09/08/2025
ڈیلیٹ کرنے کے بعد ڈیٹا کہاں جاتا ہے؟
یہ سوال اکثر ذہن میں آتا ہے کہ اگر ہم کمپیوٹر یا موبائل سے کوئی فائل ڈیلیٹ کر دیں تو وہ کہاں چلی جاتی ہے؟
کیا وہ کہیں چھپ جاتی ہے؟ یا ہمیشہ کے لیے غائب ہو جاتی ہے؟
__________
1°•° فزکس کا ایک چھوٹا سا چکر
سائنس میں ایک مشہور اصول ہے قانون بقائے توانائی (Conservation of Energy)، جس کے مطابق توانائی نہ پیدا کی جا سکتی ہے اور نہ ختم کی جا سکتی ہے، بس ایک شکل سے دوسری شکل میں بدلتی ہے۔
اسی طرح ایک اور اصول ہے قانون بقائے مومنٹم (Conservation of Momentum)۔
کچھ لوگ جب یہ سوال پوچھتے ہیں کہ "ڈیٹا کہاں گیا؟" تو شاید وہ انجانے میں یہ سمجھتے ہیں کہ قانون بقائے ڈیٹا بھی ایسا ہی کوئی اصول ہے — یعنی ڈیٹا کو ختم نہیں کیا جا سکتا، وہ کسی نہ کسی شکل میں باقی رہتا ہے۔
لیکن حقیقت یہ ہے کہ سائنس میں ایسا کوئی اصول موجود نہیں ہے۔ ڈیٹا ختم ہو سکتا ہے، اور ضروری نہیں کہ وہ کسی اور صورت میں محفوظ رہے۔
__________
2°•° اصل میں کمپیوٹر کرتا کیا ہے؟
جب آپ موبائل یا کمپیوٹر میں کسی فائل کو ڈیلیٹ کرتے ہیں، تو وہ فائل فوراً غائب نہیں ہوتی۔
وجہ یہ ہے کہ اگر ہر بار فائل کو مکمل طور پر مٹایا جائے تو اس میں وقت زیادہ لگے گا اور سسٹم کی رفتار کم ہو جائے گی۔
اس لیے زیادہ تر آپریٹنگ سسٹمز صرف فائل کا پتہ (Pointer) ڈیلیٹ کرتے ہیں، یعنی ڈسک کی فہرست سے اس کا نام اور لوکیشن ہٹا دیتے ہیں۔
فائل کا اصل ڈیٹا وہیں پڑا رہتا ہے جب تک اس جگہ پر نیا ڈیٹا اوور رائٹ (Overwrite) نہ ہو جائے۔
اسی لیے مختلف ڈیٹا ریکوری سوفٹ ویئر ایسے "ڈیلیٹ شدہ" ڈیٹا کو دوبارہ واپس لا سکتے ہیں، کیونکہ وہ پوائنٹر کو دوبارہ بنا لیتے ہیں۔
__________
3°•° مکمل ڈیٹا ختم کیسے ہوتا ہے؟
اگر آپ واقعی چاہتے ہیں کہ ڈیٹا واپس نہ آ سکے، تو آپ کو اسے بار بار اوور رائٹ کرنا پڑے گا (یعنی اس جگہ پر نیا بے معنی ڈیٹا لکھنا پڑے گا) یا پھر ڈیٹا شریڈنگ/وائپنگ ٹولز استعمال کرنے ہوں گے۔
ایسا کرنے کے بعد وہ ڈیٹا دوبارہ بحال نہیں کیا جا سکتا۔
