پختون شاعر

13/09/2025

زمونږه د کچه کور په بلۍ به راکوزیږی
سپوږمۍ ته به جولۍ نیسم سپوږمۍ به راکوزیږي

چې ناوې ده زمونږه میلمنه ده پښتنه ده
ډولۍ ته څادر اوتړۍ جینۍ به راکوزیږي

د کټ سره په خوا کښې ئې ولاړ په انتظار یم
پیزار به ورته سم کړمه ابۍ به راکوزيږي

سپرلیه که د ګل په خله ټپه د یکزار شوې
بیا ګوره په ګډا کښې لولکۍ به راکوزیږي

ته ځه د کاکا ځویه ستا د سوري نه یریږي
شیندلي مې غنم ورته مرغۍ به راکوزیږي

زړګیه ځان شپیلې کړه په شپېلۍ نه راویښیږي
په دویم چت کښې اوده ده په ټلۍ به راکوزیږي

زمونږ د کور د توت په څانګو خپلې لاړې تو که
ګبین به په کښې واچوي مچۍ به راکوزیږي

صادقه ګورې ځان ساته په میاشت کښې د صفری
په ویښه به دې ویسي ښاپیرۍ به راکوزیږي

12/09/2025

چې د ظلم انتها درباندې کېږي
او خاموش ئې نو غزا درباندې کېږي

چې روا او ناروا درباندې کېږي
روره خرڅ ئې کړې سودا درباندې کېږي

ماښامي کښې چې په بام راښکاره نه شوې
ددې يو ديدن قضا درباندې کېږي

يو قاتل او شل لاشونه بس دی پوه شوم
څه چې کېږي په رضا درباندې کېږي

دا تنخوا ټيک ده چې لږه ده روريه
خو ځه کار خو به د چا درباندې کېږي

کوم ګوټ پېر دې له يرغله په امان د؎
کومې لوبې پښتونخوا درباندې کېږي

هسې شک کول حرام دی خو سړيه
د ملګرو په صلا درباندې کېږي

اوس که ډېر په نا اشنا کردار کښې راشې
خو يقين مې د اشنا درباندې کېږي

دا له جنګه چې خلاف ئې برخورداره
لکه سوری د بابا درباندې کېږي

سم سړ؎ ئې سم شاعر ئې خو #اقباله
کله کله څه بلا درباندې کېږي


پختون شاعر

12/09/2025

نه د کوره چرته زم او نه سفر کړم
بې سفره مے غوڅیګی لار د عمر

معنی

"نه د کوره چرته زم":
زه له کوره نه وځم، یا نه خوځېږم.

"او نه سفر کړم":
او نه کومه اوږده یا مهمه سفر کوم.

"بې سفره مې غوڅیګي لار د عمر": خو بیا هم د ژوند سفر روان دی، عمر تېرېږي، که څه هم زه نه خوځېږم.

تفسیر

رحمان بابا دلته د ژوند د تېریدو فلسفه بیانوي. دا بیت دا پیغام لري چې

انسان که څه هم فزیکي حرکت ونه کړي، یا د کوره بهر لاړ نه شي، د ژوند سفر (یعنې وخت، عمر، تقدیر) خو هر صورت کې روان دی.

وخت نه درېږي، انسان خوښ وي که نه، ژوند مخکې روان وي.

#عبدالرحمان
پختون شاعر
پخـــــتون شـــاعــــر

11/09/2025

زما بخت د شمعي بخت دی یا به مرم او یا به سوزم
یا به ویخ له دہ دریاب ځم یا به پاس په اوبو خوزم
عجب زہ عجیبه لار ده عجیبه کاروان روان دی
ما وروستی پړاؤ له بیائی که زہ ځم او که زہ نه ځم

