09/10/2025
صحافين لاءِ مقتل گاهه بڻيل سنڌ!
عامرجوڳي
دنيا جي هر مهذب معاشري ۾ صحافت کي سماج جو چوٿون ستون قرار ڏنو ويندو آهي، جتي صحافيءَ کي سچ ڳالهائڻ ۽ لکڻ جو حق عزت ۽ احترام سان ڏنو ويندو آهي.
پر افسوس سان چوڻو پوي ٿو ته سنڌ، جيڪا هميشه امن، علم ۽ ادب جي ڌرتي رهي آهي، اڄ صحافين لاءِ مقتل گاهه بڻجي چڪي آهي۔
سنڌ ۾ هر آئي ڏينهن صحافي کي گولين جو کاڄ بڻجي رهيو آهي، پر نه سنڌ حڪومت، نه وفاق، نه انٽيليجنس ادارا ۽ نه ئي لاڳاپيل اختيارين مان ڪنهن به صحافي لاءِ انصاف فراهم ڪيو آهي۔ هر ڀيري ڪنهن صحافي جي قتل کي ”ڪاروڪاري“، ”قبيلائي تڪرار“ يا ڪنهن ذاتي دشمني جي آڙ ۾ لئي مٽي ڪيو وڃي ٿو۔
حقيقت اها آهي ته صحافين جي ڪنهن سان ذاتي دشمني ناهي هوندي، پر جڏهن ڪو قلمڪار ڪنهن سردار، پير، مير، وڏيري، آفيسر يا اداري جي ڪرپشن يا ظلم خلاف سچ لکي ٿو ته پوءِ ان جو انجام گهڻو ڪري موت يا هراسان ڪرڻ جي صورت ۾ نڪري ٿو۔
سنڌ جا ڪيترائي بهادر صحافي پنهنجي قلم جي سچائيءَ جي قيمت زندگيءَ سان ادا ڪئي آهي —
شڪارپور ۾ امير بخش بروهي، صالح پٽ ۾ اجي ڪمار لالواڻي، ۽ سکر ۾ ڪاوش ۽ ڪي ٽي اين جي بيروچيف جان محمد مہر کي وچ شهر ۾ سرِعام گوليون هڻي شهيد ڪيو ويو۔
ان واقعي تي پيپلز پارٽي جي چيئرمين بلاول ڀٽو زرداري، سنڌ جي وزيراعليٰ مراد علي شاهه ۽ ٻين اڳواڻن تعزيتون ته ڪيون، پر انصاف اڄ تائين خواب بڻيل آهي۔
سوال اڃان تائين اهو آهي ته جيڪڏهن بلاول ڀٽو پاڻ به قاتلن کي گرفتار ڪرڻ جو حڪم ڏئي ٿو، ته پوءِ اڄ تائين اهي قاتل آزاد ڇو آهن؟
ڇا پوليس نااهل آهي يا پوءِ ڪو وڏو هٿ قاتلن جي پٺيان آهي؟
ان کان پوءِ ميرپور ماٿيلي جو نوجوان صحافي نصرالله گڏاڻي به سچ لکڻ جي سزا ۾ شهيد ڪيو ويو — ۽ سندس قاتل به اڄ تائين آزاد آهن۔
جڏهن ته گذريل ڏينهن ساڳي علائقي جي صحافي صفيل رند پنهنجي ٻارن کي اسڪول ڇڏڻ ويو ته سامهون ئي کيس گوليون هڻي شهيد ڪيو ويو۔
افسوس جو هن ظلم جو منظر سندس ننڍن ٻارن جي سامهون ٿيو، ۽ صدمي ۾ سندس پائٽي به فوت ٿي وئي۔
ڇا ان کان وڏي بيحسي ۽ ظلم جو تصور ڪري سگهجي ٿو؟
سنڌ ۾ بي شمار صحافي پنهنجو فرض نڀائيندي شهيد ٿي چڪا آهن، پر نه ڪو انصاف مليو آهي، نه ڪو قدم کڻيو ويو آهي۔ حڪومت، سياسي اڳواڻ ۽ صحافتي تنظيمون سڀ خاموش تماشائي بڻيل آهن۔
هاڻي وقت اچي ويو آهي ته صحافي پاڻ ۾ اتحاد پيدا ڪن، ۽ سچ جي آواز کي دٻجڻ نه ڏين۔
جيڪڏهن اڄ اسان خاموش رهياسين، ته اڄ طفيل رند، سڀاڻي تون ۽ مان، ۽ پرسو ڪو ٻيو نالو هوندو۔
ان ڪري ضروري آهي ته اسان سڀ گڏ ٿي انصاف ۽ اظهار جي
آزاديءَ لاءِ جدوجهد جاري رکون۔
GreatestHighlights TopFans
