10/05/2026
*خضدار : جھالاوان سمر فیسٹیول، ثقافت و روایات کا شاندار مظہر*
*اپوزیشن لیڈر میر یونس عزیز زہری سمیت اعلیٰ حکام کا دورہ، کتابوں کے اسٹالز خصوصی توجہ کا مرکز بن گئے*
> خضدار: اپوزیشن لیڈر بلوچستان اسمبلی و ایم پی اے خضدار میر یونس عزیز زہری نے جھالاوان سمر فیسٹیول کا تفصیلی دورہ کیا جہاں انہوں نے مختلف ثقافتی، تعلیمی اور روایتی اسٹالز کا معائنہ کیا۔ اس موقع پر ضلع خضدار کے اعلیٰ سرکاری افسران، سیاسی و سماجی شخصیات اور مقامی عمائدین بھی ان کے ہمراہ موجود تھے۔فیسٹیول کے دوران میر یونس عزیز زہری نے خصوصی طور پر کتابوں کے اسٹالز میں گہری دلچسپی کا اظہار کیا۔ انہوں نے مختلف موضوعات پر مشتمل متعدد کتابیں خریدیں اور اپنے ہمراہ موجود افسران و معزز شخصیات کو بطور تحفہ پیش کیں۔ ان کے اس اقدام کو علمی و ادبی سرگرمیوں کے فروغ کی جانب مثبت قدم قرار دیا گیا۔
*اس موقع پر ان کے ہمراہ ڈپٹی کمشنر خضدار عبدالرزاق ساسولی، کمانڈنٹ قلات اسکاؤٹس کرنل عرفان، ایس ایس پی خضدار دوستین دشتی ،چیف آفیسر خضدار وڈیرہ صالح جاموٹ، اسسٹنٹ کمشنر خضدار عبدالحفیظ کاکڑ، ڈسٹرکٹ ایجوکیشن آفیسر عابد حسین بلوچ ،ایگزیکٹو ڈائریکٹر پی ایچ ای انجینئر عبدالرؤف قمبرانی، اے ڈی سی خضدار علم دین، ڈسٹرکٹ ایجوکیشن آفیسر تنویر کرد ،ڈائریکٹر لائیو اسٹاک ڈاکٹر انور زہری،، ظاہر کریم، چیئرمین آل پارٹیز شہری ایکشن کمیٹی ایڈووکیٹ بشیر احمد جتک اور سفر خان مینگل میر اشرف علی مینگل سمیت دیگر معززین بھی شریک تھے۔فیسٹیول کے موقع پر گفتگو کرتے ہوئے میر یونس عزیز زہری نے کہا کہ جھالاوان سمر فیسٹیول جیسے پروگرامز ہماری قدیم ثقافت، روایات اور تاریخی ورثے کو اجاگر کرنے کا بہترین ذریعہ ہیں۔ انہوں نے کہا کہ خضدار اور جھالاوان کا خطہ قدرتی حسن، تاریخی اہمیت اور منفرد ثقافتی اقدار سے مالا مال ہے، جنہیں نئی نسل تک منتقل کرنا وقت کی اہم ضرورت ہے۔ ان کا کہنا تھا کہ ایسے مثبت اور تفریحی پروگرامز نوجوانوں کو صحت مند سرگرمیوں کی جانب راغب کرتے ہیں اور علاقے کا نرم اور روشن تشخص دنیا کے سامنے پیش کرتے ہیں۔*
*کمانڈنٹ قلات اسکاؤٹس کرنل عرفان نے اس موقع پر کہا کہ فیسٹیول میں عوام کی بڑی تعداد کی بلا خوف و خطر شرکت علاقے میں امن و امان کی بہتر صورتحال کی عکاسی کرتی ہے۔ انہوں نے کہا کہ قلات اسکاؤٹس ہمیشہ مثبت سماجی اور ثقافتی سرگرمیوں کی حمایت کرتی رہی ہے اور آئندہ بھی اس نوعیت کے پروگرامز میں مکمل تعاون جاری رکھا جائے گا۔ڈپٹی کمشنر خضدار عبدالرزاق ساسولی نے کہا کہ ضلعی انتظامیہ نے جھالاوان سمر فیسٹیول کو کامیاب بنانے کیلئے تمام دستیاب وسائل بروئے کار لائے۔ ان کا کہنا تھا کہ یہ فیسٹیول نہ صرف ثقافتی سرگرمیوں کے فروغ کا سبب بن رہا ہے بلکہ اس سے مقامی معیشت، دستکاری اور چھوٹے کاروباروں کو بھی تقویت مل رہی ہے۔ انہوں نے کہا کہ ہزاروں افراد کی شرکت اس امر کا ثبوت ہے کہ عوام ایسے مثبت پروگرامز کو پسند کرتے ہیں اور ضلعی انتظامیہ مستقبل میں اس فیسٹیول کو مزید وسعت دینے کا ارادہ رکھتی ہے۔*
*چیف آفیسر خضدار وڈیرہ صالح جاموٹ نے کہا کہ مقامی سطح پر منعقد ہونے والے ایسے فیسٹیول نوجوان نسل کیلئے مثبت اور تعمیری سرگرمیوں کا بہترین ذریعہ ہیں۔ انہوں نے کہا کہ کتابوں کے اسٹالز دیکھ کر خصوصی خوشی محسوس ہوئی کیونکہ تعلیم اور مطالعہ کسی بھی معاشرے کی ترقی کی بنیاد ہوتے ہیں۔*
> ڈسٹرکٹ ایجوکیشن آفیسر عابد حسین بلوچ نے گفتگو کرتے ہوئے کہا کہ کتابوں کی خریداری اور انہیں بطور تحفہ پیش کرنے کا عمل نوجوانوں میں مطالعے کے رجحان کو فروغ دینے میں اہم کردار ادا کرے گا۔ انہوں نے کہا کہ علمی سرگرمیوں کے فروغ سے ہی معاشرہ ترقی کی راہ پر گامزن ہوسکتا ہے۔
جبکہ جھالاوان سمر فیسٹیول کے دوران بہترین سکیورٹی انتظامات پر ایس ایس پی خضدار دوستین دشتی، ایس ایچ او سٹی منیر عالم جتک، ڈی ایس پی محمد عالم لہڑی، ایڈیشنل ایس ایچ او عبدالحق نوتانی اور دیگر پولیس ٹیم کی خدمات کو بھی سراہا گیا، جنہوں نے فیسٹیول کے دوران امن و امان برقرار رکھنے اور شہریوں کو محفوظ ماحول فراہم کرنے میں اہم کردار ادا کیا
*جھالاوان سمر فیسٹیول میں ہزاروں مرد و خواتین نے بھرپور شرکت کی۔ فیسٹیول میں روایتی بلوچی موسیقی، علاقائی رقص، کھیلوں کے مقابلے، ثقافتی پروگرامز اور دستکاری کے خوبصورت نمونے عوام کی توجہ کا مرکز بنے رہے۔ رنگا رنگ ثقافتی سرگرمیوں نے پورے ماحول کو دلکش بنا دیا جبکہ شہریوں نے اس نوعیت کے پروگرامز کے انعقاد کو خوش آئند قرار دیتے ہوئے اسے خضدار ڈویژن میں سیاحت، ثقافت اور مقامی معاشی سرگرمیوں کے فروغ کیلئے ایک اہم سنگ میل قرار دیا*
