14/01/2026
محترمہ شاہینہ کاکڑ یہ بات بڑے فخر اور اطمینان کے ساتھ کہی جا سکتی ہے کہ ہمارے علاقے کے ضلع مسلم باغ بننے کا خواب بالآخر حقیقت بننے جا رہا ہے، اور اس عظیم کامیابی کے پیچھے محترمہ شاہینہ کاکڑ کی انتھک محنت، مسلسل جدوجہد اور بے مثال قیادت شامل ہے۔ محترمہ شاہینہ کاکڑ نے برسوں تک اس علاقے کے عوام کے مسائل کو اعلیٰ ایوانوں تک پہنچایا، ہر فورم پر ضلع کے قیام کی ضرورت کو مدلل انداز میں اجاگر کیا اور تمام رکاوٹوں کے باوجود اپنے موقف پر ثابت قدم رہیں۔ یہ کوئی ایک دن یا ایک ملاقات کا نتیجہ نہیں بلکہ ایک طویل، صبر آزما اور مخلصانہ جدوجہد کا ثمر ہے۔
ان کی کوششوں کے باعث آج یہ علاقہ تعلیمی، طبی، انتظامی اور معاشی ترقی کی راہ پر گامزن ہونے جا رہا ہے۔ ضلع بننے سے علاقے میں تعلیمی اداروں کا قیام، صحت کی بہتر سہولیات، روزگار کے نئے مواقع، ترقیاتی بجٹ میں اضافہ اور عوامی مسائل کے فوری حل کی راہ ہموار ہوگی، جبکہ عوام کو وہ سہولیات بھی میسر آئیں گی جن کے لیے پہلے دور دراز علاقوں کا سفر کرنا پڑتا تھا۔ عوام اس تاریخی کامیابی پر محترمہ شاہینہ کاکڑ کو دل کی گہرائیوں سے خراجِ تحسین پیش کرتے ہیں اور امید رکھتے ہیں کہ ان کی قیادت میں یہ علاقہ ترقی، خوشحالی اور روشن مستقبل کی نئی منزلیں طے کرے گا
یہ حقیقت اب سب کے سامنے ہے کہ گزشتہ چالیس برسوں میں بہت سے لوگ اقتدار اور نمائندگی میں رہے، مگر وہ اپنے علاقے کیلئے وہ عملی خدمت انجام نہ دے سکے جس کی عوام کو امید تھی۔ وعدے بہت کیے گئے، مگر زمینی حقائق نہ بدل سکے اور علاقے کی حالت جوں کی توں رہی۔
اس کے برعکس محترمہ شاہینہ کاکڑ نے صرف پانچ سال کے مختصر عرصے میں اپنی مخلصانہ قیادت، عملی جدوجہد اور عوامی سوچ کے ذریعے وہ تاریخی کام کر دکھایا جو دہائیوں میں بھی ممکن نہ ہو سکا۔ ضلع کے قیام جیسے بڑے اور دیرپا فیصلے کو عملی شکل دینا اس بات کا واضح ثبوت ہے کہ جب نیت صاف اور قیادت مضبوط ہو تو کم وقت میں بھی بڑی تبدیلی لائی جا سکتی ہے۔
آج عوام اس حقیقت کو تسلیم کرتے ہیں کہ محترمہ شاہینہ کاکڑ کی قیادت نے علاقے کو ترقی، شناخت اور مستقبل کی سمت دی۔ یہ کامیابی صرف ایک فرد کی نہیں بلکہ پورے علاقے کی ہے، جو آنے والی نسلوں کیلئے روشن راستہ ثابت ہوگی۔
