07/06/2026
بی آر ٹی ملازمین کی تنخواہوں میں تاخیر، عید سے قبل اور بعد بھی ادائیگیاں نہ ہونے پر تشویش
پشاور: بی آر ٹی ملازمین نے تنخواہوں کی مسلسل تاخیر پر شدید تشویش کا اظہار کرتے ہوئے کہا ہے کہ ہر ماہ تنخواہیں مقررہ تاریخ پر ادا کرنے کے بجائے 10 سے 15 دن کی تاخیر سے جاری کی جاتی ہیں، جس کے باعث ملازمین اور ان کے اہل خانہ کو مالی مشکلات کا سامنا کرنا پڑتا ہے۔
ملازمین کے مطابق اس مرتبہ عیدالاضحیٰ سے قبل بھی تنخواہیں ادا نہیں کی گئیں، جس سے انہیں عید کی تیاریوں اور گھریلو اخراجات پورے کرنے میں مشکلات پیش آئیں۔ ان کا کہنا ہے کہ عید گزرنے کے باوجود تاحال تنخواہوں کی ادائیگی نہیں کی گئی، جس سے ملازمین میں بے چینی اور اضطراب پایا جاتا ہے۔
بی آر ٹی ملازمین نے متعلقہ محکمہ، انتظامیہ اور حکام بالا سے مطالبہ کیا ہے کہ اس معاملے کا فوری نوٹس لیا جائے اور تنخواہوں کی بروقت ادائیگی کو یقینی بنایا جائے۔ انہوں نے وزیراعلیٰ خیبر پختونخوا محمد سہیل آفریدی اور صوبائی وزیر ٹرانسپورٹ فخر جہاں سے اپیل کی ہے کہ تنخواہوں میں مسلسل تاخیر کے معاملے کی شفاف تحقیقات کرائی جائیں، وجوہات سامنے لائی جائیں اور ذمہ داروں کے خلاف مؤثر کارروائی عمل میں لائی جائے۔
ملازمین کا کہنا ہے کہ وہ روزانہ ہزاروں شہریوں کو سفری سہولیات فراہم کرنے کے لیے اپنی ذمہ داریاں انجام دے رہے ہیں، لہٰذا ان کے معاشی حقوق کا تحفظ اور تنخواہوں کی بروقت ادائیگی حکومت اور متعلقہ اداروں کی بنیادی ذمہ داری ہے۔
