Political News

04/05/2026

قومی وطن پارٹی کے صوبائی چیئرمین سکندر حیات خان شیرپاؤ نے صوبائی اسمبلی ممبران کی تنخواہوں اور مراعات میں بے جا اضافے کو عوام کے زخموں پر نمک پاشی قرار دیتے ہوئے کہا ہے کہ موجودہ صوبائی حکومت نے پہلے ہی معاشی بحران، امن و امان کی ابتری اور انتظامی ناکامیوں کے ذریعے عوام کو مایوسی کے اندھیروں میں دھکیل دیا ہے اور اب یہ ظالمانہ اضافہ عوام دشمن پالیسیوں کا کھلا ثبوت ہے۔ان خیالات کا اظہار انھوں نے وطن کور پشاور میں پارٹی کی صوبائی کابینہ کے اجلاس سے خطاب کرتے ہوئے کیا۔اجلاس پانچ نکاتی ایجنڈے پر مشتمل تھا جن میں پارٹی کے تنظیمی امور،آنے والے بلدیاتی انتخابات کیلئے تیاریاں،صوبے کی مجموعی مایوس کن سیاسی و معاشی صورتحال اورامن و امان جیسے نکات شامل تھیں۔اجلاس میں پارٹی کی صوبائی کابینہ کے تمام عہدیداران نے شرکت کرتے ہوئے ایجنڈے پر اپنے خیالات کا اظہار کیا اور پارٹی کی مضبوطی، عوامی رابطہ مہم کو بہتر بنانے اور آنے والے بلدیاتی انتخابات کیلئے بھرپور تیاریوں کے حوالے سے اپنے مفید تجاویز پیش کیں۔ اجلاس نے صوبے کی بگڑتی ہوئی امن وامان کی صورتحال، خلیجی ممالک میں کام کرنے والے پاکستانیوں کی مشکلات اور بلدیاتی انتخابات کے جلد از جلد منعقد کرانے کے حوالے سے متعدد قراردادیں بھی پیش کی۔ اجلاس میں اس بات پر اتفاق کیا گیا کہ موجودہ صوبائی حکومت عوامی مسائل کے حل میں مکمل طور پر ناکام ہو چکی ہے۔سکندر شیرپاؤ نے صوبے کی بگڑتی ہوئی سیاسی، معاشی اور سیکیورٹی صورتحال پر شدید تشویش کا اظہار کیا۔ انہوں نے کہا کہ صوبہ ایک غیر اعلانیہ بحران میں داخل ہو چکا ہے جبکہ حکمران طبقہ قوم کو طفل تسلیاں دینے اور ڈرامہ بازیاں کرنے سے آگے بڑھنے کو تیار نہیں۔انہوں نے حکومت پر کڑی تنقید کرتے ہوئے کہا کہ صوبے میں کرپشن اپنے عروج پر ہے، مہنگائی تاریخی حدیں عبور کر چکی ہے اور عوام دو وقت کی روٹی کے لیے ترس رہے ہیں دوسری جانب جرائم اور دہشت گردی کے واقعات میں مسلسل اضافہ ہو رہا ہے جس کے باعث شہری شدید خوف و ہراس کا شکار ہیں۔ انہوں نے کہا کہ امن و امان کی ناگفتہ بہ صورتحال حکومت کی بدترین ناکامی اور بے حسی کی عکاسی کرتا ہے۔ انہوں نے کہا کہ تحریک انصاف 13سال سے صوبے میں حکومت کر رہی ہے لیکن اس کی کارکردگی صفر ہے۔ انہوں نے کہا کہ تحریک انصا ف نے شروع دعووں سے کیاپھرعوام سے جھوٹے وعدے کیے اور اب ڈرامہ بازی کر رہی ہے۔ انہوں نے وفاقی حکومت کو بھی تنقید کا نشانہ بنایا اور کہا کہ تیل، بجلی اور گیس کی قیمتوں میں مسلسل اضافے نے گھریلو بجٹ تباہ کر دیے ہیں اورمہنگائی دوہرے ہندسے کو عبور کر چکی ہے جو کہ ایک سنگین معاشی بحران کی نشاندہی کرتا ہے۔ انہوں نے حکومت سے بلدیاتی انتخابات جلد از جلد منعقد کرنے کا بھی مطالبہ کیا اور کہا کہ انتخابات کے ساتھ ساتھ منتخب عوامی نمائندوں کو اختیارات بھی دیے جائے۔انہوں نے کہا کہ حکمران عوام کے حقیقی مسائل کی طرف توجہ دے،ممبران اسمبلی کی تنخواہوں میں غیر ضروری اضافے کو فی الفور واپس لے اور کرپشن، مہنگائی اور بدامنی کے خاتمے کے لیے عملی اقدامات اٹھائے۔ انہوں نے کہا کہ قومی وطن پارٹی عوام کے حقوق کیلئے ہر فورم پر آواز بلند کرتی رہے گی اور اس جدوجہد میں کسی دباؤ کو خاطر میں نہیں لایا جائے گا۔

