07/06/2026
کوئٹہ 7/6/2026
بلوچستان نیشنل پارٹی کے وفد کی ہزارہ ڈیموکریٹک پارٹی سے ملاقات۔
بی این پی کے مرکزی ڈپٹی سیکریٹری جنرل ملک نصیر احمد شاہوانی کی سربراہی میں پارٹی وفد نے ہزارہ ڈیموکریٹک پارٹی کے مرکزی دفتر میں نائب چیئرمین مرزا حسین ہزارہ اور دیگر سے ملاقات کی۔
اس موقع پر بی این پی کے سی ای سی ممبر واجہ ثنا بلوچ اور نسیم جاوید ہزارہ بھی موجود تھے، ہزارہ ڈیموکریٹک پارٹی کے وائس چیئرمین مرزا حسین ہزارہ، فائنانس سیکریٹری مجتبی زاہد ایڈوکیٹ، ممبران سنٹرل کونسل عبدالعلی ہزارہ، زمان دہقانزادہ، یونس چنگیزی اور دیگر بھی شریک تھے، ملاقات میں سیاسی صورتحال پر تفصیلی گفتگو کی گئی اور خصوصی طور پر خضدار میں پارٹی کے ممبر سنٹرل ایگزیکٹیو کمیٹی اور سابق ناظم خضدار سردار نصیر احمد موسیانی کے گھر پر فورسز کی ماورائے عدالت کاروائی اور ان کے خاندان کے افراد کو گرفتار کرنے اور نوجوان بیٹے کو شہید کرنے کے افسوسناک واقعہ کے پس منظر پر روشنی ڈالی گئی جس کے خلاف بی این پی کی جانب سے 10 جون کو بلوچستان بھر میں شٹر ڈاون ہڑتال کا اعلان کیا گیا ہے، وفد نے ایچ ڈی پی کی حمایت حاصل کرنے پر بھی بات کی، ایچ ڈی پی کے رہنماؤں نے ہڑتال کی حمایت کی۔ ملاقات میں تمام بلوچستانی اقوام کو ایک جسم کے مختلف اعضا قرار دیتے ہوئے کہا گیا کہ اگر جسم کے ایک عضو کو تکلیف پہنچتا ہے تو پورا جسم متاثر ہوتا ہے اس لئے تمام جمہوری پارٹیوں کو چاہیے کہ وہ اس نازک وقت میں یکجا ہو کر جمہوری اور آئینی جدوجہد کے زریعے بلوچستانی عوام کے حقوق کے تحفظ کو یقینی بنائے اور بلوچستان کے مسئلے کو سیاسی سطح پر حل کرنے کوشش کی جائے۔
