26/10/2025
سکر () آلٽرنيٽو ريسرچ انيشيٽو (ARI) ۽ ناري فائونڊيشن جي سهڪار سان ICMA سکر ڪيمپس ۾ آگاھي سيمينار بعنوان "سگريٽ نوشي کان پاڪ پاڪستان" منعقد ڪيو ويو۔ سيمينار جي صدارت ميڊم سائره لاشاري، انچارج ICMA سکر ڪيمپس، ۽ جناب فياض علي آجن، پرنسپل گورنمينٽ ووڪيشنل انسٽيٽيوٽ بوائز سکر ۽ فوڪل پرسن IMC سکر ريجن، ڪئي۔
مهمانِ خاص طور تي ARI مان جناب جعفر مهدي ۽ جنيد خان شرڪت ڪئي، جڏهن ته ناري فائونڊيشن سکر مان شازيه عباسي، عبدالوحيد ۽ فرحان علي پڻ هن تقريب ۾ موجود هئا۔
سيمينار جي شروعات ۾ ناري فائونڊيشن جي پروگرام مينيجر شازيه عباسي ٻڌايو ته "سگريٽ نوشي کان پاڪ پاڪستان" پروگرام جون سرگرميون ملڪ جي 12 ضلعن ۾ جاري آهن۔ هن مهم جو بنيادي مقصد نوجوانن کي تمباڪو ۽ سگريٽ جي موذي اثرن بابت آگاهه ڪرڻ آهي۔ هن چيو ته پروگرام تحت ڪميونٽي ميٽنگز، تعليمي ادارن ۾ سيمينار ۽ سگريٽ نوشي ڪندڙ ماڻهن سان آگاهي سيشنز ڪيا وڃن ٿا، جڏهن ته ميڊيا ذريعي به آگاهي جي مهم جاري آهي۔
ARI جي نمائندي جنيد علي خان شاگردن سان ڳالهائيندي چيو ته پاڪستان ۾ هن وقت لڳ ڀڳ 3 ڪروڙ 10 لک ماڻهو تمباڪو ۽ سگريٽ استعمال ڪن ٿا، ۽ هي تعداد ڏينهن به ڏينهن وڌي رهي آهي۔ هن افسوس جو اظهار ڪندي چيو ته جيڪڏهن گهر جو وڏو سگريٽ نوشي ڪري ٿو ته گهر ۾ ٻار ۽ عورتون به ان جي اثر هيٺ اچي وڃن ٿيون۔ هن وڌيڪ چيو ته ٽوباڪو ڪنٽرول لاءِ قانون ته موجود آهن، پر انهن تي عملدرآمد جو شديد فقدان آهي۔
مقررن زور ڏنو ته اسان سڀني کي گڏجي سگريٽ نوشي جي روڪٿام لاءِ عملي ڪوششون ڪرڻ گهرجن۔ سيمينار جي پڄاڻي تي شاگردن کان عهد ورتو ويو ته هو تمباڪو ۽ سگريٽ جي وڌندڙ نقصانن بابت آگاهي پيدا ڪندا ۽ پنهنجي چوڌاري ماحول کي سگريٽ نوشي کان پاڪ بڻائڻ لاءِ ڪم ڪندا۔