03/05/2026

قومی وطن پارٹی کے صوبائی چیئرمین سکندر حیات خان شیرپاؤ نے ملک میں مہنگائی کی شرح ڈبل فگر میں پہنچنے پر شدید تشویش کا اظہار کرتے ہوئے کہا ہے کہ حکمران اپنی شاہ خرچیوں میں کمی کرنے کے بجائے ہر معاشی بوجھ غریب عوام پر منتقل کر رہے ہیں۔ انہوں نے حکومت کی جانب سے اخراجات میں محض دس کروڑ روپے کی کمی کو مضحکہ خیز قرار دیتے ہوئے اس ضمن میں نتیجہ خیز اقدامات اٹھانے کا مطالبہ کیا اور کہا کہ غریب عوام پر مزید بوجھ ڈالنے سے گریز کیا جائے۔ان خیالات کا اظہار انھوں نے گاؤں شیرپاؤ میں ایک شمولیتی پریس کانفرنس سے خطاب کرتے ہوئے کیا۔اس موقع پر تحصیل تنگی کی اہم سیاسی شخصیات صدر تسلیم خان،عمر ایڈوکیٹ اور عابد خان تنگی نصرت زئی نے اپنے خاندانوں اور ساتھیوں سمیت قومی وطن پارٹی میں شمولیت کا اعلان کیا۔سکندر شیرپاؤ نے پٹرولیم مصنوعات کی قیمتوں میں مسلسل اضافے اور عوام پر لادے گئے بلا جواز ٹیکسوں کوغریب دشمنی کی بدترین مثال قرار دیا۔ انہوں نے کہا کہ ڈیزل پر فی لیٹر 28 روپے اور پٹرول پر 103 روپے لیوی وصول کرنا نہ صرف معاشی بدانتظامی ہے بلکہ عوامی استحصال کی کھلی علامت ہے۔ انہوں نے کہا کہ یہ تمام بوجھ مہنگائی کی شکل میں براہ راست غریب عوام پر پڑ رہے ہیں۔انہوں نے کہا کہ دوسری جانب امریکہ اور ایران کے مابین کشیدگی کے باعث پاکستان کو 10 سے 14 ارب ڈالر کا نقصان ہوچکا ہے جس کے نتیجے میں ترسیلات زر اور برآمدات میں واضح کمی اور پٹرولیم مصنوعات کی قیمتوں میں ہوشربا اضافہ ہوا ہے۔ انہوں نے کہا کہ اس تمام صورتحال نے پہلے ہی کمزور معیشت کو شدید دھچکا پہنچایا ہے اور عوام مہنگائی کے بوجھ تلے دب کر بے حال ہو چکے ہیں۔ انہوں نے صوبائی حکومت کی جانب سے اسپیکر، ڈپٹی اسپیکر اور اراکین صوبائی اسمبلی کی تنخواہوں و مراعات میں اضافہ منظور کرنے کے فعل کو شرمناک اورغریب دشمن فیصلہ قرار دیا۔ انہوں نے کہا کہ ایک طرف حکمران اخراجات میں کمی کی رٹ لگائے ہوئے ہیں تو دوسری طرف اپنے ہی مراعات میں اضافہ کرکے عوام کے زخموں پر نمک چھڑکا جارہاہے۔سکندر شیرپاؤ نے کہا کہ پی ٹی آئی کے 13 سالہ دورِ اقتدار نے ثابت کردیا ہے کہ ان کے بلند و بانگ دعوے اور نعرے محض دھوکے پر مبنی تھے اور اب یہ سلسلہ سیاسی ڈرامہ بازی تک جا پہنچا ہے جبکہ عوام شدید معاشی بحران کا شکار ہیں۔ عالمی یومِ آزادی صحافت کے عالمی دن کے حوالے بات کرتے ہوئے انھوں نے کہا کہ ہم اس موقع پر عزم کرتے ہیں کہ آزادی صحافت کے فروغ اور میڈیا کے بنیادی حقوق کے تحفظ کیلئے ہر ممکن کوشش کی جائے گی کیونکہ ایک مضبوط، شفاف اور ذمہ دار میڈیا ہی وہ ستون ہے جو ریاست اور عوام کے درمیان اعتماد اور جوابدہی کو مضبوط کرتا ہے۔انھوں نے کہا کہ آزادی اظہاررائے اور معلومات تک رسائی کو یقینی بنانا ہر شہری کا آئینی اور جمہوری حق ہے جسے کسی بھی قیمت پر محدود نہیں کیا جانا چاہیے۔

