18/06/2026
راجہ یبگو دولت علی خان مرحوم بہادری، عشق اور وقار کی ایک یادگار داستان
میرے نانا راجہ یبگو دولت علی خان راجہ حاتم خان ثانی کے چھوٹے صاحبزادے تھے، جبکہ ان کے بڑے بھائی راجہ ناصر علی خان خپلو کے جاگیردار راجہ تھے۔ راجہ دولت علی خان اپنی غیر معمولی وجاہت، شجاعت، اعلیٰ کردار، گھڑسواری اور پولو کے بے مثال کھیل کی وجہ سے پورے خطے میں شہرت رکھتے تھے۔
ان کے بارے میں ایک مشہور واقعہ نوروز کے دن ہونے والے پولو مقابلے کا ہے۔ ایک طرف راجہ ناصر علی خان کی ٹیم تھی، جس میں ان کے شہزادے شامل تھے، جبکہ دوسری طرف راجہ دولت علی خان کی ٹیم میں وزراء اور خپلو کے کاچو صاحبان شریک تھے۔
مقابلہ انتہائی سخت تھا۔ جب راجہ ناصر علی خان کی ٹیم نے پہلا گول کیا تو سورنا بجانے والے نے فتح کا طنزیہ ساز بجانا شروع کر دیا۔ یہ بات راجہ دولت علی خان کو ناگوار گزری۔ انہوں نے غیر معمولی جوش کے ساتھ کھیلتے ہوئے لگاتار پانچ گول کر دیے، جبکہ ان کے ساتھی کاچو مظفر علی خان بانپی نے مسلسل چار گول کیے۔ یوں ہاف ٹائم سے پہلے ہی نو گول کر کے راجہ ناصر علی خان کی مضبوط ٹیم کو شکست دے دی گئی، اور یہ واقعہ آج بھی علاقے کی یادگار داستانوں میں شمار ہوتا ہے۔
اس زمانے کی روایت کے مطابق جاگیری اور محل بڑے صاحبزادے کو ملتے تھے، جبکہ راجہ دولت علی خان کو ہر سال اجناس کی صورت میں سو من گندم دیا جاتا تھا۔ یہ طریقہ انہیں پسند نہ آیا، چنانچہ انہوں نے اپنے بڑے بھائی سے وراثت میں اپنا حصہ طلب کیا، مگر انکار ہونے پر انہوں نے نوبرہ (لداخ) کی عدالت میں مقدمہ دائر کیا اور اسی سلسلے میں کافی عرصہ وہاں قیام کیا۔
نوبرہ کے علاقے دسکت ہندور میں قیام کے دوران وہاں کے نمگیل خاندان کی ایک شہزادی ڈولمو نمگیل ان کی شخصیت سے متاثر ہوئیں اور انہوں نے اپنی والدہ اپی شیما سے خواہش ظاہر کی کہ اگر شادی کریں گی تو صرف راجہ دولت علی خان سے۔ ابتدا میں مذہبی اختلاف کی وجہ سے یہ رشتہ قبول نہ کیا گیا، لیکن تقدیر کو کچھ اور منظور تھا۔
بعد ازاں راجہ دولت علی خان اپنے ساتھیوں کے ساتھ شہزادی کو خپلو لے آئے۔ راستے میں چولونکھا کے معزز اباپا خاندان نے ان کی میزبانی اور حفاظت کی۔ جب نوبرہ کے لوگ ان کے تعاقب میں آئے تو اباپا خاندان نے بڑی حکمت عملی سے گندم کی جھاڑیوں کو کپڑے پہنا کر اور ہاتھوں میں لکڑی کی بندوقیں تھما کر ایسا منظر بنایا کہ دشمن یہ سمجھ بیٹھا کہ بڑی فوج موجود ہے، چنانچہ وہ واپس لوٹ گئے۔ بعد میں انہی لوگوں نے شہزادی کو بحفاظت خپلو پہنچایا۔
شہزادی ڈولمو نمگیل نے اسلام قبول کیا اور ان کا نام حبیبہ زہرہ رکھا گیا۔ اگرچہ وہ خپلو میں خوش تھیں، مگر کبھی کبھی انہیں اپنے آبائی وطن نوبرہ کی یاد ستاتی تھی۔ ان کی اس خواہش کو دیکھتے ہوئے راجہ دولت علی خان نے خپلو کے مقام سقپی ژھر میں نوبرہ کے قلعے کے نقشے پر ایک خوبصورت محل تعمیر کروایا، جہاں بعد میں ان کے بیٹے کاچو حسین خان، کاچو محمد علی خان اور کاچو اکبر علی خان آباد ہوئے۔
راجہ دولت علی خان اپنی زندگی کے آخری ایام بھی اسی عدالتی مقدمے کے سلسلے میں نوبرہ میں گزار رہے تھے۔ وہیں بیمار ہوئے اور وہیں وفات پائی۔ ان کی آخری آرام گاہ دسکت ہندور، نوبرہ میں واقع ہے۔
محبت کی خاطر راہِ وفا میں جو قدم بڑھا گئے
تاریخِ خپلو میں وہ اپنی مہر سدا لگا گئے
نوبرہ کی مٹی میں اگرچہ آسودۂ خواب ہیں آج
دلوں کے تخت پر لیکن وہ آج بھی راج کرتے ہیں
اللہ تعالیٰ میرے نانا راجہ یبگو دولت علی خان کی کامل مغفرت فرمائے، ان کی قبر کو نور سے بھر دے، انہیں جنت الفردوس میں اعلیٰ مقام عطا فرمائے، اور ان کی نیک یادوں کو ہمیشہ زندہ رکھے۔
آمین یا رب العالمین۔
بشکریہ : محمد افضل منڈوق صاحب
