10/09/2026
جناب شاہ جہاں خان آفریدی کی باوقار الوداعی ریٹائرمنٹ تقریب
جمرود: گورنمنٹ ہائی سکول نمبر 2 جمرود میں ادارے کے سینئر اور مخلص استاد جناب شاہ جہاں خان آفریدی کی باوقار الوداعی ریٹائرمنٹ تقریب کا انعقاد کیا گیا، جس میں سکول کے موجودہ پرنسپل جناب اقتدار علی، سابق پرنسپل جناب گوہر خان، سابق و موجودہ اساتذہ کرام، طلبہ، سابق طلبہ، والدین اور سکول سٹاف نے بھرپور شرکت کی۔
تقریب کے دوران پرنسپل، اساتذہ کرام، سابق اساتذہ اور طلبہ نے جناب شاہ جہاں خان آفریدی کی 35 سالہ شاندار تعلیمی خدمات کو خراجِ تحسین پیش کیا۔ مقررین نے ان کی محنت، خلوص، فرض شناسی اور طلبہ کی تعلیم و تربیت کے لیے انجام دی جانے والی گراں قدر خدمات کو سراہا۔
اس موقع پر مختلف جماعتوں کے طلبہ نے اپنے محترم استاد سے محبت اور عقیدت کا اظہار کرتے ہوئے انہیں تحائف پیش کیے، جبکہ سابق طلبہ اور سابق اساتذہ کرام کی جانب سے بھی یادگاری تحائف پیش کیے گئے۔ تقریب کا ماحول استاد اور شاگرد کے خوبصورت رشتے سے وابستہ محبت، احترام اور جذبات سے بھرپور رہا۔
مقررین نے کہا کہ جناب شاہ جہاں خان آفریدی کی ریٹائرمنٹ اگرچہ ان کی عملی تدریسی زندگی کا اختتام ہے، تاہم گزشتہ 35 برس کے دوران تعلیم و تربیت کے میدان میں ان کی خدمات اور ہزاروں طلبہ کی زندگیوں پر مرتب ہونے والے مثبت اثرات ہمیشہ یاد رکھے جائیں گے۔
آخر میں گورنمنٹ ہائی سکول نمبر 2 جمرود کی پوری تعلیمی برادری کی جانب سے جناب شاہ جہاں خان آفریدی کو شاندار تعلیمی خدمات پر خراجِ تحسین پیش کرتے ہوئے ریٹائرمنٹ پر دلی مبارکباد دی گئی اور ان کے لیے صحت، خوشی، سکون اور بابرکت زندگی کی دعا کی گئی۔