01/05/2026

یومِ مزدور: محنت کش طبقے کے حقوق کا تقاضا

آج یکم مئی، مزدوروں کا عالمی دن، ہمیں اس حقیقت کی یاد دہانی کراتا ہے کہ کسی بھی معاشرے کی ترقی اور خوشحالی کا دارومدار محنت کش طبقے کی انتھک جدوجہد پر ہوتا ہے۔ یہ دن ان افراد کے ساتھ یکجہتی کے اظہار کا دن ہے جو برسوں سے نجی اداروں میں اپنی خدمات انجام دے رہے ہیں، مگر شدید مہنگائی کے اس دور میں بھی ان کی تنخواہوں میں خاطر خواہ اضافہ نہیں کیا گیا۔

وقت کا تقاضا ہے کہ نجی شعبے کے مالکان صرف بیانات اور سوشل میڈیا تک محدود نہ رہیں، بلکہ عملی اقدامات کرتے ہوئے اپنے ملازمین کی فلاح و بہبود کو یقینی بنائیں۔ بڑھتی ہوئی مہنگائی، اشیائے خورد و نوش کی قیمتوں میں اضافہ، تعلیمی اخراجات، بجلی و گیس کے بلوں میں بے پناہ اضافہ—یہ سب عوامل محنت کش طبقے کی زندگی کو مزید دشوار بنا رہے ہیں۔لہٰذا ضروری ہے کہ ہر سال بجٹ کے بعد نجی ادارے اپنے ملازمین کی تنخواہوں میں کم از کم 15 سے 20 فیصد اضافہ کریں، تاکہ وہ اپنے خاندان کی بنیادی ضروریات باعزت طریقے سے پوری کر سکیں۔محنت کشوں کے حقوق کا تحفظ صرف اخلاقی ذمہ داری ہی نہیں بلکہ ایک مستحکم اور خوشحال معاشرے کی بنیاد بھی ہے۔تنخواہوں میں اضافہ وقت کی اہم ضرورت ہے۔

01/05/2026

یومِ مزدور: محنت، عظمت اور قومی ترقی کی علامت**
آفتاب احمد خان شیر پاؤ کاتمام محنت کشوں کو سلامِ عقیدت پیش کیا اور ان
کے روشن، محفوظ اور باوقار مستقبل کے لیے نیک تمناؤں کا اظہار۔
٭یومِ مزدور کے موقع پر ہم پاکستان کے تمام محنت کشوں کو دل
کی گہرائیوں سے خراجِ عقیدت پیش کرتے ہیں۔
٭محنت کش کسی بھی معاشرے کی ترقی میں ریڑھ کی ہڈی کی حیثیت رکھتے ہے۔
٭ محنت کش طبقہ کسی بھی قوم کی معاشی و سماجی ترقی میں کلیدی کردار ادا کرتا ہے۔
٭ پاکستان کی ترقی کی داستان مزدوروں کے پسینے، عزم اور ہمت سے لکھی گئی ہے۔
٭کھیتوں سے لے کر کارخانوں تک، تعمیراتی منصوبوں سے لے کر خدمات کے شعبے تک،
ہر جگہ محنت کش اپنی ذمہ داریاں دیانت اور جذبے کے ساتھ نبھا رہے ہیں۔
٭مزدوروں کو ان کے جائز حقوق دلانے، مناسب اجرت، محفوظ اور باوقار ماحولِ کار
اور سماجی تحفظ کی فراہمی کو یقینی بنانے کے لیے ہر ممکن اقدامات کیے جائیں۔
٭ ایک مضبوط، خوشحال اور پائیدار پاکستان کا خواب اسی وقت شرمندہ تعبیر ہو سکتا ہے
جب ہمارے محنت کش بااختیار اور محفوظ ہوں۔
٭ ترقی کا سفر تبھی مکمل ہوتا ہے جب اس کے ثمرات معاشرے کے ہر فرد تک مساوی طور پر پہنچیں۔
٭ اجتماعی طور پر مزدور دوست پالیسیوں کو فروغ دیا جائیں اور ان پر مؤثر عملدرآمد کو یقینی بنائیں۔

