي له خولې واخله کږې کږې خبرې
دعا دې له خولې ووزه بې اختياره لکه ډم
په چـيغو کښې ټوپک سره روان يې ،شا ته ،شاته
د ډول سـره را وړاندې شه سالاره لکه ډم
مــمتازه چې د نورو خوشاليو ته خوشال شي
هر څـوک دې شي په دې جذبه سرشاره لکه ډم
شاعر : ممتاز اورکزے
