30/05/2026
سوات: ڈبلیو ایس ایس سی سوات نے عیدالاضحیٰ کے موقع پر تین روزہ خصوصی صفائی آپریشن کے دوران 1900 ٹن سے زائد قربانی کے جانوروں کی آلائشیں اٹھا کر محفوظ طریقے سے ٹھکانے لگا دیں۔ شہر کو صاف ستھرا رکھنے کے لیے 600 سے زائد اہلکاروں نے بلا تعطل تین روز تک دن رات کام کیا۔
سوات : تفصیلات کے مطابق ڈبلیو ایس ایس سی سوات کے ترجمان شائستہ حکیم کے مطابق صوبائی حکومت کی ہدایات کی روشنی میں مینگورہ شہر میں چیف ایگزیکٹو آفیسر کی زیر نگرانی خصوصی صفائی پلان پر مؤثر عملدرآمد کیا گیا۔ اس دوران 600 سے زائد اہلکاروں اور 100 سے زائد چھوٹی بڑی گاڑیوں کی مدد سے مینگورہ شہر اور ملحقہ ویلیج کونسلز سے آلائشیں اور باقیات بروقت اٹھائی گئیں۔
چیف ایگزیکٹو آفیسر تنویر الرحمان کی مجموعی نگرانی میں صفائی آپریشن کامیابی سے مکمل کیا گیا، جبکہ مینجمنٹ اور سینیٹیشن سٹاف نے دن رات محنت کر کے شہر کی صفائی کو یقینی بنایا۔ وزیر اعلیٰ خیبر پختونخوا کی ہدایات کے تحت اہلکاروں نے شہریوں کے لیے اپنی عید قربان کرتے ہوئے بھرپور خدمات انجام دیں۔
عید سے قبل ڈبلیو ایس ایس سی سوات کی سوشل موبلائزیشن ٹیم نے بازاروں، مساجد اور سوشل میڈیا کے ذریعے عوامی آگاہی مہم چلائی۔ شہر بھر میں 1000 سے زائد کلیکشن پوائنٹس قائم کیے گئے اور آگاہی بینرز بھی آویزاں کیے گئے۔ شہریوں میں بائیو ڈیگریڈیبل تھیلے بھی تقسیم کیے گئے تاکہ آلائشوں کو محفوظ طریقے سے ٹھکانے لگایا جا سکے۔
آپریشن کے دوران گلی محلوں سے چھوٹی گاڑیوں کے ذریعے آلائشیں اٹھا کر عارضی ٹرانسفر سٹیشنز اور کلیکشن پوائنٹس تک منتقل کی گئیں، جہاں سے بڑی گاڑیوں کے ذریعے انہیں ڈمپنگ سائٹس تک پہنچا کر ماحول دوست طریقے سے تلف کیا گیا۔ مختلف مقامات پر گڑھے کھود کر بھی آلائشوں کو محفوظ انداز میں ٹھکانے لگایا گیا۔
مینگورہ شہر اورملحقہ ویلیج کونلسز میں کلیکشن پوائنٹس اور ڈمپنگ سائٹس جانے والے راستوں کو سرف اور کلورین سے دھویا گیا، جبکہ کمپلینٹ سیل عید کے تینوں دن مسلسل فعال رہا۔ عوام کے تعاون کے باعث اس سال صفائی اور پانی سے متعلق شکایات میں نمایاں کمی دیکھنے میں آئی۔
ڈبلیو ایس ایس سی سوات کی اس بہترین کارکردگی پر ضلعی انتظامیہ، عوامی نمائندوں، معززین علاقہ، سماجی و سیاسی شخصیات نے ادارے اور سینیٹیشن سٹاف کی خدمات کو سراہتے ہوئے خراج تحسین پیش کیا۔