19/04/2026

پاکستان کا جنگ بندی کے حوالے سے مثبت رویہ قابلِ ستائش ہے
پاکستان کا جنگ بندی کے حوالے سے مثبت رویہ قابلِ ستائش ہے، اور جو بھی فریق جنگ کے خاتمے اور امن کے قیام کے لیے مخلصانہ کوششیں کرتا ہے، وہ عالمی برادری کی تحسین کا مستحق ہوتا ہے۔

ہم اس بات پر زور دیتے ہیں کہ خطے میں پائیدار امن کے قیام کے لیے تمام متعلقہ فریقین کو سنجیدگی، برداشت اور باہمی احترام کا مظاہرہ کرنا ہوگا۔ پاکستان نے ہمیشہ امن، استحکام اور مذاکرات کے ذریعے مسائل کے حل کو ترجیح دی ہے، جو کہ ایک ذمہ دار ریاست ہونے کا ثبوت ہے۔

جنگ بندی کی کوششیں نہ صرف انسانی جانوں کے تحفظ کے لیے ضروری ہیں بلکہ یہ خطے کی ترقی، خوشحالی اور استحکام کے لیے بھی ناگزیر ہیں۔ ہم عالمی برادری سے اپیل کرتے ہیں کہ وہ امن کے قیام کے لیے جاری اقدامات کی حمایت کرے اور تمام فریقین کو مذاکرات کی میز پر لانے میں اپنا کردار ادا کرے۔

16/04/2026

نوٹیفیکیشن

قومی وطن پارٹی کے صوبائی چیئرمین سکندر حیات خان شیرپاؤ نے ضلع چارسدہ کی سطح پرمندرجہ ذیل 13رکنی ڈسٹرکٹ رابطہ کمیٹی کا نوٹیفیکیشن جاری کردیا۔نوٹیفیکیشن کے مطابق جاوید حسین خان کنوینئر اور حامد خان ترنگزئی سیکرٹری نامزد کردیئے گئے جبکہ کمیٹی ممبران میں یحییٰ جان مہمند،مشتاق ترنگزئی،عالم خان ملک،حاجی غنی الرحمان،شمشاد خان یاغی بند،وحدت خان تنگی،انور علی خان،حاجی ہدایت اللہ حاجی زئی،جھانزیب خان شیرپاؤ،اجمل خان کڈئی اورفضل دیان شامل ہیں۔
رابطہ کمیٹی ممبران کو ہدایت کی گئی کہ وہ اپنی ذمہ داریاں سنبھال کر پارٹی کاز کیلئے اپنی توانائیاں بروئے کار لاکر کلیدی کردار ادا کرے۔

(سکندر حیات خان شیرپاؤ)
صوبائی چیئرمین قومی وطن پارٹی خیبر پختونخوا

12/03/2026

11/03/2026

بنوں، لکی مروت، ڈیرہ اسماعیل خان اور وزیرستان کے علاقوں میں ایک خطرناک اور افسوسناک رجحان جنم لے چکا ہے۔
بنوں، لکی مروت، ڈیرہ اسماعیل خان اور وزیرستان کے علاقوں میں ایک خطرناک اور افسوسناک رجحان جنم لے چکا ہے۔ ایک ویڈیو جو ایک مارے گئے دہشت گرد کے موبائل سے ملی، اس میں دکھایا گیا ہے کہ معصوم بچوں کو خرید کر پہلے ان کا استحصال کیا جاتا ہے اور پھر جب وہ بچے معاشرتی طعنوں اور نفسیاتی دباؤ کا شکار ہو جاتے ہیں تو انہیں جھوٹی جنت کے خواب دکھا کر خودکش حملوں کے لئے استعمال کیا جاتا ہے۔
یہ ایک خوفناک چکر ہے جو خاموشی سے چل رہا ہے۔
سب سے زیادہ افسوس کی بات یہ ہے کہ اس ظلم پر نہ قوم پرست آوازیں بلند ہو رہی ہیں، نہ حکومت کی طرف سے کوئی واضح مؤقف سامنے آ رہا ہے اور نہ ہی مذہبی و سیاسی قیادت اس مسئلے پر کھل کر بات کر رہی ہے۔

معصوم بچوں کے ساتھ ہونے والے اس ظلم پر خاموشی بھی ایک جرم ہے۔ اگر معاشرہ اور قیادت اسی طرح خاموش رہی تو یہ ناسور مزید پھیلتا جائے گا۔
اللہ ہمیں سچ بولنے اور ظلم کے خلاف کھڑے ہونے کی توفیق دے۔