پختون شاعر

09/09/2025

ذکر چې د يار پکښې کم شوى دى
ژوند شته خو قرار پکښې کم شوى دى

خوږ دى پېښور راباندې ګران دى خو
امن او روزګار پکښې کم شوى دى

وايه اشنا ورځې شپې دې څنګه دي
بس تېرېږي کار پکښې کم شوى دى

وائي به چې خپل ملګري وشمېري
يا هلکه! #اسرار پکښې کم شوى دى

ياره #اتل هغسې اتل دى خو
ټکى د اظهار پکښې کم شوى دى
#اسراراتل
پختون شاعر

08/09/2025

ستا په بیلتون دومره غمجن یمه چې حد نه لري
په ماشوم زه داسې خوږمن یمه چې حد نه لري

که ئې په مینه کښې په دار شمه پروه مې نشته
په پشتون قام دومره مئین یمه چې حـد نه لري

د پښتانو په قتلِ عام خاموش مَلک او مُلا
له تاسو دومره #ګیلامن یمه چې حـــد نه لري

د باچا خان امر ماتیږي ګـني رب ګواه دے
نور دومره تنګ له تور دوښمن یمه چې حد نه لري

په کــرغیړنو او ازغنو کرښو بې له یـــاره
دومره دې تږے د دیدن یمه چې حد نه لري

کلـــه مــهاجر شمه او کله ترهـګر او غــــدار
دومره ذلیل په خپل وَطـن یمه چې حد نه لري

د پښتانو عزت لوټ کیږي او زه چپه خوله ناست یم
زه #ګیلامن دومره ډرن یمه چې حـد نه لري


پختون شاعر

07/09/2025

کاږه باڼه چـــــی ئي کاږه کاږه اسمان ته کـــــسی
داسی پېی مخی به سم سه رنګه انسان ته کسی

کسی زما که پسی ولويږي څه ګـــرم خـــو نه دی
تماشه بين په لوړه کسی چــی ميدان ته کــــسی

ما ننداره کــړه ده تا خـــپله ننداره جــوړه شوم
خلق خيران شی خامخا چی چا خيران ته کسی

زمـــــا ليمو ســتا تــــروی اوبـــه قبولــــــی زمــــا
د مخ وچوبی به می څو پوری اسمان ته کــــسی

چی په کجلو سترګی توری کړی بيا ګــــوره ورته
پـــه ترږمئ کښی سړے ستورو د اسمان ته کسی

څــومره په غلا څنګه بڼو لاندی مجذوب ونيسی
چـــی پټ په پټه کله سترګو د جــــانان ته کسی

06/09/2025

حسن مو په مخه دی امام د میني لمونځ کوو
خدای راضي کوو په احترام د میني لمونځ کوو

ښکلی خوب مي ولید احمدشاه بابا امام وي زموږ
یک یو مو جمات وي پښتون قام د میني لمونځ کوو

ځو په وینو رنګ روحونه وړو د خدای حضور لره
ځو لکه منصور د عرش په بام د ميني لمونځ کوو

میندو په اغاز کي د ژوند مینه راښودلې ده
دار که مو د ژوند سي هم انجام د ميني لمونځ کوو

ځو لکه عمر په جګ اواز اذان په ډاګه کړو
ځو به له وحشیانو په وام وام د ميني لمونځ کوو

سپين کړلو #شهیمه ډیر تور زړونه غزلونو زمونږ
وایو په ښائسته قرات کلام د ميني لمونځ کوو

پختون شاعر

04/09/2025

وخت د بېلتانه تېرو نوکارو ته ولاړې دي
سترګې مې د ستا د راتلو لارو ته ولاړې دي

څه ښکلي نجلۍ نصیب بدرنګو ته ورکړې دي
څه ښکلي ولګې دي څه بېکارو ته ولاړې دي

ګورم څو هندوې په خندا ګنګا کې ډوبې شوې
لامبي پښتنې د وینو دارو ته ولاړې دي

بېخ د ناچارۍ دې الله اوباسي مجبورې دي
څو سوالګرې پېغلې څه مردارو ته ولاړې دي

نه راوځي چغې ترې مرۍ مو بغې شوي دي
ساوې مو د چا سوو کوکارو ته ولاړې دي

څنګ په بخت باور وکړي او ولې هیله منې شي
هیلې مو د وخت تتو هندارو ته ولاړې دي


پختون شاعر

03/09/2025