02/06/2026
پاکستان تحریک انصاف کے سینئر رہنما و ضلعی صدر محمد سہیل یوسفزئی نے اسسٹنٹ کمشنر صوابی عدنان ممتاز کے دفتر میں صوابی ایکشن کمیٹی کے ہمراہ سپرنٹنڈنٹ انجینئر پیسکو سے ملاقات کے دوران واضح اور دوٹوک مؤقف اختیار کرتے ہوئے کہا کہ شدید گرمی کے اس موسم میں صوابی کے عوام پر غیر اعلانیہ اور طویل لوڈشیڈنگ کسی صورت قبول نہیں کی جائے گی۔
انہوں نے کہا کہ بجلی چوری کے خاتمے کے لیے بلاامتیاز کارروائی کی جائے اور جو عناصر اس غیر قانونی عمل میں ملوث ہیں، ان کے خلاف سخت ترین قانونی اقدامات اٹھائے جائیں۔ محمد سہیل یوسفزئی نے کہا کہ احتساب کا عمل میرے گھر سے شروع کیا جائے، میرے بجلی کے میٹر اور بلوں کی ادائیگی کا مکمل ریکارڈ چیک کیا جائے۔ اگر کوئی خلاف ورزی سامنے آئے تو قانون کے مطابق کارروائی کی جائے۔
انہوں نے مزید کہا کہ معاشرے کے بااثر افراد اگر بجلی چوری میں ملوث ہیں تو انہیں بھی عوام کے سامنے بے نقاب کیا جائے اور ان کے خلاف بلاامتیاز کارروائی عمل میں لائی جائے۔ یہ ہرگز قابلِ قبول نہیں کہ بجلی چوری چند افراد کریں جبکہ اس کا خمیازہ پوری عوام لوڈشیڈنگ کی صورت میں بھگتے۔
اس کے علاوہ ضلعی صدر محمد سہیل یوسفزئی نے سپرنٹنڈنٹ انجینئر پیسکو کو واضح طور پر مطالبہ کیا کہ سٹیفا پیڈو پاور ہاؤس کے 18 میگاواٹ بجلی منصوبے کی مکمل تفصیلات عوام کے سامنے لائی جائیں۔ انہوں نے کہا کہ عوام کو بتایا جائے کہ یہ منصوبہ کس کی کاوشوں سے مکمل ہوا، اس سے پیدا ہونے والی بجلی کے یونٹس کس کو فراہم کیے جا رہے ہیں، کن بنیادوں پر فراہم کیے جا رہے ہیں، اور اس کے فوائد سے کون مستفید ہو رہا ہے۔ محمد سہیل یوسفزئی نے زور دیا کہ اس منصوبے کو سیاسی رنگ دینے یا اسے پاکستان تحریک انصاف کے ساتھ جوڑنے سے گریز کیا جائے اور تمام حقائق شفاف انداز میں عوام کے سامنے رکھے جائیں
انہوں نے مطالبہ کیا کہ پیسکو بجلی چوری کے خلاف مؤثر اقدامات کرے اور عوام کو بلاجواز لوڈشیڈنگ سے نجات دلانے کے لیے فوری عملی اقدامات اٹھائے
۔
